លោក ជួន ណារិន្ទ៖ សមត្ថកិច្ចមិនអនុញ្ញាតឲ្យយក​ដងផ្លូវសាធារណៈជាទីលានលេងគប់ទឹក ឬប៉ាតម្សៅឡើយ

ក្នុងឱកាសបុណ្យចូលឆ្នាំប្រពៃណីជាតិខ្មែរដែលនឹងខិតចូលមកដល់នៅពេលខាងមុខនេះ កម្លាំងនគរបាលនៃស្នងការដ្ឋាននគរបាលរាជធានីភ្នំពេញ នឹងប្រើប្រាស់កម្លាំងជាង២ពាន់នាក់ដើម្បីការពារសុខសុវត្ថិភាពជូនប្រជាពលរដ្ឋ។ ជាមួយគ្នានេះ សមត្ថកិច្ចក៏មិនអនុញ្ញាតឲ្យយកដងផ្លូវសាធារណៈធ្វើជាទីលានលេងគប់ទឹក ជះទឹក ឬប៉ាតម្សៅនោះឡើយ បើមិនធ្វើតាមការណែនាំ សមត្ថកិច្ចនឹងចុះឃាត់យកមកស្នាក់ការប៉ុស្ដិ៍នៅតាមមូលដ្ឋាននីមួយៗ។ នេះជាការលើកឡើងរបស់លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនៃស្នងការដ្ឋាននគរបាលរាជធានីភ្នំពេញ កាលពីថ្ងៃទី៧មេសា នេះ។

លោក ជូន ណារិន្ទ បន្ថែមថា ការលេងគប់ទឹក​ ជះទឹក ឬប៉ាតម្សៅនៅលើដងផ្លូវសាធារណៈអាចបង្កប៉ះពាល់ខ្ពស់ដល់លំហូរចរាចរណ៍ និងប៉ះពាល់ពលរដ្ឋអ្នកដំណើរដែលបើកឆ្លងកាត់ និងអាចប្រឈមគ្រោះថ្នាក់នានាជាយថាហេតុ។

លោក ជូន ណារិន្ទ បញ្ជាក់ថា ក្នុងឱកាសបុណ្យចូលឆ្នាំខ្មែរប្រពៃណីជាតិ ក្រុមយុវជនដែលចេញពីទីតាំងសប្បាយភាព ហើយជិះម៉ូតូជាក្រុមៗ បង្កភាពឈូឆរស្រែកឡូឡា ឬស៊ីផ្លេម៉ូតូតាមទីសាធារណៈ សមត្ថកិច្ចនឹងប្រើវិធានការឃាត់ដោយមិនបណ្តោយឱ្យបង្កភាពអនាធិបតេយ្យលើដងផ្លូវនោះឡើយ៕

អត្ថបទ៖ សុភា