ព័ត៌មានអន្ដរជាតិ

ត្រាំ ចេញអធិបញ្ជាទាមទារឱ្យឧស្សាហកម្មឱសថកាត់បន្ថយតម្លៃថ្នាំពេទ្យ

បានផុស

៣ ម៉ោង មុន

នៅ

ថ្ងៃអង្គារ ១៣ ឧសភា ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃចន្ទ បានចុះហត្ថលេខាលើអធិបញ្ជាទាមទារឱ្យក្រុមហ៊ុនឧស្សាហកម្មឱសថទម្លាក់តម្លៃថ្នាំពេទ្យ ឱ្យស្មើនឹងតម្លៃក្នុងប្រទេសដទៃទៀត។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បទបញ្ជាថ្មី កំណត់ឱ្យក្រុមហ៊ុនផលិតឱសថ កំណត់គោលដៅតម្លៃក្នុងរយៈពេល ៣០ ថ្ងៃខាងមុខ។ បើក្រុមហ៊ុនទាំងនោះមិនមានវឌ្ឍនភាពលើការកំណត់នេះជាដុំកំភួនទេ វិធានការបន្ថែមទៀតនឹងត្រូវដាក់ចេញ ដើម្បីបញ្ចុះតម្លៃ។

លោក ត្រាំ បានប្រាប់សន្និសីទសារព័ត៌មានថា រដ្ឋាភិបាលនឹងដាក់ពន្ធ ប្រសិនបើតម្លៃថ្នាំពេទ្យនៅសហរដ្ឋអាមេរិក មិនស៊ីគ្នានឹងតម្លៃក្នុងប្រទេសដទៃ ដោយលោកចង់បានការកាត់បន្ថយតម្លៃចន្លោះពី ៥៩-៩០ ភាគរយ។ លោកបានថ្លែងយ៉ាងដូច្នេះថា៖ «គួរតែស្មើគ្នាសម្រាប់គ្រប់គ្នា។ មនុស្សគ្រប់គ្នា គួរតែចំណាយដូចគ្នា»។

យោងតាមក្រុមស្រាវជ្រាវគោលនយោបាយសាធារណៈ Rand Corporation តម្លៃថ្នាំតាមវេជ្ជបញ្ជារបស់សហរដ្ឋអាមេរិក ជាមធ្យមគឺខ្ពស់ជាងចន្លោះពី ២-៣ ដង ធៀបទៅនឹងបណ្ដាប្រទេសអភិវឌ្ឍន៍ផ្សេងៗទៀត ហើយខ្លះខ្ពស់រហូតដល់ទៅ ១០ ដងផង។

បញ្ជាកំណត់តម្លៃថ្នាំរបស់លោក ត្រាំ ធ្វើឡើងខណៈប្រធានាធិបតីរូបនេះ បានព្យាយាមបំពេញការសន្យាដោះស្រាយអតិផរណា និងការបញ្ចុះតម្លៃសម្រាប់ទំនិញប្រចាំថ្ងៃជាច្រើនសម្រាប់ប្រជាជនអាមេរិក ចាប់ពីតម្លៃស៊ុត ដល់ប្រេងសាំងសម្រាប់រថយន្ត។

ជុំវិញបញ្ហានេះ អ្នកវិភាគ និងស្ថាប័នជំនាញផ្សេងៗ បានបង្ហាញពីចេតនានៃការទម្លាក់តម្លៃថ្នាំពេទ្យនៅអាមេរិក ប៉ុន្តែបានលើកឡើងពីឧបសគ្គដែលរដ្ឋបាល ត្រាំ ត្រូវដោះស្រាយដើម្បីសម្រេចវាឡើង។

បើតាមបណ្ដាញទូរទស្សន៍ CNBC អ្នកវិភាគរបស់ធនាគារ JPMorgan បាននិយាយកាលពីថ្ងៃចន្ទថា គោលនយោបាយ ត្រាំ «ប្រឈមនឹងការអនុវត្តជាក់ស្តែង» ព្រោះវាត្រូវការការអនុម័តពីសភា ហើយអាចប្រឈមមុខនឹងបញ្ហាផ្លូវច្បាប់ពីក្រុមហ៊ុនផលិតឱសថផង ខណៈមានទាំងការជំទាស់ពីសមាជិកសភាបក្សសាធារណរដ្ឋរបស់លោក ត្រាំ ផ្ទាល់ ក៏ដូចជាបញ្ហាលើការនាំចូលឱសថពីបរទេសជាដើម៕