បិទ​ទាំង​ផ្សារ រួម​ទាំង​ដាក់ភូមិចំនួន ៤ នៅ​បែកចាន ជាតំបន់ក្រហម

រដ្ឋបាលខេត្តកណ្ដាល បានដាក់ភូមិចំនួន៤ នៅក្នុងឃុំបែកចាន ស្រុកអង្គស្នួល ជាតំបន់ក្រហមដែល​ត្រូវបិទខ្ទប់មិនឲ្យចេញចូលដើម្បីទប់ស្កាត់ជំងឺកូវីដ១៩។

យោងតាមសេចក្ដីសម្រេចរបស់រដ្ឋបាលខេត្តកណ្តាលបានឲ្យដឹងថា ភូមិចំនួន៤ដែលជាតំបន់ក្រហមនោះរួមមាន ភូមិស្វាយជ្រុំ ភូមិពងទឹក ភូមិអណ្ដូង ភូមិត្នោតម្ពើមនៅក្នុងឃុំបែកចាន ។

ក្រៅពីនេះរដ្ឋបាលខេត្តបានកំណត់ភូមិចំនួន៣ជាតំបន់លឿងទុំ រួមមានភូមិចក ភូមិព្រៃបឹង និងភូមិកម្ពោតព្រៃនៅក្នុង ឃុំបែកចាន និងកំណត់ភូមិព្រៃពពាល នៅឃុំពើក ស្រុកអង្គស្នួលជាតំបន់លឿង។

បើតាមរដ្ឋបាលខេត្តការបិទខ្ទប់តំបន់ទាំងនោះ មានរយៈពេល១៤ថ្ងៃគឺចាប់ពីថ្ងៃទី០១រហូតដល់ថ្ងៃទី១៤ខែឧសភាឆ្នាំ២០២១ខាងមុខនេះ។

ការសម្រេចបិទខ្ទប់នេះដោយសារនៅក្នុងឃុំបែកចាន មានការឆ្លងរាល់ដាលជំងឺកូវីដ១៩កើនឡើងជាបន្តបន្ទាប់ ពិសេសទៅលើកម្មករកម្មការិនី បម្រើការងារនៅតាមរោងចក្រនៅក្នុងស្រុកអង្គស្នួល។

ក្នុងការទប់ស្កាត់ជំងឺកូវីដ១៩នេះ អាជ្ញាធរខេត្តកណ្តាល សម្រេចផ្អាកដំណើរការអាជីវកម្មផ្សារបែកចានរយះពេល​២​សប្តាហ៍​គិតចាប់ពីថ្ងៃទី២៩ ខែមេសា ដល់ ថ្ងៃទី ១២ ឧសភា ឆ្នាំ២០២១៕

អត្ថបទ៖ សំអឿន