អង្គការសម្ព័ន្ធមិត្តសត្វព្រៃ បញ្ជាក់ករណី​លាឈប់របស់លោក​ស៊ីថេង ខណៈខ្ទង់​ចំណាយលើចំណីសត្វអស់ ១៥០០០ដុល្លារ ក្នុង១ខែ

ក្រោយផ្ទុះការវែកញែកទាក់ទងនឹងការលាឈប់របស់លោក ទ្រី សុីថេង អង្គការសម្ព័ន្ធមិត្តសត្វព្រៃ នៅរសៀលថ្ងៃទី០៣ មិថុនានេះ បានចេញមកបញ្ជាក់ថា លោក ទ្រី ស៊ីថេង បានដាក់លិខិតលាលែងពីការងារដោយស្ម័គ្រចិត្តខ្លួនឯង ដោយលាឈប់ពីការងារចាប់ពីថ្ងៃទី ៣០ ខែមិថុនា ឆ្នាំ២០២៥ តទៅ។ គាត់មិនត្រូវបានគេបញ្ឈប់ ឬក៏ស្នើសុំឱ្យលាលែងពីការងារនោះឡើយ។

បើតាមការបញ្ជាក់ លោក ទ្រី ស៊ីថេង មិនមែនជាអ្នកមើលថែឡាក់គីតែម្នាក់ឯងនោះទេ។ ការពាក់ព័ន្ធរបស់លោកចំពោះឡាក់គី មួយរយៈពេលចុងក្រោយនេះ គឺក្នុងគោលបំណងដើម្បីថតជាវីដេអូដើម្បីផ្សព្វផ្សាយ។ ឯការផ្តល់ចំណីដល់ឡាក់គី ការថែទាំ និងការដាក់ឱ្យឡាក់គីលេង គឺក្រុមការងារផ្នែកថែទាំសត្វបានផ្តល់ និងបន្តផ្តល់ក្រោមការមើលថែតាមបែបវេជ្ជសាស្ត្រជាប្រចាំ។

ទន្ទឹមនឹងការលើកឡើងខាងលើនេះ អង្គការសម្ព័ន្ធមិត្តសត្វព្រៃ ក៏បង្ហាញការសោកស្តាយផងដែរ ដែលឡាក់គី ត្រូវគេយកចេញពីទ្រុង ដើម្បីថតផ្សព្វផ្សាយជាវីដេអូ បង្ហោះចូលក្នុងបណ្តាញសង្គមជាលក្ខណៈផ្ទាល់ខ្លួន ដោយមិនគិតពី សុខុមាលភាពរបស់ឡាក់គី។

ប្រភពដដែលអះអាងដែរថា នៅសួនសត្វភ្នំតាម៉ៅ ការផ្តល់ចំណីនិងការថែទាំសត្វ មិនថាសត្វដំរី ឬសត្វផ្សេងៗទៀតនោះទេ គឺនៅតែបន្តផ្តល់និងថែទាំជាប្រចាំតាមធម្មតា។ ឯការផ្តត់ផ្គង់ចំណី អង្គការសម្ព័ន្ធមិត្តសត្វព្រៃ គឺចំណាយប្រាក់ជាង ១៥,០០០ ដុល្លារសហរដ្ឋអាមេរិករៀងរាល់ខែ សម្រាប់តែចំណីសត្វប៉ុណ្ណោះនៅភ្នំតាម៉ៅ។ ខណៈអង្គការនេះ មានការប្តេជ្ញាចិត្តរក្សាសុខុមាលភាពរបស់សត្វដំរីទាំងអស់ ដែលកំពុងរស់នៅភ្នំតាម៉ៅ ដោយធ្វើការសហការ ជាដៃគូជាមួយក្រសួងកសិកម្ម រុក្ខាប្រមាញ់ និងនេសាទ។

គួរជម្រាបថា អង្គការសម្ព័ន្ធមិត្តសត្វព្រៃ ជាអង្គការក្រៅរដ្ឋាភិបាលអន្តរជាតិ បង្កើតឡើងដោយកញ្ញាបណ្ឌិត Suwanna Gauntlett ក្នុងគោលបំណងចុះការពារព្រៃឈើនិងសត្វព្រៃដោយផ្ទាល់ តាមរយៈកម្មវិធីអភិរក្សបែបជឿនលឿន។
អង្គការនេះផ្តល់ជំនួយផ្នែកបច្ចេកទេស និងគំនិតស៊ីជម្រៅដល់បណ្តារដ្ឋាភិបាល និងខិតខំបង្កើតឱ្យមានការឯកភាពរួម ពីភាគីពាក់ព័ន្ធក្នុងការរកបាននូវដំណោះស្រាយចំពោះការគំរាមកំហែងដល់បរិស្ថានជាច្រើនករណី រួមទាំងការជួញដូរសត្វព ការធ្វើសម្បទានដីសេដ្ឋកិច្ចសម្រាប់ចម្ការកសិឧស្សាហកម្ម និងការជីកយករ៉ែ និងការទន្ទ្រានចាប់យកដីពពីសំណាក់សហគមន៍មូលដ្ឋាន៕