ថៃ ត្រៀមស្នើទៅ Google ឲ្យយកតាមផែនទីរបស់ខ្លួនវិញ ទើបប្រាសាទតាមាន់ធំ ស្ថិតក្នុងដីថៃ 

ពេលនេះប្រទេសថៃ កំពុងត្រៀមពិភាក្សាជាមួយក្រុមហ៊ុន Google ដើម្បីស្នើឲ្យប្តូរខ្សែបន្ទាត់ព្រំដែនឲ្យដូចទៅនឹងផែនទីខ្នាត១:៥០ ០០០ ដូច្នេះទើបប្រាសាទតាមាន់ធំ ស្ថិតនៅក្នុងដីរបស់ខ្លួនវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព័ត៌មាននេះត្រូវបានផ្សាយដោយទូរទស្សន៍ប៉ុស្តិ៍លេខ៧ថៃ ហើយវាកើតឡើងបន្ទាប់ពីពលរដ្ឋថៃមួយចំនួន ក្តៅស្លឹកត្រចៀក ក្រោយឃើញ Google Map លាតត្រដាងការពិតដែលដៅទីតាំងប្រាសាទតាមាន់ធំនៅក្នុងទឹកដីនៃប្រទេសកម្ពុជា។

ជុំវិញរឿងនេះ ថៃហាក់ខឹង Google ហើយចោទថា ការដៅទីតាំងប្រាសាទតាមាន់ធំនៅក្នុងដីខ្មែ កំពុងបង្កើតបានជាព័ស្តុងតាងបំភ្លៃការពិត ធ្វើឲ្យប្រជាជននៃប្រទេសទាំងពីរ យល់ច្រឡំ។

ដូច្នេះក្រុមការងារថៃ នឹងរៀបចំដើម្បីជួបជាមួយក្រុមហ៊ុន Google ហើយបង្ហាញផែនទីលេខ L7018 ខ្នាត ១:៥០ ០០០ នេះ ដែលបណ្តាភ្នាក់ងាររដ្ឋាភិបាលថៃទាំងឡាយ កំពុងប្រើប្រាស់នាពេលបច្ចុប្បន្ន។

មុននេះ អ្នកនាំពាក្យកងទ័ពថៃឧត្តមសេនីយ៍ទោ Winthai Suvaree បានចេញមុខបោះពាក្យថា Google មិនមែនជាអ្នកសម្រេចលើតំបន់ជម្លោះនោះទេ ហើយកងទ័ពថៃ គ្មានកាតព្វកិច្ចផ្លូវច្បាប់ត្រូវធ្វើតាមការសម្រេចចិត្តរបស់ Google ឡើយ។

លើសពីនេះថៃថែមទាំងចោទ Google Earth និង Google Maps ទៀតថា គ្មានភាពត្រឹមត្រូវ ហើយទិន្នន័យរបស់ពួកគេមិនមានភាពស្របច្បាប់ទាំងកម្រិតជាតិនិងអន្តរជាតិ៕

អត្ថបទ៖ សុខ សុវណ្ណ

ចុចអាន៖ ថៃ ខឹង Google Map ពេលឃើញដៅទីតាំង ប្រាសាទតាមាន់ធំ នៅក្នុងដីខ្មែរ