ឆេះរោងចក្រធំពីរនៅភាគខាងត្បូងប្រទេសឥណ្ឌាសម្លាប់មនុស្សជិត៥០នាក់

ហេតុការណ៍ផ្ទុះ និងឆេះរោងចក្រធំៗចំនួនពីរដ៏សាហាវនៅភាគខាងត្បូងប្រទេសឥណ្ឌា បានឆក់យកជីវិតមនុស្សយ៉ាងហោចណាស់ ៤៧នាក់និងរបួសជាង ៤០នាក់។ នេះបើយោងតាមការចេញផ្សាយរបស់សារព័ត៌មាន​ CNN កាលពី​ថ្ងៃទី០១ខែកក្កដា។

ហេតុការណ៍ទីមួយគឺការ​ផ្ទុះរោងចក្រគីមីគ្រប់គ្រងដោយក្រុមហ៊ុន Sigachi Industries នៅរដ្ឋ Telangana ភាគខាងត្បូងប្រទេសឥណ្ឌា បានសម្លាប់មនុស្សយ៉ាងហោចណាស់ ៣៩ នាក់ និង៣៤ នាក់ផ្សេងទៀតរងរបួស។

ឧបទ្ទវហេតុ​​ដ៏សាហាវនេះ បាន​កើត​ឡើង​កាល​ពី​ថ្ងៃ​ចន្ទ ដែល​មាន​កម្មករ​ជាង ១៤០នាក់​នៅ​ក្នុងរោងចក្រ។ ប្រតិបត្តិការជួយសង្គ្រោះ បានបន្តរហូតដល់ថ្ងៃអង្គារ ខណៈមនុស្ស២៥នាក់ក្នុងចំណោមអ្នកស្លាប់មិនទាន់ត្រូវបានកំណត់អត្តសញ្ញាណនៅឡើយ។ មកដល់ពេលនេះ អាជ្ញាធរ​បាន​បើក​ការ​ស៊ើប​អង្កេត​ ដោយ​រដ្ឋាភិបាលឥណ្ឌាតែងតាំង​គណៈកម្មាធិកា​រ​៥​រូប​ដើម្បី​ស្វែងរក​មូលហេតុដែលបណ្ដាលឲ្យមានសោកនាដកម្មនេះ។

ក្រុមហ៊ុនបានផ្អាកប្រតិបត្តិការនៅរោងចក្ររយៈពេល៩០ ថ្ងៃ ដោយសារការខូចខាតរចនាសម្ព័ន្ធធ្ងន់ធ្ងរ។ ក្រុមហ៊ុន Sigachi Industries ដែលផលិតមីក្រូគ្រីស្តាល់សែលុយឡូស (MCC) សម្រាប់ប្រើក្នុងឱសថ គ្រឿងសម្អាង និងផលិតផលម្ហូបអាហារ បានរាយការណ៍ថា រោងចក្រនេះរួមចំណែកដល់សមត្ថភាពផលិតច្រើនជាងមួយភាគបួន។ ភាគហ៊ុនរបស់ក្រុមហ៊ុនបានធ្លាក់ចុះ ៨% បន្ទាប់ពីឧប្បត្តិហេតុនេះភ្លាមៗផងដែរ។

ចំណែកនៅក្នុងឧប្បត្តិហេតុដាច់ដោយឡែកមួយទៀតកាលពីថ្ងៃអង្គារ អគ្គិភ័យមួយផ្សេងទៀតបានផ្ទុះឡើងនៅរោងចក្រផលិតកាំជ្រួចក្នុងទីក្រុង Sivakasi រដ្ឋ Tamil Nadu ដោយបានសម្លាប់មនុស្ស៨នាក់ និងរបួស៥នាក់។ ទីក្រុង Sivakasi ត្រូវបានគេស្គាល់ថាជាឧស្សាហកម្មកាំជ្រួចមានប្រវត្តិដ៏យូរលង់ណាស់មកហើយ និងតែងតែមានសោកនាដកម្មទាក់ទងនឹងអគ្គិភ័យស្រដៀងគ្នានេះ។

គួរបញ្ជាក់ថា ឧប្បត្តិហេតុទាំងពីរនេះបានធ្វើឱ្យមានការព្រួយបារម្ភជាថ្មីអំពីស្តង់ដារសុវត្ថិភាពឧស្សាហកម្មនៅក្នុងមជ្ឈមណ្ឌលផលិតកម្មរបស់ប្រទេសឥណ្ឌា៕

អត្ថបទ៖ ប៊ុន សុភាព