ឥណ្ឌា ដាក់អ្នកជំងឺកូវីដ ដេកក្រោមដើមស្តៅដើម្បីស្រូបអុកស៊ីសែន (មានវីដេអូ)

ក្នុងភូមិមួយនៅភាគខាងជើងប្រទេសឥណ្ឌា ដែលរងការវាយប្រហារដោយរោគរាតត្បាតកូវីដ-១៩ អ្នកជំងឺបានដេកលើប៉ៅអីនៅក្រោមដើមឈើ សេរ៉ូមព្យួរនៅមែកឈើ រីឯសឺរ៉ាំងនិងកញ្ចប់ថ្នាំ រាយប៉ាយនៅពាសពេញដី។

មិនមានគ្រូពេទ្យឬមណ្ឌលសុខភាពទេនៅតំបន់ Mewla Gopalgarh ក្នុងរដ្ឋដែលមានប្រជាជនច្រើនបំផុត Uttar Pradesh របស់ប្រទេសឥណ្ឌា។ មានមន្ទីរពេទ្យរដ្ឋតែមួយគត់នៅក្បែរនោះ ប៉ុន្តែវាមិនមានគ្រែដាក់ទេ ហើយអ្នកភូមិនិយាយថា ពួកគេមិនមានលុយចូលគ្លីនិកឯកជនបានឡើយ។

ផ្ទុយទៅវិញ ពេទ្យតាមភូមិបានបង្កើតគ្លីនិកនៅទីវាលមួយកន្លែង ដែលនៅទីនោះ ពួកគេបានចែកចាយសេរ៉ូម និងឱសថដទៃទៀតដល់អ្នកជំងឺដែលមានរោគសញ្ញាកូវីដ-១៩។ អ្នកខ្លះជឿថា ការដេកនៅក្រោមដើមស្តៅ នឹងបង្កើនកម្រិតអុកស៊ីសែនរបស់ពួកគេ។

ទោះបីជាយ៉ាងណាក៏ដោយ មិនមានមូលដ្ឋានវិទ្យាសាស្ត្រសម្រាប់ជំនឿនេះ ឬសម្រាប់វិធីព្យាបាលតាមបែបបុរាណផ្សេងទៀតនោះទេ។

លោក Sanjay Singh ដែលឪពុកអាយុ៧៤ឆ្នាំរបស់លោក បានទទួលមរណភាពកាលពីប៉ុន្មានថ្ងៃមុនបន្ទាប់ពីមានរោគសញ្ញាផ្តាសាយបាននិយាយថា “នៅពេលមនុស្សពិបាកដកដង្ហើម ពួកគេត្រូវតែចូលក្រោមដើមឈើដើម្បីស្រូប និងបង្កើនកម្រិតអុកស៊ីសែនរបស់ពួកគេ”។ លោក Singh បន្តថា ឪពុករបស់គាត់មិនត្រូវបានធ្វើតេស្តទេ ហើយបានស្លាប់ក្នុងរយៈពេលពីរថ្ងៃ។

រលកទី២នៃការឆ្លងរោគដ៏សាហាវរបស់ឥណ្ឌា កំពុងវាយប្រហារតំបន់ដាច់ស្រយាលជនបទដ៏ធំល្វឹងល្វើយរបស់ប្រទេសនេះ ដែលប្រព័ន្ធថែរក្សាសុខភាពនៅទីនោះមានភាពទន់ខ្សោយ។

លោកនាយករដ្ឋមន្រ្តី Narendra Modi បាននិយាយក្នុងសុន្ទរកថាមួយកាលពីសប្តាហ៍មុនថា ជំងឺរាតត្បាតកំពុងរាលដាលយ៉ាងលឿននៅតាមភូមិ និងបានជំរុញឲ្យប្រជាជនកុំព្រងើយកន្តើយនឹងរោគសញ្ញានេះ៕

សូមទស្សនាវីដេអូ៖ 

ប្រែសម្រួលដោយ៖ Vann Vann

ប្រភព៖ Reuters

ចុចអាន៖ ការសិក្សាបឋម៖ វ៉ាក់សាំង ការពារមិនឲ្យឆ្លងវីរុសបំប្លែងខ្លួនឥណ្ឌា សឹង១០០ភាគរយ