នាវារបស់ចិនចំនួន ៤ គ្រឿងបានបើកចូលទៅក្នុងដែនទឹករបស់ប្រទេសជប៉ុនជុំវិញប្រជុំកោះ Senkaku ក្នុងសមុទ្រចិនខាងកើតក្បែរកោះ Minamikojima និងកោះ Uotsurijima ។

ចំពោះនាវាទាំងនោះ ត្រូវបានគេរាយការណ៍ថាកំពុងធ្វើនាវាចរក្នុងដែនទឹកដែលមានចម្ងាយប៉ុន្មានគីឡូម៉ែត្រពីនាវានេសាទជប៉ុន និងនាវាឃ្លាំមើល ។

ស្របពេលជាមួយគ្នានេះ ឆ្មាំឆ្នេរសមុទ្របាននិយាយថា ខ្លួនក៏បានបញ្ជូននាវាល្បាត ដើម្បីធានាសុវត្ថិភាពរបស់កប៉ាល់ជប៉ុន និងព្រមាននាវាចិនឲ្យចាកចេញពីដែនទឹករបស់ជប៉ុនជាបន្ទាន់ផងដែរ ។

ទន្ទឹមនោះ សកម្មភាពនេះគឺជាលើកទី ២ ហើយក្នុងឆ្នាំនេះដែលនាវាចិនត្រូវបានគេប្រទះឃើញនៅក្នុងដែនទឹករបស់ប្រទេសជប៉ុនជុំវិញប្រជុំកោះ Senkaku ដោយលើកទី ១ បានកើតឡើងនៅថ្ងៃទី១០ ខែមករា ឆ្នាំ ២០២៣ ។

ពីមុន ប្រជុំកោះ Senkaku ដែលចិនហៅថា កោះ Diaoyu ស្ថិតក្រោមការគ្រប់គ្រងចិនតាំងពីបុរាណកាលរហូតដល់ចុងសតវត្សទី ១៩ នៅពេលដែលប្រទេសជប៉ុនបានទាមទាកោះដែលគ្មានមនុស្សរស់នៅនេះ ហើយនៅក្នុងឆ្នាំ​ ១៩៧១ ក្រោមកិច្ចព្រមព្រៀងប្តូរ​កោះអូគីណាវ៉ា សហរដ្ឋអាមេរិកបានបញ្ជាក់ការទាមទារប្រជុំកោះមួយនេះចូលមកក្នុងដែនទឹកជប៉ុនវិញ ។

បច្ចុប្បន្ន ប្រជុំកោះ Senkaku គឺជប៉ុនជាអ្នកគ្រប់គ្រង ខណៈចិន និងតៃវ៉ាន់ ក៏នៅទាមទារ​ប្រជុំកោះនេះមកជាដែនទឹករបស់ខ្លួនវិញផងដែរ ។ រដ្ឋាភិបាល​ជប៉ុន​បាន​រក្សា​កោះ​នេះ​ជា​ផ្នែក​មួយ​នៃ​ទឹកដី​របស់​ជប៉ុន​ទាំង​ផ្នែក​ប្រវត្តិសាស្ត្រ និង​ច្បាប់​អន្តរជាតិ ហើយជប៉ុនបញ្ជាក់ថា គ្មានបញ្ហាអធិបតេយ្យភាពដែលត្រូវដោះស្រាយជាមួយតែវ៉ាន់ និងចិន​ឡើយ ៕

ប្រែសម្រួលដោយ ៖ នាង រតនៈ

ប្រភព ៖ NHK

ចុចអាន ៖ រុស្ស៊ី ចោទ អាមេរិក និងណាតូ យក អ៊ុយក្រែន ជាកន្លែងដើម្បីសាកល្បង អាវុធថ្មីៗ