ព័ត៌មានអន្ដរជាតិ

មេបញ្ជាការទ័ពរុស្ស៊ី៖ សង្គ្រាមលោកលើកទី៣កំពុងចាប់ផ្ដើម ទាមទារការកែនទ័ពថ្មី១លាននាក់

បានផុស

១ year មុន

នៅ

ថ្ងៃសៅរ៍ ១៤ មិថុនា ២០២៥

ដោយ

Chheang

ឧត្តមសេនីយរុស្ស៊ីជាន់ខ្ពស់ម្នាក់ បានប្រកាសកាលពីថ្ងៃទី១៣ខែមិថុនាថា សង្គ្រាមលោកលើកទី៣កំពុងចាប់ផ្តើមហើយ និងបានអំពាវនាវឲ្យមានការកែនទ័ពថ្មីចំនួន១លាននាក់។ ការប្រកាសរបស់លោក Apti Alaudinov ដែលជាមេបញ្ជាការកំពូល និងជាសម្ព័ន្ធមិត្តជិតស្និទ្ធរបស់ប្រធានាធិបតី វ្ល៉ាឌីមៀរ ពូទីន ធ្វើឡើងបន្ទាប់ពីអ៊ីស្រាអែលបើកការវាយប្រហារយ៉ាងខ្លាំងក្លាលើប្រទេសអ៊ីរ៉ង់ ជុំវិញកម្មវិធីអាវុធនុយក្លេអ៊ែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Alaudinov ដែលមានតួនាទីជាអនុប្រធាននាយកដ្ឋានគោលនយោបាយ-យោធា បានបង្ហោះសារនៅលើតេឡេក្រាមថា «យើងត្រូវតែចល័តទ័ព។ យើងត្រូវរៀបចំមនុស្សយ៉ាងហោចណាស់កន្លះលាននាក់ជាមុន។ ប៉ុន្តែជាក់ស្តែងមនុស្សមួយលាននាក់។ យើងត្រូវកោះហៅពួកគេ ហើយចាប់ផ្តើមរៀបចំពួកគេសម្រាប់ការពិតដែលថា សង្រ្គាមបានចាប់ផ្តើមរួចមកហើយ ដែលយើងដឹងច្បាស់ថាកំពុងតែកើតឡើង នោះគឺសង្គ្រាមលោកលើកទី៣»។

នៅថ្ងៃដដែលនោះ លោក Alaudinov ក៏បានបង្ហោះសាររបស់មេដឹកនាំកំពូលអ៊ីរ៉ង់លោក Ayatollah Ali Khamenei ផងដែរ ដែលទាមទារឲ្យមានការវាយបកយ៉ាងចាស់ដៃប្រឆាំងនឹងអ៊ីស្រាអែល។ សារនេះធ្វើឡើងប៉ុន្មានម៉ោងបន្ទាប់ពីអ៊ីស្រាអែលវាយប្រហារលើអ៊ីរ៉ង់ ដោយបំផ្លាញតំបន់យោធា និងទីតាងរោងចក្រនុយក្លេអ៊ែរសំខាន់ៗ ដែលបណ្ដាលឲ្យមេបញ្ជាការជាន់ខ្ពស់ និងអ្នកវិទ្យាសាស្ត្រនុយក្លេអ៊ែរជាច្រើននាក់របស់អ៊ីរ៉ង់បាត់បង់ជីវិត។ នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ បាននិយាយថា យោធាបានកំណត់គោលដៅលើការប៉ុនប៉ងរបស់ទីក្រុងតេហេរ៉ង់ក្នុងការសម្រេចបាននូវការបង្កើតគ្រាប់បែកនុយក្លេអ៊ែរ។

លោក Alaudinov បានចាត់ទុកជម្លោះដ៏ក្ដៅគគុកនេះគឺគ្រប់គ្រាន់ហើយដែលអាចបញ្ឆេះទៅជាសង្គ្រាមលោកបាន ដោយសង្កត់ធ្ងន់ថា ការត្រៀមការចល័តទ័ពរបស់រុស្ស៊ី ពិតជាមានសារៈសំខាន់បំផុត។ លោកបាននិយាយថា «ដូច្នេះហើយគ្មាននរណាម្នាក់ហ៊ានលេងជាមួយយើងតាមរបៀបដែលគេលេងជាមួយប្រទេសផ្សេងទៀត ហើយឥឡូវនេះជាមួយអ៊ីរ៉ង់។ ជឿខ្ញុំ យើងទាំងអស់គ្នាត្រូវតែរួបរួម រួបរួមគ្នានៅគ្រប់កម្រិតទាំងអស់»៕

ដោយ៖ ឈាង