ពីបុគ្គលិកអង្គការមកក្លាយជាសហគ្រិនស្រ្ដីខ្មែរដំបូងគេ ច្នៃចេកណាំវ៉ា​ចេញជាម្សៅកញ្ចប់លក់លើទីផ្សារក្នុងស្រុកនិងនាំចេញ

ស្ថិតក្នុងវ័យ ៤០ឆ្នាំ អ្នកស្រី សេង សំណាង  ជាអ្នកបាត់ដំបងដំបូងគេបង្អស់ ដែលមានគំនិតច្នៃប្រឌិតខ្ពស់ ដោយយកចេកណាំវ៉ាទិញតាមចម្ការរបស់កសិករ ផលិតជាចេញជាម្សៅកញ្ចប់លក់បានជាង ៣០០០ប្រអប់ ក្នុងមួយខែដាក់លក់មិនត្រឹមតែទីផ្សារក្នុងស្រុកប៉ុណ្ណោះទេ ប៉ុន្តែផលិតផលរបស់អ្នកស្រីក៏ត្រូវបានធ្វើការនាំចេញមួយចំនួនផងដែរ។

ជាម្ចាស់សិប្បកម្ម អឹមអិលអេក អ្នកស្រី សេង សំណាង បានប្រាប់ កម្ពុជាថ្មី ថា សហគ្រាសផលិតម្សៅចេក និងម្សៅផ្លែឈើ របស់អ្នកស្រី បានបើកដំណើរការតាំងពីឆ្នាំ ២០២១ មកម្ល៉េះ ពោលគឺចាប់តាំងពីប្រទេសកម្ពុជាកំពុងតែជួបនូវវិបត្តិជំងឺកូវីដ-១៩ ដែលកាលនោះ អ្នកស្រី បានផលិតម្សៅចេញពីផ្លែឈើជាច្រើនមុខមានដូចជា៖ ម្សៅចេកណាំវ៉ា ម្សៅខ្ញី និងម្សៅដែលផលិតចេញពីផ្លែជាច្រើនមុខទៀត សម្រាប់ចែកចាយ និងដាក់លក់តាមបណ្ដាខេត្តមួយចំនួន ក្នុងទីផ្សារប្រទេសកម្ពុជា ​ពិសេសគឺខេត្តបាត់ដំបង។

ជាអតីតបុគ្គលិកអប់រំ នៃអង្គការក្រៅរដ្ឋាភិបាលមួយ អ្នកស្រី សេង សំណាង បានវិវត្តិខ្លួនយ៉ាងឆាប់រហ័ស ដោយបានដឹកនាំ និងពង្រីកសហគ្រាសរបស់អ្នកស្រី ពីសិប្បកម្មលក្ខណៈគ្រួសារ មកជាសហគ្រាសខ្នាតមធ្យម ដែលមានបុគ្គលិក និងនិស្សិតហាត់ការផ្នែកគីមីចំណីអាហារ ប្រមាណជាង ២៤នាក់ ដែលកំពុងជួយការងារ ក្នុងសហគ្រាស ជារៀងរាល់ថ្ងៃ។

អ្នកស្រី សេង​ សំណាង បន្ថែមទៀតថា មូលហេតុចម្បងដែលអ្នកស្រី បង្កើតសហគ្រាសនេះឡើង ដោយសារតែ អ្នកស្រី ចង់ជួយឱ្យផលិតផលកសិកម្មរបស់ខ្មែរ​ មានតម្រូវការទីផ្សារខ្ពស់ និងមួយចំណែកទៀតនោះ អ្នកស្រី ក៏ចង់បង្កើតការងារឱ្យសិស្ស-និស្សិត និងអ្នករស់នៅក្នុងសហគមន៍ បានមានការងារធ្វើនិងស្វែងរកចំណូលសម្រាប់ផ្គត់ផ្គង់គ្រួសារ ផងដែរ។

ម្ចាស់សហគ្រាសរូបនេះ បានប្រាប់ឱ្យដឹងទៀតថា សម្រាប់ទីផ្សារម្សៅចេកនាពេលបច្ចុប្បន្ននេះ កំពុងទទួលបានទីផ្សារយ៉ាងខ្លាំងពីសំណាក់អតិថិជនខ្មែរទាំងក្នុង និងក្រៅប្រទេស​ តែងតែនិយមទិញម្សៅចេក និងម្សៅផ្លែឈើពីសហគ្រាស ទៅបរិភោគ និងលក់បន្ដ ជារៀងរាល់ថ្ងៃ។ សម្រាប់តម្លៃវិញ ម្សៅចេក ដែលផលិតលក់ចេញទៅកាន់ទីផ្សារប្រមាណ ១០ដុល្លារ ក្នុងមួយប្រអប់ ដែលក្នុងនោះមាន២០កញ្ចប់តូចៗ ផ្សេងទៀត។

អ្នកស្រី សេង សំណាង  បន្ថែមថា សម្រាប់ម្សៅចេកនេះ វាមានអត្ថប្រយោជន៍ច្រើនចំពោះសុខភាពមនុស្សទូទៅ​ ដោយការផលិតគ្មានសារធាតុរក្សាទុក និងបានជួយដល់ការព្យាបាលជំងឺក្រពះ ផ្តល់វីតាមីនដល់សុខភាពអ្នកបរិភោគ។

អ្នកស្រី បានបញ្ជាក់ទៀតថា មួយរយៈចុងក្រោយនេះ សហគ្រាសអ្នកស្រី កំពុងតែបានសិក្សាស្រាវជ្រាវបន្ថែមទៀត ដើម្បីធ្វើយ៉ាងណាផលិតម្សៅចេក និងម្សៅផ្លែឈើ  អាចរក្សាទុកបានយូរ សម្រាប់ដាក់លក់គ្រប់បណ្ដារាជធានី-ខេត្ត និងនៅតាមផ្សារទំនើបមួយចំនួនក្នុងប្រទេសកម្ពុជា នាថ្ងៃខាងមុខនេះផងដែរ៕

អត្ថបទ ៖ សួស សិត