ថៃព្យាករណ៍កូវីដ១៩កើនឡើងនៅក្នុងរដូវវស្សា

នាយកដ្ឋានគ្រប់គ្រងជំងឺថៃ (DDC) បានប៉ាន់ប្រមាណថា ការឆ្លង កូវីដ-១៩ នៅក្នុងប្រទេសថៃអាចកើនឡើងក្នុងរដូវវស្សាខាងមុខ និងអំឡុងបើកបវេសនកាលថ្មីរបស់សាលារៀន ខណៈចាប់តាំងពីដើមឆ្នាំនេះមកមានអ្នកស្លាប់១៥នាក់ហើយ។ នេះបើយោងតាមការចេញផ្សាយរបស់សារព័ត៌មាន​The Nation នៅថ្ងៃទី០៩ខែឧសភានេះ។

អគ្គនាយក DDC លោកវេជ្ជបណ្ឌិត Panumas Yanwetsakul បានបង្ហាញនៅថ្ងៃសុក្រថា ចាប់ពីថ្ងៃទី ៤ ដល់ថ្ងៃទី ៨ ខែឧសភា ករណីឆ្លងកូវីដ-១៩ សរុបចំនួន ៧,០១៣ និងមានអ្នកស្លាប់ម្នាក់។ អត្រាឆ្លងខ្ពស់បំផុតត្រូវបានគេរកឃើញក្នុងចំនោមកុមារដែលមានអាយុពី ០-៤ ឆ្នាំ បន្ទាប់មកគឺមនុស្សដែលមានអាយុ ៣០-៣៩ និង ២០-២៩ ឆ្នាំ។

បើតាមសម្ដីលោក Panumas ចាប់តាំងពីដើមឆ្នាំនេះ (ថ្ងៃទី ១ ខែមករា ដល់ថ្ងៃទី ០៨ ឧសភា) ប្រទេសថៃបានកត់ត្រាករណី កូវីដ-១៩ ចំនួន ៤១,១៩៧ករណី និងមានអ្នកស្លាប់សរុបចំនួន ១៥ នាក់។

នៅក្នុងប្រទេសថៃកូវីដ-១៩ នៅតែបន្តរីករាលដាល ជាពិសេសទាក់ទងទៅនឹងការជួបជុំដ៏ធំ និងការផ្លាស់ប្តូររដូវ។ ករណី​ដែលមាន​និន្នាការ​កើនឡើង​គឺក្នុង​រដូវវស្សានេះ ទោះបីជា​តួលេខ​ប្រចាំ​សប្តាហ៍​ថ្មីៗ​បង្ហាញ​ពី​និន្នាការ​ធ្លាក់ចុះ​បន្តិច​ក៏ដោយ​។

ក្រសួងសុខាភិបាលថៃក៏ណែនាំប្រជាពលរដ្ឋ​ទូទៅ​ឱ្យ​រក្សា​អនាម័យ​ផ្ទាល់ខ្លួន​ឱ្យ​បាន​ល្អ ពាក់​ម៉ាស់​​នៅ​កន្លែង​មាន​មនុស្ស​កកកុញ​ដូច​ជា តាមមធ្យោបាយ​ធ្វើដំណើរ​សាធារណៈ មន្ទីរពេទ្យ និង​កន្លែង​ថែទាំ​មនុស្ស​ចាស់​ជាដើម ហើយ​លាងដៃ​ឱ្យ​បាន​ញឹកញាប់៕

អត្ថបទ៖ ប៊ុន សុភាព