មហាជនសាទរ ក្រោយឃើញ សាលី ស្រីមាស ធូរស្បើយ និងជោគជ័យទាំងស្រុងលើការវះកាត់ប្តូរក្រលៀនថ្មី

ជាថ្មីម្តងទៀត នាដការីរបាំ សាលី ស្រីមាស បានសម្តែងការអរគុណនិងដឹងគុណជាខ្លាំងដល់សប្បុរសជនគ្រប់រូប ពិសេសអ្នកឧកញ៉ា លាង ម៉េង សម្រាប់ការឱកាសឱ្យខ្លួនបានរស់រានបន្ត តាមរយៈការឧបត្តម្ភវះកាត់ប្តូរក្រលៀនថ្មី ក្នុងលទ្ធផជោគជ័យ ១០០%  ខណៈដំណឹងនេះ ធ្វើឱ្យមហាជនត្រេកអរ និងបង្ហាញក្តីរំភើបចិត្តជាមួយកញ្ញាផងដែរ។

នេះបើតាមការបញ្ជាក់របស់ សាលី ស្រីមាស ក្នុងវីដេអូជាង ៥នាទី ជាមួយនឹងទឹកមុខស្រស់ស្រាយ បញ្ជាក់ន័យនៃស្ថានភាពសុខភាពប្រសើរឡើងវិញ កាលពីថ្ងៃទី១០ ខែឧសភា ឆ្នាំ២០២៥។ 

ដោយក្តីអាណិតអាសូរ និងដើម្បីជាការផ្តល់ឱកាសដល់នាដការីរបាំមួយរូប អាចបន្តចូលរួមចំណែកកិច្ចការលើកស្ទួយវប្បធម៌ អ្នកឧកញ៉ា លាង ម៉េង សហស្ថាបនិកនិងជាប្រធានក្រុមអគ្គនាយកក្រុមហ៊ុន ជីបម៉ុង និងលោកជំទាវ បានសម្រេចជួយឧបត្ថម្ភថវិកាទាំងស្រុង ដើម្បីវះកាត់ដូរក្រលៀនថ្មី។

ជាក់ស្តែងបន្ទាប់ពីចាកចេញទៅព្យាបាល និងវះកាត់ក្រលៀន នៅប្រទេសឥណ្ឌា អស់រយៈពេលប្រមាណជិត ៣ខែហើយនោះ  កញ្ញា សាលី ស្រីមាស បានបង្ហោះវីដេអូបញ្ជាក់ពីស្ថានភាពជំងឺរបស់ខ្លួន។ ក្នុងនោះក៏មហាជននិងអ្នកគាំទ្របានសម្តែងក្តីរំភើបផងដែរ។ 

គួរជម្រាបថា បច្ចុប្បន្នស្ថានភាពសុខភាព កញ្ញា សាលី ស្រីមាស បានធូរស្រាលច្រើន ខណ:អ្នកគាំទ្រសង្ឃឹមថា សាលី ស្រីមាស នឹងបង្ហាញវត្តមាននៅក្នុងវិស័យសិល្ប:ឆាប់ៗនេះខាងមុខនេះ៕ អត្ថបទ៖ ចាន់រ៉ា