សន្តិសុខសង្គម

កម្លាំងការិយាល័យប្រឆាំងការជួញដូរមនុស្ស និងការពារអនីតិជន សង្គ្រោះជនរងគ្រោះជាអនីតិជន ៥ នាក់ ពីកន្លែងម៉ាស្សា ១ កន្លែង

បានផុស

១ year មុន

នៅ

ថ្ងៃសុក្រ ២០ មិថុនា ២០២៥

ដោយ

កាលពីយប់ថ្ងៃទី ១៩ ខែមិថុនា ឆ្នាំ ២០២៥ កម្លាំងការិយាល័យប្រឆាំងការជួញដូរមនុស្ស និងការពារអនីតិជន បានអនុវត្តសកម្មភាពសង្គ្រោះជនរងគ្រោះចំនួន ៥ នាក់ ដែលជាអនីតិជន ពីកន្លែងម៉ាស្សា ១ កន្លែង ស្ថិតនៅផ្ទះ ២ ល្វែង លេខ ១៣៩&១៤១ ផ្លូវ 8m ភូមិស្ងួនពេជ្រ សង្កាត់កន្ទោក ខណ្ឌកំបូល និងឃាត់ខ្លួនជនសង្ស័យឈ្មោះ ថាន់ សុខហេង ភេទស្រី ជនជាតិខ្មែរ (ថៅកែហាងម៉ាស្សា)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នគរបាលបានប្រាប់ថា ដោយអនុវត្តតាមបទបញ្ជារបស់ លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងមានការសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញ កម្លាំងការិយាល័យប្រឆាំងការជួញដូរមនុស្ស និងការពារអនីតិជន ដឹកនាំដោយលោកឧត្ដមសេនីយ៍ទោ ចាន់ កិត្តិខុម ស្នងការរង ផែនការងារប្រឆាំងការជួញដូរមនុស្ស និងការពារអនីតិជន និងការងារយេនឌ័រ និងលោកស្រីឧត្ដមសេនីយ៍ត្រី ឆេង សារ៉េត ស្នងការរង ទទួលដឹកនាំការិយាល័យប្រឆាំងការជួញដូរមនុស្ស និងការពារអនីតិជន បានចុះបង្ក្រាបហាងម៉ាស្សា ១ កន្លែង យីហោ ម៉ាស្សាសុខភាព ដែលមានទីតាំងស្ថិតនៅផ្ទះ ២ ល្វែង លេខ ១៣៩&១៤១ ផ្លូវ 8m ភូមិស្ងួនពេជ្រ សង្កាត់កន្ទោក ខណ្ឌកំបូល និងឃាត់ខ្លួនជនសង្ស័យឈ្មោះ ថាន់ សុខហេង ភេទស្រី ជនជាតិខ្មែរ (ថៅកែហាងម៉ាស្សា)។

ក្នុងប្រតិបត្តិការនោះដែរ កម្លាំងជំនាញ បានសង្គ្រោះជនរងគ្រោះចំនួន ៥ នាក់ ជាអនីតិជន (ស្រី ៤ នាក់ , ភេទទីបី ១ នាក់) រួមនឹងដកហូតវត្ថុតាងមួយចំនួន យកមកកាន់ការិយាល័យ ដើម្បីធ្វើការសាកសួរ និងអនុវត្តតាមនីតិវិធី។

បន្ទាប់ពីការសង្គ្រោះ ជនរងគ្រោះ ត្រូវបានបញ្ជូនទៅមន្ទីរសង្គមកិច្ច និង ស្តារនីតិសម្បទា ដើម្បីធានាថាពួកគេទទួលបានការការពារ សេរីភាព និងជំនួយចាំបាច់ផ្សេងៗ ដូចជា សេវាសុខភាព ការពារផ្លូវច្បាប់ និងសេវាពិគ្រោះយោបល់ផ្លូវចិត្ត។ ដោយឡែកជនសង្ស័យដែលជាម្ចាស់ទីតាំង នគរបាលជំនាញ បានកសាងនីតិវិធីបញ្ជូនទៅតុលាការចាត់ការតាមផ្លូវច្បាប់៕

អត្ថបទ ៖ សំណាង