តម្លៃមាសធ្លាក់ជាគំហុក ១០០ ដុល្លារ ក្រោយអាមេរិក និងចិន​ ប្រកាសទម្លាក់ពន្ធ

តម្លៃមាសអន្តរជាតិ​បាន​ធ្លាក់ចុះជាគំហុកនារសៀលថ្ងៃចន្ទនេះ ប្រមាណ ១០០ ដុល្លារ/អោន ភ្លាមៗបន្ទាប់ពីសហរដ្ឋអាមេរិក និងចិន ប្រកាសពីការព្រមព្រៀងគ្នា​លើការទម្លាក់អត្រាពន្ធមកត្រឹមជាបណ្ដោះអាសន្ន ដែលជាសញ្ញាដ៏ធំថ្មីនៃការបន្ធូរបន្ថយភាពតានតឹងពាណិជ្ជកម្ម។

គិតត្រឹមម៉ោង ៤ និង ១១ នាទី នៅទីក្រុងហុងកុង តម្លៃមាសអន្តរជាតិ​សម្រាប់ការជួញដូរដោយផ្ទាល់ បាន​ធ្លាក់ចុះប្រមាណ ៣ ភាគរយ ឬប្រហែល ១០១ ដុល្លារ ដោយជួញដូរ ៣ ២២៦ ដុល្លារ/អោន។

ការធ្លាក់ចុះនៃតម្លៃមាសនៅពេលនេះ គឺជាប់ទាក់ទង​ទៅនឹងការសម្រេចចិត្តរបស់សហរដ្ឋអាមេរិក និងចិន​ ក្នុងការព្រមព្រៀងគ្នាទម្លាក់ពន្ធ ដោយចិន​ទម្លាក់ពន្ធលើអាមេរិក​មកត្រឹម ១០ ភាគរយ (ពី១២៥ ភាគរយ) និងអាមេរិកទម្លាក់ពន្ធលើចិន​មកត្រឹម មកត្រឹម ៣០ ភាគរយ (ពី ១៤៥ ភាគរយ) ជាបណ្ដោះអាសន្នរយៈពេល ៩០ ថ្ងៃ ក្រោយ​មន្រ្តីជាន់ខ្ពស់ទាំង ២ ជួបប្រជុំចរចាគ្នានៅទីក្រុងហ្សឺណែវ នៃប្រទេសស្វីស កាលពីថ្ងៃសៅរ៍ និងអាទិត្យ​កន្លងទៅ។

ជាធម្មតា មាសត្រូវបានគេរាប់ចាត់ទុកថាជាទ្រព្យសម្បត្តិសុវត្ថិភាព​ ដែលទទួល​បាន​ការវិនិយោគច្រើន នៅពេលមាន​ភាពតានតឹងពាណិជ្ជកម្ម និងមិនប្រាកដប្រជានយោបាយ និងសេដ្ឋកិច្ច។ ការកាត់បន្ថយហានិភ័យទាំងនេះ ធ្វើឱ្យភាពទាក់ទាញរបស់មាសធ្លាក់ចុះ ហើយទម្លាក់តម្លៃទៅតាមនោះដែរ៕