ជនសង្ស័យ ៣នាក់ គាស់ឃ្លាំងស្រាបៀរយកលុយ និងក្រវិលរង្វាន់សរុបអស់ជាង ៤ម៉ឺនដុល្លារ

ជនសង្ស័យមួយក្រុមបានធ្វេីសកម្មភាពចូលទៅក្នុងឃ្លាំង​ស្រាបៀរមួយកន្លែង លួចយកប្រាក់ និងក្រវិលកំប៉ុងរង្វាន់អស់មួយចំនួនធំ ហេីយនាំគ្នាគេចខ្លួនបាត់​ បង្កការភ្ញាក់ផ្អេីលកាលពីវេលាម៉ោង ១១ និង ៣០ នាទី​ ថ្ងៃទី៣ ខែវិច្ឆិកា ឆ្នាំ២០២៣ នៅចំណុចភូមិអន្លង ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល។

មន្ត្រីនគរបាលស្រុកខ្សាច់កណ្ដាល បានឱ្យដឹងថា ជនរងគ្រោះ ឈ្មោះ សាង វីសា ភេទប្រុស អាយុ ៣៨ឆ្នាំ ជនជាតិខ្មែរ មុខរបរបុគ្គលិក​ គ្រប់គ្រងឃ្លាំង មានទីលំនៅភូមិ អូរតាគាំ៣ ឃុំស្វាយប៉ោ ស្រុកស្វាយប៉ោ ខេត្តបាត់ដំបង។

សំភារបាត់បង់៖ ប្រាក់រៀល ២៦ ២៥០ ០០០៛ ប្រាក់ដូល្លារ ១ ៣៩៦ $ ក្រវិលកំប៉ុង ស្រាបៀរ វើក អាយ វើកអាយស៊ីធូ អ៊ីចប្រេស សរុប ១ ៩៥៨ កេះ គិតជាទឹកប្រាក់ ២២ ៨៣៥ $ ក្រវិលកំប៉ុងត្រូវរង្វាន់ លុយចំនួន ៨ ៣៩៣ $ សរុបទាំងអស់ចំនួន ៤១ ១៦៤ $។

យោងតាមកាមេរ៉ាសុវត្ថភាព ឃើញជនសង្ស័យចំនួន ៣នាក់ ប្រុស មានពាក់ម៉ាស ពាក់មួក ពាក់ស្រោមដៃ ជិះម៉ូតូ ២គ្រឿង ពេលធ្វើសកម្មភាព ហើយជិះចេញទៅទិសខាងជើង។

ករណីនេះ សមត្ថកិច្ចការិយាល័យបច្ចេកទ្ទេសវិទ្យាសាស្ត្រ ខេត្ត ការិយាល័យព្រហ្មទណ្ឌកម្រិតស្រាល ខេត្ត កម្លាំងផ្នែកនគរបាលយុត្តិធម៌ស្រុក កម្លាំងប៉ុស្តិ៍ព្រែកតាមាក់ កំពុងស៊ើបអង្កេតស្រាវជ្រាវ៕

អត្ថបទ៖ សុខា