​​វត្តមាន​នាវាផ្ទុកយន្តហោះចិនពីរគ្រឿងនៅមហាសមុទ្រប៉ាស៊ីហ្វិក​​ធ្វើ​ឲ្យជ​​ប៉ុន​កង្វល់​​

ក្រសួងការពារជាតិជប៉ុន បាននិយាយថា ជាលើកដំបូងដែលនាវាផ្ទុកយន្តហោះចិនពីរគ្រឿងត្រូវបានប្រទះ​ឃើញធ្វើការជាមួយគ្នានៅក្នុងមហាសមុទ្រប៉ាស៊ីហ្វិក។ នេះបើយោងតាមការចេញផ្សាយរបស់សារព័ត៌មាន​ Al Jazeera នៅថ្ងៃទី១០ខែមិថុនានេះ។

មួយក្នុងចំណោមនាវាទាំងពីរ​គ្រឿង​​ ​មាននាវា Shandong រួមជាមួយនឹងកប៉ាល់ចិន ៤គ្រឿងផ្សេងទៀត បានចូលក្នុងតំបន់​សេដ្ឋកិច្ចផ្តាច់មុខរបស់ប្រទេសជប៉ុន និងបានធ្វើការហ្វឹកហាត់ហោះហើរនៅជិតតំបន់ថ្មប៉ប្រះទឹក Okinotori Atoll ។ នាវាផ្សេងទៀត គឺនាវា Liaoning ត្រូវបានគេឃើញនៅជិតកោះ Minamitorishima ។

ជាការឆ្លើយតប ជប៉ុនបានបង្កើនការត្រួតពិនិត្យរបស់ខ្លួន និង​បានផ្ញើសារព្រមានទៅកាន់ប្រទេសចិន។ អ្នកនាំពាក្យរដ្ឋាភិបាល​កំពូលរបស់ប្រទេសជប៉ុន លោក Yoshimasa Hayashi បាននិយាយថា សកម្មភាពទាំងនេះបង្ហាញថា ប្រទេសចិន ​ទំនង​​​​​​កំពុងព្យាយាមពង្រីកអំណាចយោធារបស់ខ្លួនឱ្យកាន់តែឆ្ងាយពីឆ្នេរសមុទ្ររបស់ខ្លួន។

ទោះយ៉ាងណាប្រទេសចិន បាននិយាយថា នាវាផ្ទុកយន្តហោះកំពុងប្រតិបត្តិការស្របច្បាប់ និងធ្វើការហ្វឹកហាត់ធម្មតា។ អ្នកនាំពាក្យក្រសួងការបរទេសចិន លោក Lin Jian បាននិយាយថា នាវាទាំងនោះ បានអនុវត្តតាមច្បាប់អន្តរជាតិ ហើយ​ថា សកម្មភាព​យោធារបស់ចិន គឺដើម្បីការពារជាតិ មិនមែនការវាយប្រហារនោះទេ៕

អត្ថបទ៖ ប៊ុន សុភាព