ព័ត៌មានជាតិ

យោធាកម្ពុជាជួបអាមេរិកនៅកោះហាវ៉ៃស្របពេលដែលថៃឈ្លានពាន

បានផុស

១២ ខែ មុន

នៅ

ថ្ងៃអង្គារ ២៩ កក្កដា ២០២៥

ដោយ

ប្រតិភូនៃកងយុទ្ធពលខេមរភូមិន្ទកម្ពុជាបានទៅជួបនាយកនៃផែនការយុទ្ធសាស្ត្រនិងគោលនយោបាយនៃទីបញ្ជាការឥណ្ឌូប៉ាស៊ីហ្វិកសហរដ្ឋអាមេរិកនៅកោះហាវ៉ៃ សហរដ្ឋអាមេរិកពីថ្ងៃទី២៤ ដល់ថ្ងៃទី២៥ ខែកក្កដា ស្របពេលដែលកម្ពុជាមានការឈ្លានពានពីថៃ។ ដំណឹងនៃការជួបគ្នានេះទើបតែត្រូវបានឱ្យដឹងនៅថ្ងៃទី២៨ ខែកក្កដា នៅលើគេហទំព័របស់ទីបញ្ជាការឥណ្ដូប៉ាស៊ីហ្វិករបស់សហរដ្ឋអាមេរិក។

(U.S. Navy photo by Mass Communication Specialist 1st Class John Bellino)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិភូកម្ពុជាដឹកនាំដោយប្រធានក្រុមសម្របសម្រួលកិច្ចសហប្រតិបត្តិការយោធាកម្ពុជា ឧត្តមសេនីយ៍ឯក សួន សំណាង បានជួបពិភាក្សាជាមួយតំណាងកងម៉ារីនអាមេរិកលោកឧត្តមសេនីយ៍ទោ George Rowell ដោយបានពិភាក្សាពង្រឹងកិច្ចសហប្រតិបត្តិការយោធារវាងប្រទេសទាំងពីរផ្ដោតលើការបណ្ដុះបណ្ដាល ការអប់រំវិជ្ជាជីវៈយោធា និងកម្មវិធីជំនួយមនុស្សធម៌។ ក្នុងនោះក៏បានពិភាក្សាពីការរៀបចំធ្វើសមយុទ្ធឆ្មាំអង្គរឡើងវិញ។

ជំនួបរវាងតំណាងយោធាកម្ពុជានិងអាមេរិកពេលនេះស្របដែលមានការឈ្លានពានពីប្រទេសថៃលើទឹកដីកម្ពុជាផងដែរ។

ក្នុងការបង្ហោះរបស់ទីបញ្ជាការឥណ្ឌូប៉ាស៊ីហ្វិកសហរដ្ឋអាមេរិកនៅថ្ងៃទី២៨ ខែកក្កដា បានសរសេរបញ្ជាក់ថា៖ «USINDOPACOM ប្តេជ្ញាពង្រឹងស្ថិរភាពក្នុងតំបន់ឥណ្ឌូ-ប៉ាស៊ីហ្វិក ដោយការលើកកម្ពស់កិច្ចសហប្រតិបត្តិការសន្តិសុខ ជំរុញការអភិវឌ្ឍដោយសន្តិវិធី ឆ្លើយតបទៅនឹងឧបទ្ទវហេតុ រារាំងការឈ្លានពាន និងដើម្បីបញ្ជៀសនូវជម្លោះ»។

គួរឱ្យដឹងផងដែរថាយោធាថៃបានបើកការបាញ់ប្រហារមកលើទាហានខ្មែរនៅព្រឹកថ្ងៃទី២៤ ខែកក្កដា បន្ទាប់ពីបានរាយបន្លាលួសព័ទ្ធយកប្រាសាទតាមាន់ធំ។ ក្រោយហេតុការណ៍នោះការប៉ះទង្គិចដោយប្រដាប់អាវុធរវាងប្រទេសទាំងពីរបានផ្ទុះឡើងទ្រង់ទ្រាយធំ រហូតដល់មានការអន្តរាគមន៍ពីប្រធានអាស៊ាន និងប្រធានាធិបតីអាមេរិកផងដែរ។ បទឈប់បាញ់មួយបានធ្វើឡើងនៅម៉ោង១២យប់ថ្ងៃទី២៨ ខែកក្កដា ៥ថ្ងៃបន្ទាប់ពីការផ្ទុះអាវុធ។

ប្រធានាធិបតីអាមេរិកលោកដូណាល់ត្រាំ បានលើកឡើងថា ការសម្រេចបានជោគជ័យនៃបទឈប់បាញ់នេះបានសង្គ្រោះអាយុជីវិតមនុស្សរាប់ពាន់នាក់ ហើយលោកក៏បានបញ្ជាឱ្យក្រុមការងារពាណិជ្ជកម្មរបស់លោកធ្វើការចចារពាណិជ្ជកម្មឡើងវិញជាមួយប្រទេសកម្ពុជា និងថៃផងដែរ។

លោក ដូណាល់ត្រាំ សរសេរថា៖ «ពេលនេះខ្ញុំបានបញ្ចប់សង្គ្រាមជាច្រើនក្នុងរយៈពេល៦ខែមកនេះ ខ្ញុំមានមោទនភាពដែលក្លាយជាប្រធានាធិបតីនៃសន្ដិភាព»៕