តម្លៃផ្លែមៀនប៉ៃលិនកើនឡើងបន្តិច នៅដើមឆ្នាំនេះ

លោក ឆន សុខជា ម្ចាស់ចម្ការមៀនប៉ៃលិន នៅឃុំម៉ាឡៃ ស្រុកម៉ាឡៃ ខេត្តបន្ទាយមានជ័យបាន​ឱ្យដឹងថា កសិករអ្នកប្រមូល​ផលផ្លែមៀនប៉ៃលិនចាប់ពីខែសីហា ដល់ខែវិច្ឆិកា ឆ្នាំ ២០២៤ តម្លៃផ្លែ​មៀន​លក់​ឱ្យ​ក្រុម​ហ៊ុន​​ចិនដែលនាំចេញបាន ៣០០០ រៀល ក្នុងមួយគីឡូក្រាម បន្ទាប់​មកចាប់ពីខែ ១២ រហូតដល់មុនពេល​ចូលឆ្នាំ​ចិន​ ២០២៥ តម្លៃ ៣ ៥០០ រៀល ក្នុងមួយគីឡូក្រាម។

លោក​ សួន ជុំ អនុប្រធានសមាគមមៀនប៉ៃលិនបានលើកឡើងថា តម្លៃ ៣០០០ រៀល ក្នុងមួយ​គីឡូ​ក្រាម អាចទទួល​យកបាន ប្រសិនបើកសិករចេះថែទាំមៀនត្រូវតាមក្បួនខ្នាត​បច្ចេកទេសនោះ​គឺ​កសិករ​នឹងអាចចំណេញ។

ពលរដ្ឋអ្នកបេះមៀនប៉ៃលិននៅស្រុកម៉ាឡៃ ខេត្តបន្ទាយមានជ័យបានលើក​ឡើង​ថា ពួកគាត់​ធ្វើការនៅក្នុងចម្ការមៀនប៉ៃលិននេះ តាំងពីរោងចក្រចិន បើកមកម្លេះ ហើយការធ្វើ​ការនៅ​ក្នុង​ស្រុក គឺមានភាពងាយស្រួលជាងធ្វើការ​នៅស្រុកថៃ​ឆ្ងាយ រីឯប្រាក់កម្រៃវិញ​ក៏មិនចាញ់នៅស្រុក​ថៃដែរ អាស្រ័យលើការខិតខំប្រឹងធ្វើ ធ្វើច្រើនបានកម្រៃច្រើនទៅតាមនឹងដែរ។

យោងតាមក្រសួងពាណិជ្ជកម្ម គិតត្រឹមរយៈពេល ១១ ខែ ឆ្នាំ ២០២៤ កម្ពុជារកចំណូលបានជាង ២៧ លានដុល្លារ ពីការនាំចេញផ្លែមៀនប៉ៃលិន កើនឡើងជាង ៥០%។

នៅក្នុងឆ្នាំ ២០២៤ កម្ពុជាទទួលបានចំណូលជាង ៥ ពាន់លានដុល្លារ (៥,៣) ពីការនាំចេញកសិផលប្រមាណ ១២ លាន​តោន ទៅកាន់ ៩៥ ប្រទេស កើនឡើងជាង ៣ លានតោន ធៀប​នឹងឆ្នាំ ២០២៣។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និង​នេសាទ៕