អគ្គនាយកអន្តោប្រវេសន៍ រំលឹកកម្លាំងច្រកព្រំដែនបន្តសម្រួលការចេញចូលដល់ពលរដ្ឋឱ្យបានល្អ

អគ្គនាយកអន្តោប្រវេសន៍ ឧត្តមសេនីយ៍ឯក សុខ វាសនា បានក្រើនរំលឹកដល់កងកម្លាំងនៅតាមច្រកទ្វារព្រំដែនបន្តជួយសម្របសម្រួលដំណើរចេញចូលរបស់ប្រជាពលរដ្ឋឱ្យបានល្អ ចៀសវាងការកកស្ទះ។

ការក្រើនរំលឹករបស់អគ្គនាយកអន្តោប្រវេសន៍ បានធ្វើឡើងនៅរសៀលថ្ងៃទី២០ ខែមិថុនា ឆ្នាំ២០២៥ ក្នុងគ្រាដែលឧត្តមសេនីយ៍ឯក សុខ វាសនា បានចុះសួរសុខទុក្ខកកងកម្លាំងនគរបាលអន្តោប្រវេសន៍នៅប៉ុស្តិ៍នគរបាលច្រកទ្វារព្រំដែនអន្តរជាតិដូង និងប៉ុស្តិ៍នគរបាលច្រកទ្វារព្រំដែនអន្តរជាតិភ្នំដី។

បន្ទាប់ពីបានអញ្ជើញចុះសួរសុខទុក្ខកងកម្លាំងកងវរសេនាតូចនគរបាលការពារព្រំដែនដែលកំពុងឈរជើងការពារនៅតាមបន្ទាត់ព្រំដែន ក្នុងភូមិសាស្ត្រខេត្តបាត់ដំបង និងប៉ៃលិនរួចមក ឧត្តមសេនីយ៍ឯក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍ បានបន្តអញ្ជើញចុះសួរសុខទុក្ខកងកម្លាំងនគរបាលអន្តោប្រវេសន៍ នៅប៉ុស្តិ៍នគរបាលច្រកទ្វារព្រំដែនអន្តរជាតិដូង និងប៉ុស្តិ៍នគរបាលច្រកទ្វារព្រំដែនអន្តរជាតិភ្នំដី។

ឱកាសចុះពិនិត្យនៅប៉ុស្តិ៍នគរបាលច្រកទ្វារព្រំដែនអន្តរជាតិទាំងពីរនេះ អគ្គនាយកអន្តោប្រវេសន៍ បានថ្លែងកោតសរសើរ និងលើកទឹកចិត្តដល់កងកម្លាំងដែលបានបំពេញភារកិច្ចរបស់ខ្លួនក្នុងការការពារបូរណភាពទឹកដី រក្សាសុវត្ថិភាព សន្តិសុខ និងបន្តសម្របសម្រួលការងារជូនប្រជាពលរដ្ឋដែលធ្វើដំណើរចូល-ចេញ បានយ៉ាងល្អប្រសើរ។

លោកឧត្តមសេនីយ៍ឯក ក៏បាននាំនូវការផ្ដាំផ្ញើសួរសុខទុក្ខពីសំណាក់ លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចំពោះកងកម្លាំងនគរបាលអន្តោប្រវេសន៍ ដែលឈរជើងតាមបន្ទាត់ព្រំដែន ហើយបានរំលឹកកម្លាំងឱ្យយកចិត្តថែរក្សាសុខភាព និងបង្កើនការប្រុងប្រយ័ត្នខ្ពស់ និងត្រៀមលក្ខណៈឱ្យបានជាប់ជាប្រចាំសម្រាប់ករណីចាំបាច់ណាមួយកើតឡើង៕