ព័ត៌មានជាតិ

នគរបាលខណ្ឌសែនសុខ ហៅយុជនក្រុមសម្រួលចរាចរណ៍ មកណែនាំ និងដកហូតឯកសណ្ឋាន

បានផុស

១ year មុន

នៅ

ថ្ងៃព្រហស្បតិ៍ ១០ មេសា ២០២៥

ដោយ

ភ្នំពេញ ៖ កម្លាំងនគរបាលខណ្ឌសែនសុខ បានហៅយុវជនដែលបង្កើតក្រុមធ្វើ ជាអ្នកសម្រួលចរាចរណ៍ និងមានពាក់ឯកសណ្ឋានឈុតដូចគ្នា ចំនួន៤នាក់ យកទៅធ្វើការអប់រំណែនាំ ដកហូតឯកសណ្ឋាន បន្ទាប់ពីពួកគេទៅសម្រួលចរាចរណ៍នៅមហាវិថីសហព័ន្ធរុស្ស៊ី ស្ថិតក្នុងសង្កាត់ទឹកថ្លា ខណ្ឌសែនសុខ។

នៅព្រលប់នៅថ្ងៃទី១០ ខែមេសា ឆ្នាំ២០២៥នេះ ហើយក្រុមនេះសមត្ថកិច្ចបានឱ្យដឹងថា គឺជាក្រុមដែលធ្លាប់ជិះម៉ូតូបើកផ្លូវមុខរថយន្ដសង្គ្រោះបន្ទាន់ ហើយត្រូវបានអាជ្ញាធរ និងសមត្ថកិច្ចហាមឃាត់ជាច្រើនលើកច្រើននាពេលកន្លងមក។

នៅចំពោះមុខសមត្ថកិច្ច យុវជន ប៉ូ លីហេង ដែលជាប្រធានក្រុម ក៏បានសន្យាថា ខ្លួន និងក្រុមដែលបានចងក្រងនោះ នឹងមិនធ្វើសកម្មភាពបែបនេះបន្ដទៀតឡើយ ហើយទទួលយកនូវអ្វីដែលជាការអប់រំណែនាំរបស់កម្លាំងសមត្ថកិច្ច។

មួយរយៈកន្លងទៅនេះ គេសង្កេតឃើញថា យុវជនមួយក្រុមនេះ បានជួយសម្រួលផ្លូវឱ្យរថយន្ដសង្គ្រោះបន្ទាន់ ពេលខ្លះបានបង្កឱ្យមានការប៉ះពាល់ដោយកាយវិការ ឬសម្ដីមិនសមរម្យជាមួយអ្នកដំណើរផ្សេងទៀត ហើយខ្លះទៀតជ្រុលហួសលើសពីតួនាទីភារកិច្ច។

សូមរំលឹកថា ប៉ុន្មានថ្ងៃកន្លងទៅនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ទើបបានណែនាំឲ្យបញ្ឈប់ការជិះម៉ូតូបើកផ្លូវមុខរថយន្ដសង្គ្រោះបន្ទាន់ ពីសំណាក់យុវជនមួយក្រុម ដែលអាចបង្កគ្រោះថ្នាក់ដល់អ្នកដំណើរដទៃផ្សេងទៀត។ យុវជនមួយក្រុមនោះ គឺជាក្រុមឈ្មោះ ប៉ូ លីហេង នេះតែម្ដង។

ទោះជាយ៉ាងណាក្ដី នៅពេលនេះសកម្មភាពរបស់ក្រុមយុវជនខាងលើ ត្រូវបានសមត្ថកិច្ចហាមឃាត់ និងណែនាំឱ្យបញ្ឈប់សកម្មភាព ពោលទុកភារកិច្ចឱ្យកម្លាំងសមត្ថកិច្ច និងរថយន្ដសារ៉ែនជាអ្នកបើកផ្លូវវិញ ដោយហេតុថា សកម្មភាពនេះពិតជាអាចបង្កគ្រោះថ្នាក់ទាំងខ្លួនឯង និងអ្នកដំណើរផ្សេងទៀត៕

ដោយ ៖ សំណាង