និស្សិតខ្មែរមួយចំនួនដែលសិក្សានៅថៃសម្រេចចិត្តបោះបង់ការសិក្សា ហើយវិលចូលកម្ពុជាវិញ

អ្នកនាំពាក្យក្រសួងអប់រំ យុវជន និងកីឡា លោកស្រី ឃួន វិច្ឆិកា បានឱ្យដឹងថា និស្សិតខ្មែរមួយចំនួនដែលសិក្សានៅប្រទេសថៃ សម្រេចចិត្តវិលមកកម្ពុជាបណ្តោះអាសន្នសិនរង់ចាំមើលស្ថានការណ៍ ខណៈនិស្សិតមួយចំនួនទៀតបានសម្រេចចិត្តបោះបង់ចោលការសិក្សានៅថៃទាំងស្រុង ហើយបន្តការសិក្សានៅកម្ពុជាវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមថ្ងៃទី ២៩ ខែកក្កដា ឆ្នាំ ២០២៥ និស្សិតកម្ពុជាចំនួន ៤១០នាក់ហើយ បានសម្រេចចិត្តចាកចេញពីប្រទេសថៃ ខណៈក្រសួងអប់រំកំពុងសម្របសម្រួលផ្តល់អាហារូបករណ៍ឱ្យចូលរៀននៅតាមគ្រឹះស្ថានឧត្តមសិក្សានានានៅកម្ពុជា។ តាមគម្រោង នៅថ្ងៃទី​៣០ កក្កដា នឹងមាននិស្សិតចំនួន ១៣ នាក់បន្ថែមទៀត វិលចូលប្រទេសវិញ។

ការវិលចូលស្រុកនេះ ស្របពេលដែលកម្ពុជា-ថៃ មានជម្លោះព្រំដែន ពោលភាគីថៃឈ្លានពានដែនអធិបតេយ្យភាពកម្ពុជា ក៏មានការកើនឡើងនូវការរើសអើង ការប្រើហិង្សា និងការគំរាមកំហែងដល់សុវត្ថិភាពរបស់បងប្អូនប្រជាពលរដ្ឋខ្មែរ ដែលកំពុងស្នាក់នៅនិងធ្វើការនៅប្រទេសថៃ បង្កឡើងដោយក្រុមជ្រុលនិយមថៃ។ ជាការកត់សម្គាល់ សូម្បីពលរដ្ឋខ្មែរដើរតាមផ្លូវ កំពុងធ្វើការ និងកំពុងគេងក្នុងបន្ទប់ ត្រូវបានក្រុមជ្រុលនិយមថៃ ធ្វើទុក្ខបុកម្នេញ វាយ ទាត់ធាក់ ដែលវីដេអូហិង្សាទាំងនោះត្រូវបានចែកចាយនៅលើបណ្តាញសង្គម។

កាលពីថ្ងៃទី ១៦ ខែមិថុនា ឆ្នាំ ២០២៥ សម្តេចតេជោ ហ៊ុន សែន​ ប្រធានព្រឹទ្ធសភា បានផ្តាំទៅនិស្សិតខ្មែរដែលទទួលបានអហារូបករណ៍សិក្សានៅប្រទេសថៃ ពិចារណាវិលត្រឡប់មកកម្ពុជាវិញ ក្នុងករណីថៃធ្វើទុក្ខបុកម្នេញអំឡុងពេលសិក្សា ចំពេលមានភាពតាងតឹងក្នុងជម្លោះព្រំដែន។ ជាមួយនឹងការហៅមកផ្ទះយើងវិញ សម្តេចតេជោ អះអាងធានាផ្តល់អាហារូបករណ៍ និងទទួលបន្ទុកចេញថ្លៃសិក្សា។

គួរជម្រាបផងដែរថា អំឡុងពេលផ្ទុះសង្គ្រាមរយៈជាងមួយខែមកនេះ ពោលគិតចាប់ពីថៃឈ្លានពានទឹកដីកម្ពុជា កាលពីថ្ងៃទី​២៤ ខែឧសភា មកដល់ថ្ងៃទី ២៨ ខែកក្កដា ឆ្នាំ ២០២៥ សាលារៀនចំនួន ៦០៥ កន្លែង ត្រូវបានបិទទ្វារ ហើយប៉ះពាល់សិស្សជាង១៥ម៉ឺននាក់ គ្រូបង្រៀន ៦ ២៧៦ នាក់ ក្នុងខេត្តចំនួន ៥រួមមាន ខេត្តព្រះវិហារ ឧត្តរមានជ័យ បន្ទាយមានជ័យ កោះកុង និងខេត្តពោធិ៍សាត់៕