ព័ត៌មានជាតិ

ផ្លូវមួយចំនួនក្នុងខេត្តព្រះវិហារ រងការខូចខាតដោយសារការផ្លោងគ្រាប់ដាក់របស់ទាហានថៃ

បានផុស

១២ ខែ មុន

នៅ

ថ្ងៃពុធ ៣០ កក្កដា ២០២៥

ដោយ

ក្រោយបទឈប់បាញ់គ្នាចូលជាធរមាន កាលពីវេលាម៉ោង ២៤ ឈានចូលថ្ងៃទី២៩ ខែកក្កដា ឆ្នាំ២០២៥ ក្រុមការងារមន្ទីរសាធារណការ និងដឹកជញ្ជូនខេត្តព្រះវិហារ បានចុះពិនិត្យលម្អិតខ្សែផ្លូវក្នុងភូមិសាស្ត្រក្នុងខេត្ត ដែលរងការខូចខាតដោយសារគ្រាប់ផ្លោងរបស់ទាហានថៃ និងត្រៀមជួសជុលឲ្យបានទាន់ពេលវេលា។

លោក ផន រឹម មន្រ្តីអ្នកនាំពាក្យក្រសួងសាធារណការ និងដឹកជញ្ជូនបានបង្ហោះរូបថតសភាពផ្លូវមួយចំនួនក្នុងខេត្តព្រះវិហារដែលរងការខូចខាត ក្រោយមានការប៉ះទង្គិចគ្នានិងការផ្លោងគ្រាប់ពីទាហានថៃ។ បើតាមលោក ផន រឹម ក្នុងចំណោមកំណាត់ផ្លូវសរុប ៩ ខ្សែ ដែលបានត្រួតពិនិត្យមានតែផ្លូវខេត្តលេខ ២៦២៨ (ច្រកតាថាវ) និងផ្លូវខេត្តលេខ ២PVH៥ (ជាំក្សាន្ត-អានសេះ) ប៉ុណ្ណោះ ដែលរងការខូចខាតដោយសារគ្រាប់កាំភ្លើងធំធ្លាក់ចំ។

១-កំណាត់ផ្លូវខេត្តលេខ ២៦២៨ (ច្រកតាថាវ)៖ មានករណីគ្រាប់កាំភ្លើងធំផ្លោងធ្លាក់ចំ ០១ ទីតាំង ត្រង់ចិញ្ចើមផ្លូវនៅPK10+020។
២-កំណាត់ផ្លូវខេត្តលេខ ២PVH៥ (ជាំក្សាន្ត – អានសេះ)៖ មានករណីគ្រាប់កាំភ្លើងធំផ្លោងធ្លាក់ចំ ០៣ ទីតាំង ដូចខាងក្រោម៖

* PR2PVH5 PK05+320
* PR2PVH5 PK06+660
* PR2PVH5 PK10+030

ចំណែកឯផ្លូវជាតិ និងផ្លូវខេត្តផ្សេងទៀតដូចជា៖ ផ្លូវជាតិលេខ ៦២, ផ្លូវជាតិលេខ ៩២, ផ្លូវខេត្តលេខ ២៦២៥, ផ្លូវខេត្តលេខ ២៦២៦, ផ្លូវខេត្តលេខ ២PVH២, ផ្លូវខេត្តលេខ ២PVH៧ និងផ្លូវខេត្តលេខ ២PVH៩ គឺពុំមានការខូចខាតដោយសារគ្រាប់កាំភ្លើងធំធ្លាក់ចំនោះឡើយ។

ស្ថានភាពផ្លូវក្នុងស្រុកជាំក្សាន្ត ខេត្តព្រះវិហារ គឺនៅមានសុវត្ថិភាពសម្រាប់ការធ្វើដំណើរបានធម្មតានៅលើកំណាត់ផ្លូវភាគច្រើន លើកលែងតែកំណាត់ផ្លូវមួយចំនួនតូចប៉ុណ្ណោះដែលត្រូវការជួសជុលដោយសារការខូចខាតខាងលើ៕