លោក ស សុខា អំពាវនាវកម្មកររោងចក្រចូលរួមការពារសន្តិភាព ដើម្បីរក្សាបានឆ្នាំងបាយរបស់ខ្លួន

ថ្លែងក្នុងពិធីសំណេះសំណាល និងពិសាអាហារសាមគ្គីជាមួយកម្មករ-កម្មការិនីជាង២ ៣០០នាក់ នៅស្រុកកំចាយមារ ខេត្តព្រៃវែង លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលើកឡើងនូវសារៈសំខាន់ នៃកិច្ចការពារសុខសន្តិភាព ដែលពលរដ្ឋខ្មែរទូទាំងប្រទេស រួមទាំងកម្មករ-កម្មការិនី ត្រូវតែបន្តយកចិត្តទុកដាក់ថែរក្សា។ រួមថែរក្សាដ្បិតសន្តិភាពបានធ្វើឱ្យកម្ពុជាមានការអភិវឌ្ឍរីកចម្រើន ដែលក្នុងនោះបានបង្កលក្ខណៈឱ្យអ្នកវិនិយោគមកបណ្តាក់ទុន បង្កើតរោងចក្រសហគ្រាស ដូចដែលពលរដ្ឋកំពុងបំពេញការងារក្នុងរោងចក្រនៅស្រុកកំចាយមារនេះស្រាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្ជាប់នឹងការអបអរសាទរទិវាពលកម្មអន្តរជាតិ នារសៀលថ្ងៃទី១២ ខែឧសភា ឆ្នាំ២០២៥ លោកឧបនាយករដ្ឋមន្ត្រី បានចាត់ទុករោងចក្រដែលមាននៅក្នុងមូលដ្ឋានស្រុកកំចាយមារនេះ ថា ក៏មិនខុសពីរោងចក្រតាមបណ្តាមូលដ្ឋានផ្សេងៗទូទាំងប្រទេសដែរ គឺអាចដំណើរការទៅបានអាស្រ័យដោយប្រទេសជាតិមានសុខសន្តិភាព និងមានទំនាក់ទំនងល្អជាមួយបណ្ដាប្រទេសប្រភពទីផ្សារសម្រាប់ការនាំចេញលទ្ធផលពីរោងចក្រនេះយកទៅលក់។

ក្នុងន័យនេះ លោកឧបនាយករដ្ឋមន្ត្រី បានលើកទឹកចិត្តកម្មករ-កម្មការិនី ខិតខំបំពេញការងារឱ្យបានសកម្ម គោរពតាមលក្ខខណ្ឌនៃការអនុវត្តការងារស្របទៅតាមច្បាប់ស្តីពីការងាររបស់កម្ពុជា ចូលរួមថែរក្សារាល់សម្ភារៈ និងមធ្យោបាយបម្រើឱ្យការងារក្នុងរោងចក្រ ក្នុងន័យចាត់ទុករោងចក្រប្រៀបបាននឹងផ្ទះបាយ ឬឆ្នាំងបាយរបស់ខ្លួន ពោលគឺកម្មករ និងថៅកែត្រូវពឹងអាស្រ័យដល់គ្នាទៅវិញទៅមក។

ខណៈកម្មករ-កម្មការិនី ជាអង្គពិធី ភាគច្រើនមានមូលដ្ឋាននៅជុំវិញតំបន់រោងចក្រនេះស្រាប់ លោកឧបនាយករដ្ឋមន្ត្រី ក៏បានលើកទឹកចិត្តដូចគ្នាឱ្យពេលវិលត្រឡប់ទៅផ្ទះវិញ ឬសម្រាប់ការធ្វើដំណើរតាមផ្លូវ ទៅមកធ្វើការបើកបរដោយការគោរពច្បាប់ មានមួកសុវត្ថិភាពពាក់ជាប្រចាំ ចូលរួមសកម្មភាពល្អៗក្នុងសង្គម ទប់ស្កាត់ក្មេងទំនើង និងសហការជាមួយអាជ្ញាធរអនុវត្តគោលនយោបាយភូមិ-ឃុំ-សង្កាត់មានសុវត្ថិភាព ដើម្បីបង្កើតភាពសុខដុម និងការអភិវឌ្ឍក្នុងមូលដ្ឋាន។

លោក បានសង្កត់ធ្ងន់ថា សកម្មភាពរួមចំណែកធ្វើអំពើល្អម្នាក់បន្តិចៗ របស់ប្រជាពលរដ្ឋជារួម និងក្នុងនោះក៏មានកម្មករ កម្មការិនីដែរនោះ ជាការបញ្ជាក់អំពីភាពសុខសាន្តជារួម និងលទ្ធផលដ៏ល្អនៃការប្រព្រឹត្តទៅរបស់សង្គមក្នុងប្រទេសកម្ពុជាទាំងមូល៕