ព័ត៌មានជាតិ

ខេត្តបាត់ដំបងនឹងរៀងចំព្រឹត្តិការណ៍ពិព័រណ៍ផ្លែឈើនៅចុងខែនេះ

បានផុស

១២ ខែ មុន

នៅ

ថ្ងៃព្រហស្បតិ៍ ១៩ មិថុនា ២០២៥

ដោយ

លោក ឈឹម វជិរា ប្រធានមន្ទីរកសិកម្មខេត្តបាត់ដំបង បានឱ្យដឹងថា នៅក្នុងព្រឹត្តិការណ៍ពិព័រណ៍ផ្លែឈើ ជាពិសេសប៊ូហ្វេទុរេន ដែលនឹងឈានចូលមកដល់នាពេលឆាប់ៗខាងមុខនេះ គឺមានម្ចាស់ចម្ការធំៗ ចំនួន ៥ ដែលនឹងចូលខ្លួនមកតាំងបង្ហាញផលិតផលផ្លែឈើរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាប់«កម្ពុជាថ្មី» នៅព្រឹកថ្ងៃទី១៩ ខែមិថុនា នេះ លោកឈឹម វជិរា បានលើកឡើងថា ក្រោមការគិតគូររបស់រដ្ឋបាលខេត្ត ចាប់ពីថ្ងៃទី២៧ ដល់ថ្ងៃទី២៩ខែមិថុនានេះ នឹងមានការរៀបចំជាប៊ូហ្វេទុរេន។ ដោយឡែក ចាប់ពីថ្ងៃទី២៧ ដល់ថ្ងៃទី៣ មានការរៀបចំស្តង់ជាភូមិមួយ ផលិតផលមួយ សម្រាប់ឱ្យប្រជាកសិករដែលជាម្ចាស់ចម្ការ ទុរេន សាវម៉ាវ ប័រ មង្ឃុត ម្នាស់ ក្រូចពោធិ៍សាត់ ក្រូចថ្លុង និងផលិតផលផ្លែឈើដែលល្បីល្បាញនៅក្នុងខេត្តបាត់ដំបង និងស្រុកសំឡូត ជាដើមនោះ គឺអាចនឹងមានចំនួនលើស ២០ស្តង់ ដោយបច្ចុប្បន្នមានចំនួន ១៩ស្តង់ហើយដែលចូលខ្លួនដាក់តាំងបង្ហាញផលិតផលរបស់ខ្លួន។

ពាក់ព័ន្ធនឹងការរៀបចំនេះទៀតសោទ គឺធ្វើឡើងក្នុងគោលបំណង ទី១ ដើម្បីបង្ហាញថា ផ្លែឈើនៅក្នុងខេត្តបាត់ដំបង បានឈានចូលដល់រដូវប្រមូលផលហើយ ដែលមានទុរេន សាវម៉ាវ មង្ឃុត ក្រូចពោធិ៍សាត់ ផ្លែប័រ ជាដើម។ មិនតែប៉ុណ្ណោះ ព្រឹត្តិការនេះក៏នឹងអាចទាក់ទាញភ្ញៀវទេសចរជាតិ និងអន្តរជាតិ ជាពិសេសបង្កើនទំនុកចិត្តដល់ពលរដ្ឋក្នុងខេត្ត នៅក្នុងបរិភោគផលិតផលរបស់ខ្មែរដែលមានការទទួលខុសត្រូវពីអង្គភាពជំនាញក្រោមឱវាទរបស់ខេត្តបាត់ដំបង។

«ជាងនេះទៀត ក៏អាចជួយកាត់បន្ថយនូវការក្លែងបន្លំផលិតផលមួយចំនួន ព្រោះពីមុនមកលោកឃើញថា ទុរេនសំឡូតមិនទាន់ដល់រដូវប្រមូលផលផង ប៉ុន្តែនៅតាមផ្លូវ និងទីផ្សារមួយចំនួន មានការដាក់លក់ថាជាទុរេនសំឡូត ឬក៏សាវម៉ាវ ផងដែរ»។ លោក ឈឹម វជិរា បន្ថែមបែបនេះ។

ទន្ទឹមនេះ លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង បានឱ្យដឹងដែរថា សម្រាប់ព្រឹត្តិការនេះ លោករំពឹងថា នឹងមានភាពទាក់ទាញភ្ញៀវទេសចរជាតិ និងអន្តរជាតិច្រើនបន្ថែមទៀតចូលមកលេងខេត្តបាត់ដំបង។

មិនតែប៉ុណ្ណោះ ស្របពេលដែលមិនទាន់មានភាពប្រសើរឡើងនៅតាមច្រកព្រំដែនកម្ពុជា-ថៃ ដែលបិទលើការនាំ ចូលបន្លែ និងផ្លែឈើ ដែលនេះក៏ជាឱកាសមួយសម្រាប់កសិករលក់នូវផលិតផលដាំដុះនៅក្នុងខេត្តបាត់ដំបងទៅកាន់ទីផ្សារនានា ដោយមិនមានការប្រកួតប្រជែងពីប្រទេសជិតខាង។

ជាងនេះទៀត ក៏នឹងអាចបង្ហាញទៅកាន់សាធារណៈជន ថាតើបាត់ដំបងមានសមត្ថភាពអាចផលិតបានបន្លែ និងផ្លែឈើអ្វីខ្លះ ព្រោះនៅក្នុងព្រឹត្តិការនេះមិនមែនផ្តោតទៅលើតែផ្លែឈើមួយមុខនោះទេ គឺមានទាំងបង្អែម បន្លែ ជាច្រើនមុខដែលផលិតដោយកសិករខ្មែរ ដូច្នេះព្រឹត្តិការនេះនឹងបង្ហាញឱ្យសាធារណៈជនដឹងថា យើងមានភាពខ្លាំងប៉ុណ្ណានៅក្នុងការផលិតបន្លែ ផ្លែឈើ អាចទទួលទានដោយខ្លួនឯងបាន។

លោក ហម អរុណ បានបន្ថែមទៀតថា ព្រឹត្តិការណ៍នេះ ក៏នឹងចូលរួមចំណែកលើកកម្ពស់បន្លែ ផ្លែឈើ ផលិតផលក្នុងស្រុកជាពិសេសខេត្តបាត់ដំបង ជម្រុញការផ្សព្វផ្សាយ ផ្តល់ទំនុកចិត្តដល់អ្នកប្រើប្រាស់ លើកទឹកចិត្តដល់ប្រជាកសិករខេត្ត លើកកម្ពស់កេរ្តិ៍ឈ្មោះខេត្ត បង្កើនទាពទាក់ទាញទេសចរ និងរួមចំណែកលើកកម្ពស់យុទ្ធនាការ ទេសចរណ៍ក្នុងរដូវកាលបៃតង ដែលជាគំនិតផ្តួចផ្តើមដ៏ខ្ពង់ខ្ពស់របស់ លោក ហួត ហាក់ រដ្ឋមន្រ្តីក្រសួងទេសចរណ៍។

សូមជម្រាបថា រយៈពេល ៥ ខែ ដើមឆ្នាំ២០២៥ នេះ មានភ្ញៀវទេសចរជាតិ និងអន្តរជាតិ ចូលមកកាន់ខេត្តបាត់ដំបងសរុបចំនួន ២៩៣,៣៤៣ នាក់ ក្នុងនោះមាន ភ្ញៀវជាតិចំនួន ២៧៦ ៨៤០ នាក់ និងអន្តរជាតិប្រមាណ ១៦៥ ០៣ នាក់ផងដែរ៕

ដោយ៖ ឌិន ថារី

Related Topics:ខេត្តបាត់ដំបង លោក ហម អរុណ លោក ឈឹម វជិរា

ព័ត៌មានអន្ដរជាតិ២ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា