គ្រោះថ្នាក់ចរាចរណ៍តាមបណ្ដោយផ្លូវជាតិលេខ៣ បណ្ដាលឱ្យមនុស្សចំនួន៦នាក់រងរបួសធ្ងន់ ស្រាល

ដំណឹងបឋម៖ ករណីគ្រោះថ្នាក់ចរាចរណ៍រវាងរថយន្តដឹកចេកទម្ងន់២.៥តោន និងរថយន្តសេរីទំនើបម៉ាក Ford Turner នៅតាមបណ្ដោយផ្លូវជាតិលេខ៣ ត្រង់ចន្លោះគីឡូម៉ែត្រលេខ៥៩ ស្ថិតនៅក្នុងភូមិសាស្ត្រ ឃុំខ្វាវ ស្រុកសំរោង ខេត្តតាកែវ។ ករណីគ្រោះថ្នាក់ចរាចរណ៍ដែលកើតឡើងនៅវេលារសៀល ថ្ងៃទី១២ ខែវិច្ឆិកា ឆ្នាំ២០២៣នេះ បណ្ដាលឱ្យមនុស្សប្រុសស្រីចំនួន៦នាក់រងរបួសស្រាល និងធ្ងន់។

បើតាមប្រភពពីប្រជាពលរដ្ឋដែលបានឃើញហេតុការណ៍ផ្ទាល់បានឱ្យដឹងថា រថយន្ដដឹកចេកស្លាកលេខ​ កែប 3A 0024 បានធ្វើដំណើរពីជើងទៅត្បូង(ទិសដៅពីភ្នំពេញមក) លុះមកដល់ចំណុចកើតហេតុ ស្រាប់តែរេចង្កូតឡើងលើទ្រូងផ្លូវមកប៉ះនឹងរថយន្តសេរីទំនើបម៉ាក Ford Turner​  ពណ៌សស្លាកលេខ ភ្នំពេញ 2 A-9710  ដែលធ្វើដំណើរពីត្បូងទៅជើង(ទិសដៅទៅភ្នំពេញ) យ៉ាងពេញទំហឹង។

យ៉ាងណានៅ វេលាម៉ោង៣៖ ៥០នាទីរសៀល សមត្ថកិច្ចជំនាញកំពុងវាស់វែង ចំណែកជនរងគ្រោះត្រូវបានបញ្ជូនទៅសង្គ្រោះតាមរយៈរថយន្តសង្គ្រោះគ្លីនិកឯកជន និងរថយន្តសង្គ្រោះរបស់មណ្ឌលសុខភាពវាលអង្គពពេល៕

ដោយ៖ង៉ិល ណារ៉ាត់