នាយករដ្ឋមន្ត្រី៖ ទំនាក់ទំនងចិន និងកម្ពុជានៅតែរឹងមាំ

នាយករដ្ឋមន្ត្រីសម្ដេចធិបតី ហ៊ុន ម៉ាណែត បាន​ឆ្លើយតបទៅនឹងការវិភាគរបស់ជនបរទេស និងខ្មែរមួយចំនួនដែលវិភាគថា​ទំនាក់ទំនងរវាងកម្ពុជា-ចិន​បច្ចុប្បន្នលកាន់តែធាក់ថយ មិនមានការជឿទុកចិត្តគ្នាថាជាការនិយាយខុស ខណៈដែលមានសមិទ្ធផលរវាងកម្ពុជា-ចិនត្រូវបានសម្ពោធជាបន្តបន្ទាប់។

ក្នុងពិធីសម្ពោធបើកឱ្យប្រើប្រាស់ជាផ្លូវការផ្លូវជាតិលេខ៧១សេ នៅខេត្តត្បូងឃ្មុំ ព្រឹកថ្ងៃទី១២ ខែមេសា ឆ្នាំ២០២៥ សម្ដេចធិបតី​ ហ៊ុន ម៉ាណែត បាន​លើកយក​ មហាវិថី ស៊ីជីនពីង ដែលបានលើកបង្កោលឈ្មោះកាលពីខែកក្កដា ឆ្នាំ២០២៤ជាឧទាហរណ៍នៃភាពរឹងមាំនៃទំនាក់ទំនងរវាងរដ្ឋាភិបាលចិន និងរដ្ឋាភិបាល​កម្ពុជាបច្ចុប្បន្ន។ សម្ដេចបញ្ជាក់ថា ទំនាក់ទំនងរវាងកម្ពុជា-ចិននៅតែរឹងមាំ និងដើរលើគន្លងនៃការជួយគ្នាទៅវិញទៅមក​ ការគោរពអធិបតេយ្យ និងសិទ្ធិគ្នាដោយមិនលូកលាន់ក្នុងកិច្ចការផ្ទៃក្នុងរវាងប្រទេសទាំងពីរ។

សម្ដេចថា៖ «ថ្ងៃនេះគឺជាសក្ខីភាពមួយនៃការពង្រឹងទំនាក់ទំនង​រវាងកម្ពុជា-ចិន ដើម្បីផលប្រយោជន៍រួម​របស់ប្រជាជនយើង»។

សម្ដេចថាអ្នកវិភាគឱ្យគេវិភាគចុះ តែសមិទ្ធផលនៅលើដីជាក់ស្ដែងគឺជាការឆ្លើយតបទៅនឹងការវិភាគដែលគ្មានមួលដ្ឋានទាំងនោះ។

នៅប៉ុន្មានថ្ងៃខាងមុខប្រធានាធិបតីចិន លោក ស៊ី ជីងពីង នឹងធ្វើដំណើរទស្សនកិច្ចផ្លូវរដ្ឋមកកម្ពុជានៅថ្ងៃទី១៧ ខែមេសា ខាងមុខ។ ក្រសួងការបរទេសបញ្ជាក់ថា​ ដំណើរទស្សនកិច្ចផ្លូវ​រដ្ឋនេះគឺជាព្រឹត្តិការណ៍ដ៏សំខាន់ ដែលនឹងធ្វើឱ្យកាន់តែរឹងមាំថែមទៀតនូវចំណង​មិត្តភាព​ជាប្រពៃណីដែលត្រូវបាន​កសាងឡើងដោយថ្នាក់ដឹកនាំជាបន្តបន្ទាប់ នៃប្រទេសទាំងពីរ។

ក្រសួងការបរទេសថា៖ «ទស្សនៈកិច្ចនេះក៏នឹងបង្កើនសារៈសំខាន់បន្ថែមទៀតដល់​ចំណងមិត្តភាពដែកថែប និងភាព​ជាដៃគូយុទ្ធសាស្ត្រគ្រប់ជ្រុងជ្រោយរវាងប្រជាជាតិទាំងពីរ»។

កាលពីខែកុម្ភៈកន្លងទៅនៅលើបណ្ដាញទំនងទំនងសង្គមរបស់ចិន We-Media មួយចំនួនបានលើកឡើងថា​កម្ពុជាកំពុងជ្រើសរើសអាមេរិក ហើយគម្រោងកិច្ចសហប្រតិបត្តិការកម្ពុជា-ចិនកំពុងជាប់គាំង។ ជាការឆ្លើយតបអ្នកនាំពាក្យក្រសួងការបរទេសចិនលោក Guo Jiakun បានចេញមុខច្រានចោល​នឹងថាប្រទេសចិនមិនអនុញ្ញាតឱ្យមានការប្រមាថដោយចេតនាណាមួយប៉ះពាល់ដល់មិត្តភាពចិន-កម្ពុជានោះទេ ហើយអ្នកនិយាយពាក្យចចាមអារ៉ាមណាមួយនឹងត្រូវទទួលខុសត្រូវតាមផ្លូវច្បាប់ផងដែរ៕

អត្ថបទដោយ ហ៊ុន សិរីវឌ្ឍន៍