សាឡាត់ ស្រីឡាង ព្រមានផ្លូវច្បាប់ចំពោះបុគ្គលម្នាក់ ដែលចោទថា នាងជាស្រីលក់ខ្លួន

តារាសម្ដែងកញ្ញា សាឡាត់ ស្រីឡាង បានផ្ទុះប្រតិកម្ម និងកំហឹងខ្លាំងៗលើបុគ្គលម្នាក់ដែលប្រើពាក្យសម្តីជេរប្រមាថធ្ងន់ៗចំពោះកិត្តិយសថ្លៃថ្នូរនាងដែលជាស្ត្រី។ មិនតែប៉ុណ្ណោះ ស្រីឡាង ក៏ព្រមានចាត់វិធានការផ្លូវច្បាប់លើជននោះទៀតផង។

យោងតាមភស្តុតាងដែលត្រូវបានតារាស្រី សាឡាត់ ស្រឡាង បង្ហោះនៅលើបណ្តាញសង្គមហ្វេសប៊ុកគេឃើញថា បុគ្គលរូបនោះបានចូលទៅខមិនជេរប្រមាថដល់ម្តាយរបស់នាង និងថែមទាំងចោទប្រកាន់ទៅលើ ស្រីឡាង ថាជាស្រីលក់ខ្លួន និងដើរបោកប្រាស់លុយគេថែមទៀត។ ប៉ុន្តែចំណុចនេះ ត្រូវបាន សាឡាត់ ស្រីឡាង បដិសេធន៍ទាំងស្រុង។

តារារូបស្រស់កញ្ញា សាឡាត់ ស្រីឡាង បានរៀបរាប់ដោយមិនសប្បាយចិត្តបង្ហាញអ្នកគាំទ្រថា «បងប្អូនមានអ្នកស្គាល់គាត់ ឬផ្ទះគាត់ទេ? ខ្ញុំមិនដឹងថាមូលហេតុអីបានគាត់ចូលមកជេរខ្ញុំបែបនឹងទេ ខ្ញុំមិនបានបោក ឬធ្វើអ្វីប៉ះពាល់ដល់គាត់ទេ ហើយខ្ញុំក៏មិនឱ្យមនុស្សដែលទំនេរមាត់រួចខ្លួនដោយស្រួលដែរ»។

តារាសម្តែងស្រី សាឡាត់ ស្រីឡាង ក៏អះអាងបន្ថែមថា នាងមិនបានទៅឆបោក ឬធ្វើអ្វីប៉ះពាល់ដល់បុគ្គលរូបនោះឡើយ។ ប៉ុន្តែហេតុអ្វីបានជាបុគ្គលរូបនោះគឃ្លើនហ៊ានជេរប្រមាថដល់នាង និងអ្នកមានគុណ(ម្តាយ)ដូច្នេះ។

កម្ពុជាថ្មី មិនទាន់អាចទាក់ទងដើម្បីស្វែងរកការសួរនាំបន្ថែមពីកញ្ញា សាឡាត់ ស្រីឡាង បានទេ នៅរសៀលថ្ងៃទី១០ ខែមិថុនា ឆ្នាំ២០២២នេះ៕

អត្ថបទ៖ ចាន់រ៉ា