ព័ត៌មានជាតិ

រដូវនេះទិន្នផលមៀនប៉ៃលិន ធ្លាក់ចុះបន្តិច ក្រោយអាកាសធាតុមិនអំណោយផល

បានផុស

២ ខែ មុន

នៅ

ថ្ងៃសុក្រ ១១ មេសា ២០២៥

ដោយ

បច្ចុប្បន្ននេះការប្រមូលផលទិន្នផលមៀនប៉ៃលិន ហាក់មានការធ្លាក់ចុះខ្លាំង ដោយសារកត្តាអាកាសធាតុមិនអំណោយផលផង និងជារដូវចុងដៃផង។ នេះបើតាមការឱ្យដឹងពីលោក សួន ជុំ អនុប្រធានសមាគមមៀនប៉ៃលិន នៅរសៀលថ្ងៃទី១០ ខែមេសា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម លោក សួន ជុំ បានឱ្យដឹងថា តម្លៃមៀនបៃលិន ហាក់រៀងចង្អៀតបន្តិចនៅក្នុងចន្លោះខែធ្នូ ដល់ខែមករា ដើមឆ្នាំ២០២៥ នេះ ព្រោះមៀនជាន់គ្នាដែលធ្វើឱ្យទិន្នផលផ្លែមៀនខូចខាតច្រើន។

លោកថា មុនពេលប្រមូលផលក្រុមហ៊ុនបានចុះកិច្ចសន្យាទិញជាមួយប្រជាកសិកររួមរាល់ហើយក៏ពិតមែន ប៉ុន្តែពេលរដូវប្រមូលផលមៀនមកដល់ ហើយមៀនចាល់ច្រើន នោះក្រុមហ៊ុនទិញយកក្នុងចំនួនតិចតួចប៉ុណ្ណោះ និងទិញយកតែមៀនដែលមានគុណភាពល្អ ដែលធ្វើឱ្យកសិករប្រមូលផលមិនអស់ពីចម្ការផងដែរ។

ដោយឡែកពាក់ព័ន្ធនិងតម្លៃនៃការនាំចេញ លោក សួន ជុំ បានលើកឡើងថា «តម្លៃមៀន គឺក្រុមហ៊ុនជាអ្នកកំណត់ថ្លៃ តាំងពីដើមរដូវចន្លោះពីខែមេសា ឧសភា នៃឆ្នាំ២០២៤ មកម្ល៉េះ ដោយមានការប្រែប្រួលទៅតាមខែនីមួយៗ គឺក្រុមហ៊ុនអាចទទួលទិញក្នុងតម្លៃចន្លោះពី ៣ ពាន់រៀល, ៣ ពាន់ ៥ រយរៀល, ៤ ពាន់រៀលក្នុងមួយគីឡូក្រាម ដេញរហូតដល់ចុងរដូវនេះ»។

បើតាមអនុប្រធានសមាគមរូបនេះ បច្ចុប្បន្នទិន្នផលមៀនប៉ៃលិន ហាក់បីជាមានការថយចុះទាបបន្តិច ដោយសារតែអាកាសធាតុមិនសូវអំណោយផលក្តៅខ្លាំងពេក ដែលធ្វើឱ្យកសិករផលិតមៀនមិនសូវបានច្រើនទេ។ ជាក់ស្តែង រវាងខែមីនា មេសា និងដល់ឧសភា នេះ ទិន្នផលមៀនប៉ៃលិនដែលកសិករផលិតបាន គឺមានចំនួនតិចតួច បើប្រៀបធៀបទៅនិងរយៈពេលដូចគ្នាកាលពីឆ្នាំមុន។

លោក បានពន្យល់ថា «នៅពេលក្តៅខ្លាំងពេក កសិករមិនហ៊ានធ្វើឱ្យមានទិន្នផលមៀនទំនៅក្នុងរដូវកាលនេះទេ ព្រោះធ្លាប់មានបទពិសោធន៍កាលពីឆ្នាំកន្លងទៅដែលធ្វើឱ្យទិន្នផលមៀនប៉ៃខូច យកទៅគ្មានស្តង់ដារ ដែលធ្វើឱ្យឆ្នាំនេះចំនួនតិចជាងរាល់ដង»។

លោកថា ការទិញចូលរបស់ក្រុមហ៊ុន មានចំនួនតិចតួច ដោយសារតែអាកាសធាតុក្តៅពេកធ្វើឱ្យកសិករផលិតមៀនមិនអាចត្រូវតាមស្តង់ដារដែលក្រុមហ៊ុនតម្រូវ ព្រោះក្រុមហ៊ុនត្រូវទិញយកតែមៀនណាមានលក្ខណៈគ្រប់តាមស្តង់ដារ ទើបអាចនាំចេញទៅក្រុមប្រទេសបាន។

បច្ចុប្បន្នខេត្តប៉ៃលិន មានផ្ទៃដីដាំដុះមៀនប៉ៃលិន សរុប ៤៩២០ ហិតា ក្នុងនោះមានកសិករដាំដុះមៀនប៉ៃលិនចំនួន ៦៨៩ គ្រួសារ ដោយមានផ្ទៃដីប្រមូលផលចំនួន ៤១២០ ហិតា ដែលមានបរិមាណប្រមូលផល បានចំនួន ៦១៨០០ តោន៕