កម្ពុជា ត្រៀមខ្លួនធ្វើជាម្ចាស់ផ្ទះលេខាធិការដ្ឋាន RCEP ដើម្បីស្តារកំណើនសេដ្ឋកិច្ច

ដើម្បីស្តារ និងងើបចេញពីផលប៉ះពាល់នៃជំងឺកូវីដ-១៩ ប្រកបដោយប្រសិទ្ធភាព កម្ពុជាបានត្រៀមខ្លួនរួចជាស្រេច ក្នុងការធ្វើជាម្ចាស់ផ្ទះនៃលេខាធិការដ្ឋានអាសិប(RCEP) នៅរាជធានីភ្នំពេញ។ នេះបើតាមប្រសាសន៍របស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា ថ្លែងនៅក្នុងពិធីបើកកិច្ចប្រជុំរដ្ឋមន្ត្រីការបរទេសលើកទី៥៥ និងកិច្ចប្រជុំពាក់ព័ន្ធ នាព្រឹក ថ្ងៃទី០៣ ខែសីហា ឆ្នាំ២០២២ នៅសណ្ឋាគារសុខាភ្នំពេញ។

សម្ដេចតេជោនាយករដ្ឋមន្រ្ដី បានគូសបញ្ជាក់ថា យើងត្រូវការជាចាំបាច់នូវលេខាធិការដ្ឋានដាច់ ដោយឡែកមួយឱ្យបាន​ឆាប់បំផុត ដើម្បីសម្របសម្រួលការអនុវត្តប្រកបដោយប្រសិទ្ធភាព នូវកិច្ចព្រមព្រៀងអាសិប(RCEP) ដែលបានចូល​ជាធរ​មាន កាលពីខែមករា កន្លងទៅនេះ។

បើតាមម្តេចតេជោ កម្ពុជាត្រៀមខ្លួនរួចជាស្រេច ក្នុងការធ្វើជាម្ចាស់ផ្ទះនៃលេខាធិការដ្ឋានអាសិបនេះ ហើយថែមទាំងបាន​កំណត់ទីតាំងរួចជាស្រេចសម្រាប់ លេខាធិការដ្ឋានអាសិបនេះ នៅរាជធានីភ្នំពេញ និងបាននិងកំពុងរៀបចំគម្រោង​សំណើលម្អិតទៀតផង។

ជុំវិញគម្រោងនេះ សម្ដេចតេជោសង្ឃឹមថា កម្ពុជាអាចទទួលបានការគាំទ្រពីប្រទេសសមាជិកអាស៊ាន ក៏ដូចជាប្រទេសជា​សមាជិកផ្សេងទៀត នៃកិច្ចព្រមព្រៀងអាសិប នៅពេលដែលកម្ពុជាដាក់សំណើនេះជាផ្លូវការ។

សូមបញ្ជាក់ថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់(អាសិប-RCEP) បានចូលជាធរមាននៅថ្ងៃទី ០១ ខែមករា ឆ្នាំ ២០២២។​ កិច្ចព្រមព្រៀងអាសិប ជាគំនិតផ្តួចផ្តើមរបស់អាស៊ាន និងត្រូវបានប្រកាសឱ្យចាប់ផ្តើម​ចរចានៅឆ្នាំ ២០១២ នៅរាជធានីភ្នំពេញ នៃព្រះរាជាណាចក្រកម្ពុជា។ កិច្ចព្រមព្រៀងនេះ គឺជាកិច្ចព្រមព្រៀង​ពាណិជ្ជកម្មសេរី ដ៏ធំបំផុតលើពិភពលោក ដែលមានសមាជិកចំនួន ១៥ប្រទេស រួមមានប្រទេសជាសមាជិកអាស៊ានទាំង ១០ និងប្រទេសដៃគូពាណិជ្ជកម្មសេរីអាស៊ានចំនួន៥ មានដូចជា អូស្ត្រាលី ជប៉ុន កូរ៉េខាងត្បូងចិន និងណូវែលហ្សេឡង់ គ្របដណ្តប់ ប្រជាជនប្រមាណ ២.២ពាន់លាននាក់ ឬ៣០ភាគរយ នៃចំនួនប្រជាជនលើពិភពលោក, ផលិតផលក្នុង​ស្រុកសរុបប្រមាណ ២៦.២ទ្រីលានដុល្លារ ឬ ៣០ភាគរយនៃផលិតផលក្នុងស្រុកសរុបរបស់ពិភពលោក និងទំហំពា​ណិជ្ជកម្មចំនួនប្រមាណ ២៨ភាគរយ នៃទំហំពាណិជ្ជកម្មពិភពលោកទាំងមូល។

ផ្អែកតាមលទ្ធផលនៃការសិក្សារបស់វិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា បានបង្ហាញថា កម្ពុជាអាចនឹងមានកំណើនប្រចាំឆ្នាំ ការនាំចេញចំនួន ៧,៣ភាគរយ វិនិយោគចំនួន ២៣,៤ភាគរយ និងផលិតផលក្នុងស្រុកសរុបចំនួនប្រមាណ ២% លើផលិតផលក្នុងស្រុកសរុប ដែលមានបច្ចុប្បន្ន។

កម្ពុជា ទទួលបានភាពអនុគ្រោះពន្ធពីកិច្ចព្រមព្រៀងនេះ លើទំនិញសំខាន់ៗជាច្រើន មានដូចជា៖

វិស័យកសិកម្ម រួមមាន៖ គ្រាប់ស្វាយចន្ទី ពោត ដូង ស្វាយស្រស់ ចេក ដំឡូងជ្វា ទឹកឃ្មុំ ម្សៅរមៀត ក្រូច ល្ហុង ផ្លែផាសិន ខ្ទឹម ត្របែក ស្រកានាគ ទុរេន ។ល។

ទំនិញកសិកម្មកែច្នៃ ៖ គុយទាវ នំក្រៀម សម្បុកត្រចៀកកាំ ទំនិញកែច្នៃពីត្រី ម្សៅដំឡូងមី ទំនិញកែច្នៃពីដូង ប្រេងសណ្តែក សាច់ក្រក ទឹកម្ទេស ដំណាប់ចេក ដំណាប់ស្វាយ ដំណាប់ទុរេន និងមីកញ្ចប់ជាដើម។

ទំនិញឧស្សាហកម្ម ៖ កង់ សំលៀកបំពាក់ ស្បែកជើង គ្រឿងបង្គុំអេឡិចត្រូនិក ខ្សែកាប អេឡិចត្រូវនិកអគ្គិសនី គ្រឿងសង្ហារឹម ស្ករស ស្ករអំពៅ កាបូបយួរដៃ វ៉ាលី ខ្សែភ្លើង សម្ភារកីឡា ជ័រកែច្នៃ សម្បកថ្នាំពេទ្យ ជ័រកៅស៊ូធម្មជាតិវា កៅស៊ូក្នុងទម្រង់បន្ទះ កៅស៊ូឡាតិច ក្រណាត់ក្រាល និងកម្ទេចឈើកែច្នៃ៕