គណៈកម្មការព្រំដែនកម្ពុជា-វៀតណាម នឹងបើកកិច្ចប្រជុំក្នុងខែកក្កដា ដើម្បីដោះស្រាយបោះ​បង្គោលដែលនៅសេសសល់ ១៦%ទៀត

ស្របពេលដែលជម្លោះព្រំដែនកម្ពុជា-ថៃ កំពុងឡើងកម្តៅ គណៈកម្មការចម្រុះព្រំដែនកម្ពុជា-វៀតណាម នឹងបើកកិច្ចប្រជុំមួយនៅខែកក្កដា ខាងមុខនេះ ដើម្បីជំរុញការបោះបង្គោលព្រំដែនដែលនៅសេសសល់ ១៦ % ទៀត។

អញ្ជើញជាអធិបតីក្នុងពិធីខួបអនុស្សាវរីយ៍លើកទី៤៨ ទិវានៃការចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧ – ២០ មិថុនា ២០២៥) នៅខេត្តត្បូងឃ្មុំ លោក ទៀ សីហា​ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានថ្លែងឱ្យដឹងថា ក្រោមកិច្ចខិតខំប្រឹងប្រែងរួមគ្នា តាមរយៈគណៈកម្មការចម្រុះកម្ពុជា-វៀតណាម ភាគីទាំងពីរបានបញ្ចប់ការបោះបង្គោលព្រំដែនបានរហូតដល់ ៨៤ % ហើយ នៅសេសសល់តែ​១៦ % ទៀត ប៉ុណ្ណោះ។ លោកថា ជាក់ស្តែងនៅថ្ងៃទី០​៥ដល់ថ្ងៃទី០​៩ ខែកក្កដា ឆ្នាំ ២០២៥ ខាងមុខនេះ ក្រុមការងារនៃគណកម្មការចម្រុះព្រំដែនកម្ពុជា និងវៀតណាម (JBC) នឹងរៀបចំកិច្ចប្រជុំមួយនៅឯប្រទេសវៀតណាម ដើម្បីដោះស្រាយបញ្ហានេះ។

លោកបញ្ជាក់ថា៖«ខ្ញុំមានជំនឿយ៉ាងមុតមាំថា ប្រទេសយើងទាំងពីរនឹងកាន់តែជំរុញទំនាក់ទំនងសាមគ្គីភាព និងសហប្រតិបត្តិការគ្រប់ជ្រុងជ្រោយដ៏ល្អប្រពៃបន្ថែមទៀត ជាពិសេសជំរុញការដោះស្រាយបញ្ហាព្រំដែន ដែលនៅសេសសល់ ឱ្យបានឆាប់រហ័សដើម្បីប្រែក្លាយតំបន់ព្រំដែន ទៅជាតំបន់សន្តិភាព មិត្តភាព កិច្ចសហប្រតិបត្តិការ និងការអភិវឌ្ឍន៍»។​

លោកបន្ថែមថា​ ចំពោះកិច្ចសហប្រតិបត្តិការទ្វេភាគី កម្ពុជា-វៀតណាម មានវឌ្ឍនភាព ប្រកបដោយផ្លែផ្កា ទំនាក់ទំនងយ៉ាងជិតស្និទ និងគ្រប់ជ្រុងជ្រោយនាំមកនូវផលប្រយោជន៍យ៉ាងច្រើន ដល់កងទ័ពប្រទេសទាំងពីរ តាមរយៈការផ្លាស់ប្តូរគណៈប្រតិភូយោធាគ្រប់រូបភាព គ្រប់មធ្យោបាយ និងទំនាក់ទំនងយន្តការ កិច្ចសហប្រតិបត្តិការទ្វេភាគី ប្រកបដោយប្រសិទ្ធភាព។

បើតាមលោក ទៀ សីហា កម្ពុជា-វៀតណាម បានប្រើផែនទីខ្នាត ១/១០០,០០០ តាំងពីឆ្នាំ ១៩៨៥ ដោយបានឯកភាពគ្នាដោះស្រាយបញ្ហាព្រំដែនជាមួយគ្នារហូតបោះបង្គោលបាន ៨៤% នៅសេសសល់តែ​១៦ % ទៀត ដែលយើងបន្តដោះស្រាយតាមរយៈគណៈកម្មការចម្រុះព្រំដែន។ លោកថា៖« យើងមានយន្តការជាបន្តបន្ទាប់ រហូតដល់បានធ្វើជាសន្ធិសញ្ញាបំពេញបន្ថែមផែនទី រហូតដល់ឆ្នាំ ២០១៩ យើងបានឯកភាពគ្នាក្នុងការប្រើផែនទី ១លើ ៥០ពាន់ ដែលបានលទ្ធផលក្នុងការចរចាដោះស្រាយបញ្ហាព្រំដែនជាមួយវៀតណាម ៨៤ % នេះជាឆន្ទានុសិទ្ធិដែលយើងទាំងពីរចរចាដោះស្រាយបញ្ហាព្រំដែន»។

លើសពីនោះកម្ពុជាជាមួយភាគីមិត្តឡាវ ដោះស្រាយបញ្ហាព្រំដែនបាន ៨៦ %​ នៅសល់តែ ១៤ % ទៀតទេ។ លោកបញ្ជាក់ទៀតថា ឡាវ វៀតណាម អ្នកជិតខាងកម្ពុជាដោះស្រាយបញ្ហាព្រំដែនរួមគ្នាអស់ហើយ ដោយឡែកភាគីថៃឯកភាពគ្នា ឆ្នាំ ២០០១ ដោះស្រាយបង្គោលខណ្ឌសីមា បានត្រឹម ៤៣ បង្គោល លើ ៧៤ បង្គោល គិតជាភាគរយសម្រេចបានប្រហែលជាង ៥០ % ប៉ុណ្ណោះ។

សូមជម្រាបថា កម្ពុជាមានព្រំដែនគោកជាប់​ប្រទេស​វៀតណាម​ប្រវែង​ជាង ១,២៧០ គីឡូម៉ែត្រ ខណៈរាជរដ្ឋាភិបាលកម្ពុជាខិតខំប្រឹងប្រែងចរចាបោះបង្គោលព្រំដែនជាមួយបណ្តាលប្រទេសជិតខាងជាបន្តបន្ទាប់ ដើម្បីរក្សាព្រំដែនសន្តិភាព សន្តិសុខ និងកំណើនសេដ្ឋកិច្ចតាមព្រំដែន៕