ភឿថៃ ជំរុញឲ្យលោក សេដ្ឋា ពិភាក្សាការបើកច្រកចូលប្រាសាទព្រះវិហារ ជាមួយសម្តេចធិបតី ហ៊ុន ម៉ាណែត

តាមការចុះផ្សាយរបស់ Bangkok Post នៅថ្ងៃអាទិត្យទី២១ខែមករា, គណបក្សភឿថៃក្នុងខេត្ត ស៊ីសាកេត នឹងជំរុញឲ្យលោកនាយករដ្ឋមន្ត្រី សេដ្ឋា ថាវីស៊ីន លើកឡើងប្រធានបទអំពីលទ្ធភាពបើកប្រាសាទព្រះវិហារដល់ទេសចរឡើងវិញ ពេលជួបពិភាក្សា ជាមួយសម្តេចបវរធិបតី ហ៊ុន ម៉ាណែត នៃព្រះរាជាណាចក្រកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Phumin Leethiraprasert សមាជិកបក្សភឿថៃ ក្នុងមណ្ឌល៤របស់ខេត្តស៊ីសាកេត និយាយថា មុនដំណើរអញ្ជើញទស្សនកិច្ចផ្លូវការរបស់សម្តេចបវរធិបតី ហ៊ុន ម៉ាណែត នៅថ្ងៃទី៧ខែកុម្ភៈ, សមាជិកបក្សត្រូវបានអញ្ជើញឲ្យជួបជាមួយនាយករដ្ឋមន្ត្រី សេដ្ឋា ថាវីស៊ីន នៅថ្ងៃពុធខាងមុខនេះសិន ដើម្បីរាយការណ៍អំពីបញ្ហាព្រំដែនកម្ពុជា-ថៃ  ហើយសមាជិកបក្សនឹងឆ្លៀតយកឱកាសនោះ ដើម្បីស្នើដល់លោក សេដ្ឋា ឲ្យពិភាក្សាជាមួយសមភាគីកម្ពុជា អំពីការបើកបរិវេណប្រាសាទព្រះវិហារ ដើម្បីទេសចរចូលកម្សាន្ត។

លោក Phumin គូសបញ្ជាក់ថា “រឿងនេះ គឺពឹងផ្អែកទាំងស្រុងលើជំនួបពិភាក្សារវាងនាយករដ្ឋមន្ត្រីទាំងពីរ។ ខ្ញុំជឿថា ការបើកឲ្យទេសចរចូលលេងប្រាសាទពីខាងខេត្តស៊ីសាកេត នឹងឆ្លុះបញ្ចាំងពីចំណងមិត្តភាពរវាងប្រជាជាតិទាំងពីរ ដូច្នេះ ការបើកឡើងវិញគឺអាចទៅរួច”។

សូមបញ្ជាក់ថា ច្រកចូលប្រាសាទព្រះវិហារតាមស្រុក Kantharalak របស់ខេត្តស៊ីសាកេត ត្រូវបានបិទ ចាប់តាំងពីឆ្នាំ២០០៨មក ក្រោយមានការប៉ះទង្គិចនៅព្រំដែនរវាងកងទ័ពថៃ និងកម្ពុជា។

នេះមិនមែនជាលើកទីមួយឡើយដែលភាគីថៃ ចិញ្ចឹមចិត្តចង់ឲ្យកម្ពុជា បើកច្រកទ្វារចូលប្រាសាទព្រះវិហារឡើងវិញ ក្រោយការរារាំងអស់រយៈពេលជាងមួយទសវត្សរ៍។ កាលពីឆ្នាំមុន អភិបាលខេត្ត Ubon Ratchathani ក៏បានស្នើកម្ពុជាសុំអនុញ្ញាតឲ្យភ្ញៀវទេសចរចូលប្រាសាទព្រះវិហារ តាមច្រកចូលស៊ីសាកេតផងដែរ ប៉ុន្តែសំណើរនេះ​ មិនទទួលការយល់ព្រមពីសំណាក់ភាគីខ្មែរឡើយ។

ដោយឡែក តាមការចុះផ្សាយរបស់ Bangkok Post ដដែល, តំបន់ទាមទារត្រួតស៊ីគ្នា (OCA) រវាងកម្ពុជានិងថៃ ក៏ដូចជាបញ្ហាថាមពល ក៏នឹងស្ថិតក្នុងរបៀបវារៈនៃកិច្ចពិភាក្សា រវាងនាយករដ្ឋមន្ត្រីទាំងពីរផងដែរ។

តំបន់សមុទ្រត្រួតស៊ីគ្នាទំហំ ២៦ ០០០​ គីឡូម៉ែត្រ​ការ៉េ គឺជាកន្លែងមានធនធាន​ប្រេង និង​ឧស្ម័ន​ធម្មជាតិ ហើយវាក៏អំណោយផលដល់ការធ្វើអាជីវកម្ម ដែលអាចកាត់បន្ថយការពឹងផ្អែកលើការផ្គត់ផ្គង់ពីបរទេស និងប្រើប្រាស់សម្រាប់ផលិតអគ្គិសនីក្នុងស្រុកផងដែរ។

​តំបន់ OCA ត្រួតស៊ីគ្នា​នៅ​ព្រំដែន​កម្ពុជា និង​ថៃ​ក្នុង​ឈូង​សមុទ្រ គឺ​ជា​ចំណុច​នៃ​ជម្លោះ​រវាង​ប្រទេស​ទាំង​២ ​ដែល​បានទាមទារ​តាំងពីដើម​ទសវត្សរ៍​ឆ្នាំ​ ១៩៧០ មក​ម្ល៉េះ ហើយអនុស្សរណៈ​នៃ​ការយោគយល់​​ដើម្បី​រួមគ្នា​រុករក​នៅ​តំបន់ OCA ត្រូវបាន​ចុះហត្ថលេខានៅក្នុង​ឆ្នាំ​ ២០០១ ប៉ុន្តែ​ក្រោយមក​ត្រូវបាន​ផ្អាក​ដោយរាជ​រដ្ឋាភិបាល​ថៃ​ក្នុង​ឆ្នាំ​ ២០០៩​៕

អត្ថបទ៖ សុខ សុវណ្ណ

ចុចអាន៖ នាយករដ្ឋមន្ត្រីថៃ បង្ហាញរបៀបវារៈ សម្រាប់កិច្ចពិភាក្សាជាមួយសម្តេចធិបតី ហ៊ុន ម៉ាណែត