ព័ត៌មានជាតិ

រមណីយដ្ឋានកំពង់ទូក ស្រុកសំឡូត ហាក់ស្ងប់ស្ងាត់ភ្ញៀវទេសចរ

បានផុស

១ year មុន

នៅ

ថ្ងៃសុក្រ ៩ ឧសភា ២០២៥

ដោយ

កំពង់ទូក គឺជាឈ្មោះរមណីយដ្ឋានធម្មជាតិមួយកន្លែង ស្ថិតក្នុងជ្រលងព្រៃព្រឹក្សា និងជួរភ្នំ ដែលមើលទៅមានពណ៌ខៀវស្រងាត់ និងទឹកហូរថ្លាឆ្វង់ កាត់ដុំសិលារាប់មិនអស់ ហើយកន្លងមកនៅទីនេះមានភ្ញៀវទេសចរជាតិចេញចូលឥតដាច់ ពិសេសថ្ងៃបុណ្យ និងថ្ងៃសៅរ៍-អាទិត្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រមណីយដ្ឋានបែបធម្មជាតិកំពង់ទូក ស្ថិតក្នុងឃុំមានជ័យ ស្រុកសំឡូត ដែលមានចម្ងាយ ៨៣ គីឡូម៉ែត្រ ពីទីរួមខេត្តបាត់ដំបង។ បើគេធ្វើដំណើរតាមផ្លូវជាតិលេខ ៥៧ ឆ្ពោះទៅទិសខាងលិចកាត់តាមស្រុករតនៈមណ្ឌល ហើយបត់ឆ្វេងត្រង់រង្វង់មូលភ្ជាវ ឆ្លងកាត់តាមស្ពានដងទង់ រហូតដល់ផ្សាររ៉ែដែក ទើបបត់ស្ដាំឆ្ពោះទៅកាន់ទីរួមស្រុកសំឡូតចាស់ នោះនឹងឃើញមានស្លាកយីហោធំៗ បញ្ជាក់ថា “រមណីយដ្ឋានកំពង់ទូក” ដែលនៅទីនោះមានទឹកហូរកាត់ថ្មដាថ្លាយង់ ពួនសម្ងំក្នុងជ្រលងបព្វតា។

ប្រជាពលរដ្ឋមួយចំនួន ដែលប្រកបមុខរបរលក់ចំណីអាហារ និងភេសជ្ជៈនៅក្នុងតំបន់នោះបានលើកឡើងថា បច្ចុប្បន្នភ្ញៀវទេសចរមានការថយចុះមួយរយៈចុងក្រោយនេះ ទំនងមកពីអាកាសធាតុក៏មិនដឹង ព្រោះប៉ុន្មានខែចុងក្រោយនេះអាកាសធាតុក្តៅខ្លាំងពេក ដែលមនុស្សម្នាមិនចង់ធ្វើដំណើរចេញទៅណាឡើយ។

អ្នកស្រី ម៉ៅ ចាន់ណា ដែលលក់ដូរចំណីអាហារបន្តិចបន្តួចនៅទីនោះបានត្អូញត្អែរថា សព្វថ្ងៃលក់អ្វីក៏មិនដាច់ដែរ ដោយសារតែភ្ញៀវទេសចរមានការធ្លាក់ចុះនៅមួយរយៈចុងក្រោយនេះ។

អ្នកស្រី បានសង្កត់ធ្ងន់ថា ទេសភាពនៅទីនេះស្រស់ស្អាតមែនទែន គួរតែមានភ្ញៀវទេសចរមកលេងច្រើន ប៉ុន្តែជួនកាលអាចមកពីអាកាសធាតុផង ហើយទឹកក្នុងស្ទឹងក៏មានតិច ដូច្នេះម្នាក់ៗ មិនមានអារម្មណ៍ចង់លេងទឹកនោះទេ ដោយសារអាកាសធាតុក្តៅ ទឹកស្ទឹងក៏ក្តៅដែរ ដូច្នេះហើយបានជាភ្ញៀវមានការថយចុះបែបនេះ។

អ្នកស្រី សង្ឃឹមថា នៅរដូវវស្សាខាងមុខ អាចនឹងមានភ្ញៀវទេសចរចូលមកលេងច្រើនឡើងវិញ ព្រោះទឹកស្ទឹងអាចឡើងជាងធម្មតា៕

អត្ថបទ ៖ សោ និយមរ័ត្ន

Related Topics:ខេត្តបាត់ដំបង