ព័ត៌មានអន្ដរជាតិ

វិមានក្រឹមឡាំង៖ ពូទីន មានភាពម៉ត់ចត់ណាស់លើកិច្ចចរចាទល់មុខគ្នាជាមួយ ហ្សេលេនស្គី

បានផុស

១ year មុន

នៅ

ថ្ងៃអង្គារ ១៣ ឧសភា ២០២៥

ដោយ

Chheang

វិមានក្រឹមឡាំង បានប្រកាសកាលពីថ្ងៃចន្ទទី១២ខែឧសភាថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន ពិតជាមានភាពម៉ត់ចត់ក្នុងការស្វែងរកសន្តិភាពនៅក្នុងកិច្ចចរចាដោយផ្ទាល់ជាមួយអ៊ុយក្រែនដែលលោកបានស្នើធ្វើឡើងនៅទីក្រុងអ៊ីស្តង់ប៊ុលនៃប្រទេសតួកគី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា៖ «យើងប្តេជ្ញាស្វែងរកយ៉ាងម៉ឺងម៉ាត់សម្រាប់មធ្យោបាយនៃដំណោះស្រាយសន្តិភាពរយៈពេលវែង» ហើយមេដឹកនាំជាច្រើនបានស្វាគមន៍ចំពោះវិធីសាស្រ្តរបស់លោក ពូទីន។

លោក Peksov បានបន្ថែមថា៖ «វិធីសាស្រ្តនេះ ដែលមានគោលបំណងច្បាស់លាស់ ក្នុងការស្វែងរកដំណោះស្រាយការទូតពិតប្រាកដមួយចំពោះវិបត្តិអ៊ុយក្រែន ការលុបបំបាត់ឫសគល់នៃជម្លោះ និងការបង្កើតសន្តិភាពយូរអង្វែង បានទទួលបានយោគយល់ និងការគាំទ្រពីមេដឹកនាំនៃប្រទេសជាច្រើន»។

សូមបញ្ជាក់ថា លោក ពូទីន និងប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី មិនបានជួបគ្នាដោយផ្ទាល់តាំងតែពីខែធ្នូឆ្នាំ២០១៩មកម៉្លេះ។ ពាក់ព័ន្ធនឹងសំណើចុងក្រោយនេះ លោក ហ្សេលេនស្គី បានយល់ព្រមចូលរួមនៅក្នុងកិច្ចចរចានាថ្ងៃទី១៥ខែឧសភា ដោយរំពឹងថានឹងមានបទឈប់បាញ់ពេញលេញ។ លោក ហ្សេលេនស្គី បានបង្ហោះសារលើបណ្ដាញសង្គម X កាលពីថ្ងៃអាទិត្យថា៖ ««ខ្ញុំរង់ចាំជួបពូទីនទល់មុខគ្នានៅប្រទេសតួកគី នាថ្ងៃព្រហស្បតិ៍ខាងមុខ។ ខ្ញុំនៅតែរក្សាជំហរថា ទីក្រុងកៀវរង់ចាំបទឈប់បាញ់ពេញលេញនិងយូរអង្វែង ចាប់ពីថ្ងៃស្អែកទៅដើម្បីផ្តល់មូលដ្ឋានចាំបាច់សម្រាប់ផ្នែកការទូត។ ខ្ញុំរំពឹងថា ទីក្រុងមូស្គូនឹងមិនរកលេសទៀតទេលើកនេះ»។

ទាក់ទិននឹងជំនួបដោយផ្ទាល់រវាង ពូទីន និង ហ្សេលេនស្គី ប្រធានាធិបតីអាមេរិកលោក ដូណាល់ ត្រាំ បានបង្ហើបថា លោកក៏អាចនឹងចូលរួមកិច្ចពិភាក្សាទល់មុខដ៏ធំនេះផងដែរ ដោយនិយាយថា៖ «នេះគឺជាព្រឹត្តិការណ៍ដ៏មានសារៈសំខាន់មួយ ហើយខ្ញុំសង្ឈឹមថា ជំនួបរុស្ស៊ី-អ៊ុយក្រែនថ្ងៃព្រហស្បតិ៍នៅទីក្រុងអ៊ីស្តង់ប៊ុល នឹងចេញលទ្ធផលយ៉ាងគាប់ប្រសើរ។ ខ្ញុំជឿថា មេដឹកនាំទាំងពីរនឹងធ្វើដំណើរទៅទីនោះ ចំណែកខ្ញុំក៏ទំនងជានឹងហោះទៅទីនោះដែរ»៕