កូវីដ-១៩

ផ្ទះហូបចុកគ្រប់គ្រាន់ ប្រើទាំងម៉ាស៊ីនត្រជាក់ទៀត សូមកុំដណ្តើមជំនួយពីអ្នកខ្វះខាត

បានផុស

២ ខែ មុន

នៅ

ថ្ងៃសៅរ៍ ៨ ឧសភា ២០២១

ដោយ

ប្រមុខរដ្ឋាភិបាលសម្តេចតេជោ ហ៊ុន សែន បានលើកករណីមានបងប្អូនជាអ្នកមានធនធាន មកដណ្តើមជំនួយពីអ្នកខ្វះខាតនៅពេលរដ្ឋាភិបាលដឹកជំនួយទៅចែកដល់ប្រជាពលរដ្ឋនៅតំបន់បិទខ្ទប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចបានលើកឡើងចំៗបែបនេះ ក្រោយពេលមានបាតុភូតកើតឡើងនៅពេលរដ្ឋាភិបាលចែកចាយជំនួយ មានការទាមទារការទទួលជំនួយស្មើគ្នាពីអ្នកមានធនធានមួយចំនួន។

សម្តេចបញ្ជាក់យ៉ាងដូច្នេះថា៖ “សូមកុំទាមទារភាពស្មើគ្នា សមភាព សមធម៌ ក្នុងស្ថានភាពលំបាកនេះ។ អ្នកមានលទ្ធភាពកុំមកដណ្តើមជំនួយ ពីអ្នកខ្វះខាត នេះជាកាយវិការគួរឲ្យខ្មាសអៀនណាស់។ អ្នកខ្លះមានទាំងផ្ទះ ប្រើម៉ាស៊ីនត្រជាក់ជាច្រើនគ្រឿង មានអាហារហូបចុកគ្រប់គ្រាន់ទៅទៀត”។

សម្តេចថ្លែងថា ជំនួយរបស់រដ្ឋាភិបាលគឺផ្តល់អាទិភាពដល់បងប្អូនខ្វះខាតពិតប្រាកដ ជាពិសេសកម្មកកម្មការិនីររស់នៅតាមបន្ទប់ជួល។ សូមបងប្អូនដែលមានធនធាន មានលទ្ធភាព សូមបញ្ចេញកាយវិការមនុស្សធម៌ដល់អ្នកខ្វះខាត ដើម្បីរួមគ្នាឆ្លងផុតគ្រាលំបាកនេះ។

សម្តេចបន្តថា ជំនួយខ្លះផ្តល់មិនបានគ្រប់គ្រាន់មិនអាចប្រើប្រាស់បានយូរ ដោយសារវិធានការបិទខ្ទប់តំបន់ខ្លះមានរយៈពេលយូរថ្ងៃ។ ការដឹកជញ្ជូនជំនួយបានប្រើប្រាស់កម្លាំងយ៉ាងច្រើន មានទាំងដឹកជញ្ជូន វេចខ្ចប់ លីសែង។

ជាមួយគ្នានេះដែរ ប្រមុខរដ្ឋាភិបាលបានទទូចដល់អគ្គិសនីកម្ពុជា និងរដ្ឋាករទឹក ក៏ដូចជាម្ចាស់ផ្ទះជួល យោគយល់និងរកដំណោះស្រាយជួយដល់កម្មករដែលកំពុងជួបការលំបាក។ ការបញ្ចុះតម្លៃឬការអនុគ្រោះការយកថ្លៃឈ្នួល និងសេវាទឹកភ្លើង ដើម្បីរួមគ្នាជួយអ្នកខ្វះខាតដែលបាត់ចំណូលដោយសារការបាត់បង់ការងារ៕