ការនាំចេញផ្លែមៀន សម្រេចបានទឹកប្រាក់ជិត ២៨ លានដុល្លារ

គិតត្រឹមរយៈពេល ១១ ខែ ឆ្នាំ ២០២៤ កម្ពុជានាំចេញផ្លែមៀនសម្រេចបាននូវទំហំទឹកប្រាក់ជិត ២៨ លានដុល្លារ កើនឡើងជាង ៥០% ធៀបនឹងរយៈពេលដូចគ្នាលកាលពីឆ្នាំមុន។ នេះបើយោង​តាម​របាយការណ៍របស់ក្រសួងពាណិជ្ជកម្ម។

លោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តប៉ៃលិនប្រាប់កម្ពុជាថ្មីថា ក្រុមហ៊ុននាំចេញផ្លែមៀន​ប៉ៃលិនបន្តទិញផ្លែមៀនពីកសិករក្នុងតម្លៃ ៣០០០ រៀល ក្នុងមួយ​គីឡូ​ក្រាម​ ខណៈការនាំចេញទៅចិនមានកំណើន។

លោក សាយ សុផាត បានបញ្ជាក់ថា តម្លៃផ្លែមៀនប៉ៃលិននឹងឡើងដល់ ៣ ៥០០ រៀល ក្នុងមួយ​គីឡូក្រាម ​​នៅខែ​មករា ឆ្នាំ ២០២៥ ខាងមុខនេះ ខណៈស្ថានភាពទិន្នផល និងការនាំ​ចេញ​ទៅ​ប្រទេស​ចិនមានភាពល្អប្រសើរនៅរដូវប្រមូលផលឆ្នាំនេះ។

លោក​ សួន ជុំ អនុប្រធានសមាគមមៀនប៉ៃលិនបានលើកឡើងថា តម្លៃ ៣០០០ រៀល ក្នុងមួយ​គីឡូ​ក្រាម អាចទទួលយកបាន ប្រសិនបើកសិករចេះថែទាំមៀនត្រូវតាមក្បួនខ្នាត​បច្ចេកទេសនោះ​គឺ​កសិករ​នឹងអាចចំណេញ៕

អត្ថបទ៖ ឡេង ដេត