មៀនប៉ៃលិនជាង ១ពាន់តោន គ្រោងនាំចេញ​សាកល្បងទៅទីផ្សារចិន

ក្រុមហ៊ុន ពេជ្រចិន្តា បានប្រមូលទិញមៀនប៉ៃលិន បានប្រមាណជាង ១ពាន់តោនហើយ ដើម្បីត្រៀមនាំចេញទៅ​ទីផ្សារប្រទេសចិន។ ក្រុមហ៊ុនបានរៀបចំឯកសាររវាងរដ្ឋនិងរដ្ឋ រដ្ឋនិងឯកជនរួចរាល់អស់ហើយ នៅឡើយការដឹកជញ្ជូន មានភាពមានភាពស្មុគស្មាញបន្តិច។ នេះបើតាមការបញ្ជាក់របស់លោក ភត់ សុផាន់បូរី ប្រធានប្រឹក្សាភិបាល​នៃក្រុមហ៊ុនពេជ្រចិន្តា។ បន្ទាប់ពីជោគជ័យក្នុងការនាំចេញនៅចុងខែ តុលា និងដើមខែ វិច្ឆិកា ក្រុមហ៊ុននឹងបន្តនាំចេញរាប់ម៉ឺនតោនបន្ថែមទៀត ទៅទីផ្សារចិន។

លោក ភត់ សុផាន់បូរី បានប្រាប់កម្ពុជាថ្មីថា តាមគោលការណ៍ ក្រុមហ៊ុនប្រមូលទិញមៀនចំនួន ៣ខេត្តដំបូង គឺ ខេត្តប៉ៃលិន បាត់ដំបង និងបន្ទាយមានជ័យ ដើម្បីនាំចេញ ទៅប្រទេសចិន ហើយនៅពេលនេះ ក្រុមហ៊ុនប្រមូលទិញ​បានចំនួនជាង ១ពាន់តោន រួចជាស្រេច ដោយចាប់ផ្តើមទិញតាំងពីដើមខែ តុលាមក។

លោក ភត់ សុផាន់បូរី បញ្ជាក់បន្ថែមថា នៅក្នុងសប្តាហ៍ទី៤ នៃខែតុលានេះ ក្រុមហ៊ុននឹងធ្វើការនាំចេញមៀនប៉ៃលិន សាកល្បងក្នុងបរិមាណប្រហែលជា ៤០ទៅ៦០តោន ជាមុនសិន។

ក្នុងការចរចាភាគីចិន ចង់នាំចេញមៀនស្រស់ពីកម្ពុជា ក្នុងទំហំធំ ប៉ុន្តែខណៈនេះមិនទាន់អាចទៅរួច ដោយសារបញ្ហា​ដឹកជញ្ជូន។ លោក សុផាន់បូរី បានគូសបញ្ជាក់ថា ប្រសិនបើការដឹកជញ្ជូនពីកម្ពុជាទៅចិន ប្រើរយៈពេលក្រោម ១០ថ្ងៃ គឺជាការជោគជ័យ អាចនាំចេញក្នុងទំហំធំបាន។ ប៉ុន្តែប្រសិនបើការដឹកជញ្ជូនអូសបន្លាយរហូតដល់ ២០ថ្ងៃ នឹងជួបផល​វិបាកច្រើន ដោយសារមៀនអាចខូច។

ទោះយ៉ាងណា ក្រុមហ៊ុនប្តេជ្ញាថា បើសិនជាមានការបញ្ជាទិញបានពេញលេញ ការនាំចេញមិនក្រោមជាង ១ពាន់តោន ក្នុងមួយខែ។ ដោយឡែក នៅឆ្នាំដំបូងនេះ ក្រុមហ៊ុនមានគោលការណ៍នាំចេញ ៣០០ទូ(ក្នុង១ទូ ២២-២៣តោន) ក្នុងមួយឆ្នាំ ពោលគឺចាប់ផ្តើមនៅអំឡុងខែ ធ្នូ ខាងមុខ។

ចំពោះផលិតផលមៀន ដែលគ្រោងនាំចេញមានពីរប្រភេទ គឺប្រភេទស្រស់ និងដំណាប់ ហើយក្រុមហ៊ុនគ្រោងកែ​ច្នៃទៅជាប្រភេទផ្សេងៗច្រើនទៀត នៅពេលខាងមុខ។ ចំណែកតម្លៃក្រុមហ៊ុនទិញពីកសិករ ក្នុងមួយគីឡូ ៣,៣០០​រៀល-៣,៤០០រៀល ចាប់ពីខែនេះ រហូតដល់ខែ ធ្នូ។ ដោយឡែក ចាប់ពីខែ ធ្នូ ទៅដល់ខែ ឧសភា នឹងកើន​ឡើងតម្លៃ ១០ភាគរយ ពីតម្លៃដើម។

​ដោយសារទំហំនៃការនាំចេញធំ ក្រុមហ៊ុនបានរៀបចំកម្លាំងសម្រាប់ប្រមូលផលប្រមាណ ៥០០នាក់ ដើម្បីត្រៀមបេះមៀន ឱ្យទាន់តម្រូវការ។

លោក ភត់ សុផាន់បូរី បានលើកឡើងទៀតថា បច្ចុប្បន្នកសិករដាំមៀនយល់ដឹងអំពីគោលការណ៍បច្ចេកទេស និងគុណភាពផលិតបានច្បាស់លាស់ពី ៧០%-៨០% ហើយ។ ដូច្នេះមិនបារម្ភក្នុងការផលិតខ្វះតម្រូវការនោះទេ។

លោក ហ៊ុន វុត្ថា អនុប្រធានក្រុមប្រឹក្សាភិបាលសហភាពមៀនកម្ពុជា បានឱ្យដឹងថា ទីផ្សារចិន គឺមានតម្រូវការមៀនច្រើន ដូចនេះ កម្ពុជា កំពុងតែជំរុញកសិករឱ្យអនុវត្តស្តង់ដារកសិកម្មល្អ ជាពិសេសទាក់ទងនឹងភូតគាមអនាម័យ ដែលផ្តល់​ភាព​ងាយស្រួលក្នុងការនាំចេញទៅកាន់ ទីផ្សារចិនក៏ដូចជាប្រទេសផ្សេងៗទៀត។

លោក ហ៊ុន វុត្ថា បានបន្តថា មានកសិករប្រមាណជិត ៤០០នាក់ ទទួលបានការបណ្តុះបណ្តាលការដាំដុះ តាមបែបភូតគាមអនាម័យកសិកម្ម ហើយក្នុងនោះ មានកសិករចំនួន ១១០នាក់ ទទួលបានវិញ្ញាបនបត្រការ​អនុវត្តកសិកម្មល្អ (GAP)។ លោក បញ្ជាក់ថា នៅមានកសិករជាច្រើនទៀត ដែលនឹងទទួលបាន GAP នេះជាបន្តបន្ទាប់ ដើម្បីផលិតកសិផលស្របតាមស្តង់ដារគុណភាពសម្រាប់នាំចេញ។

បើតាមលោក ហ៊ុន វុត្ថា ផ្ទៃដីដាំមៀននៅខេត្តបាត់ដំបង មានប្រមាណជាង ៨ពាន់ហិកតា ខេត្តប៉ៃលិនជាង ៣ពាន់ហិកតា និងខេត្តផ្សេងៗទៀត សរុបទាំងអស់ មិនក្រោម ២ម៉ឺនហិកតានោះទេ៕ អត្ថបទ៖ នាង រតនៈ