ព័ត៌មានជាតិ
ខេត្តបាត់ដំបង ពុំមានរថយន្តចាំដឹកពលករនៅព្រំដែនឡើយ
មួយរយៈនេះ តាំងតែប្រមុខរាជរដ្ឋាភិបាល បានអំពាវនាវឲ្យពលករខ្មែរដែលបម្រើការនៅក្នុងប្រទេសថៃ ឆាប់រួសរាន់វិលត្រឡប់មកកាន់ស្រុកកំណើតវិញ ដោយឱកាសការងារក្នុងប្រទេសកម្ពុជាកំពុងសម្បូរនោះ គេសង្កេតឃើញមានពលករខ្មែរជាច្រើនកំពុងសម្រុកចេញតាមច្រកអន្តរជាតិនីមួយៗ ស្ថិតតាមបណ្ដោយព្រំដែនខេត្តបាត់ដំបង ពិសេសច្រកអន្តរជាតិដូងតែម្ដង ដែលជាប់ព្រំប្រទល់ជាមួយនឹងខេត្តចន្ទ័បូរី។
ទន្ទឹមការអំពាវនាវរបស់ប្រមុខរាជរដ្ឋាភិបាល សម្តេច ក៏បានបញ្ជាក់ទៅកាន់បណ្ដាខេត្តមួយចំនួនដែលមានព្រំប្រទល់ជាប់នឹងប្រទេសថៃ ត្រូវត្រៀមរថយន្តចាំទទួលពលករវិលចូលមកកាន់កម្ពុជា ដើម្បីដឹក និងជូនពួកគាត់ ឲ្យដល់គោលដៅក្នុងការរកការងារធ្វើនៅក្នុងប្រទេសមុនពេលប្រទេសថៃ ដេញពួកគាត់។
នៅក្នុងរយៈពេលប៉ុន្មានថ្ងៃចុងក្រោយនេះ គេសង្កេតឃើញថា នៅតាមបណ្ដាច្រកអន្តរជាតិចំនួនពីរ គឺ ច្រកអន្តរជាតិដូង ដែលស្ថិតក្នុងស្រុកកំរៀង និងច្រកអន្តរជាតិភ្នំដី ស្ថិតក្នុងស្រុកសំពៅលូន ក្នុងភូមិសាស្ត្រទឹកដីខេត្តបាត់ដំបង គឺពុំមានឃើញរថយន្តក្រុងរបស់រដ្ឋបាលខេត្តទៅចាំទទួលដឹកពលករ វិលត្រឡប់ចេញពីប្រទេសថៃមកស្រុកកំណើតសោះឡើយ ដោយមានតែតាក់ស៊ីប៉ុណ្ណោះចាំទទួលពលករ។
ជុំវិញបញ្ហានេះ កម្ពុជាថ្មី បានធ្វើការសាកសួរតាមរយៈទូរសព្ទទៅ លោក សឿម ប៊ុនរិទ្ធ អភិបាលរងខេត្ត ដើម្បីចង់ដឹងអំពីរថយន្តក្រុងដែលកន្លងមករដ្ឋបាលខេត្តទទួលបានជាច្រើនគ្រឿង ស្តុកទុកក្នុងបរិវេណសាលាខេត្ត ដើម្បីអន្តរាគមន៍ និងដឹកបញ្ជូនពលរដ្ឋក្នុងពិធីបុណ្យចូលឆ្នាំ ឬភ្ជុំបិណ្ឌ ទៅកាន់ស្រុកកំណើតដោយមិនគិតថ្លៃ ដោយលោកបានបញ្ជាក់ថា រថយន្តទាំងនោះ រដ្ឋបាលខេត្ត បានបែងចែកទៅតាមមន្ទីរ និងអង្គភាពជំនាញអស់ទៅហើយ សល់តែបន្តិចបន្តួចប៉ុណ្ណោះសម្រាប់ប្រើប្រាស់នៅក្នុងរដ្ឋបាលខេត្ត។
ដោយឡែក លោក មាស ដារ៉ា ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តបាត់ដំបង បានលើកឡើងថា មន្ទីរ ពុំមានរថយន្តក្រុងសម្រាប់បញ្ជូនទៅដឹកពលករតាមបន្ទាត់ព្រំដែនកម្ពុជា-ថៃ ឡើយ។ មន្ទីរ មានតែការដំឡើងរោងជាច្រើនខ្នងក្នុងបរិវេណចំណតរថយន្តច្រកអន្តរជាតិដូង ដើម្បីឲ្យពលករដែលធ្វើដំណើរចេញពីព្រំដែនមកសម្រាកនៅទីនោះជាបណ្ដោះអាសន្នតែប៉ុណ្ណោះ ដោយឡែកការធ្វើដំណើរទៅកាន់ស្រុកកំណើត ពួកគាត់ជិះតាក់ស៊ីដោយខ្លួនឯង។
កន្លងទៅថ្មីៗ នេះ បើតាមការលើកឡើងពីប្រមុខ នៃរាជរដ្ឋាភិបាល គឺបានបញ្ជាឲ្យខេត្តដែលស្ថិតនៅតាមបណ្ដោយព្រំដែនថៃ ត្រូវត្រៀមលក្ខណៈរថយន្តសម្រាប់ដឹកពលករដោយឥតគិតថ្លៃទៅកាន់ស្រុកកំណើតក្នុងការស្វែងរកការងារធ្វើក្នុងស្រុក។ ផ្ទុយទៅវិញ មួយរយៈនេះ ខណៈដែលពលករកំពុងសម្រុកចេញពីប្រទេសថៃ គឺ ត្រូវរករថយន្តជិះដោយខ្លួនឯង ដោយពុំមានរថយន្តក្រុងរបស់រដ្ឋបាលខេត្តបាត់ដំបងចាំដឹកនៅឡើយ។ ដោយឡែក ច្រកអន្តរជាតិដូង នៅព្រឹកថ្ងៃទី ១៦ មិថុនា នេះ នៅតែបន្តបិទជាបន្តទៀត ដោយបើកតែច្រកថ្មើរជើងតែប៉ុណ្ណោះ៕
អត្ថបទ ៖ សោ និយមរ័ត្ន
-
ព័ត៌មានអន្ដរជាតិ១៦ ម៉ោង agoអស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ
-
សេដ្ឋកិច្ច៣ ថ្ងៃ agoធនាគារ ARDB ចាក់បញ្ចូលទុនលើស្វាយចន្ទី និងដំឡូងមី
-
ព័ត៌មានជាតិ១ សប្តាហ៍ agoរដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ
-
កីឡា៤ ថ្ងៃ agoមូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង
-
ព័ត៌មានអន្ដរជាតិ៧ ថ្ងៃ agoអ៊ីរ៉ង់ បើកច្រកចូលរូងភ្នំ ផ្ទុកមីស៊ីលសម្ងាត់របស់ខ្លួនឡើងវិញ ទោះរងការវាយប្រហារយ៉ាងដំណំ
-
សេចក្ដីជូនដំណឹង២ ថ្ងៃ agoក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា
-
ព័ត៌មានអន្ដរជាតិ១ សប្តាហ៍ agoរដ្ឋមន្ត្រីការពារជាតិជប៉ុន បដិសេធការចោទប្រកាន់របស់ចិន អំពីការវិលទៅរកយោធានិយម
-
សេដ្ឋកិច្ច៦ ថ្ងៃ agoតម្លៃប្រេងលក់រាយធ្លាក់ចុះក្រោម ៥០០០ រៀល មួយលីត្រ