Ronaldo ចង់​​ត្រឡប់​ទៅ​ Real Madrid វិញ​ ខណៈ​មាន​ក្លិប​ធំ​ពីរ​កំពុងចង់​បាន

កំពូល​ខ្សែ​ប្រយុទ្ធ Cristiano Ronaldo កំពុងសម្លឹងមើលឱកាសត្រឡប់ទៅកាន់ទ្រនំចាស់ Real Madrid វិញ មុនពេលបញ្ចប់អាជីពពីបាល់ទាត់ ស្របពេលកិច្ចសន្យារបស់​ខ្លួន​ជាមួយក្លិប​អារ៉ាប៊ីសាអ៊ូឌីត​ Al-Nassr កាន់តែកៀកនឹងផុតសុពលភាព។

ខ្សែប្រយុទ្ធសញ្ជាតិ ព័រទុយហ្គាល់ វ័យ ៤០ ឆ្នាំ កំពុងតែស្ថិតនៅក្នុងការចរចាកិច្ចសន្យាថ្មីជាមួយក្លិប Al-Nassr ខណៈកិច្ចសន្យារបស់​គាត់​នឹងផុតសុពលភាពនៅខែ មិថុនា ខាងមុខនេះ ក្រោយរួមរស់នៅទីនេះតាំងពីខែ មករា ឆ្នាំ ២០២៣ ប៉ុន្តែក្នុងពេលជាមួយគ្នានេះ គាត់ក៏បានសម្លឹងរកផ្លូវក្រោយផ្សេងរួចរាល់ហើយដែរ ប្រសិនបើការចរចាមិនបានសម្រេច។

យោងតាមការចុះផ្សាយដោយសារព័ត៌មាន El Desmarque បានឱ្យដឹងថា Ronaldo បច្ចុប្បន្នកំពុងមានការចាប់អារម្មណ៍ ដោយក្លិបធំ ២ គឺ Al-Hilal ដែល​ជា​ក្លិប​នៅ​អារ៉ាប៊ីសាអ៊ូឌីត​ផ្ទាល់​ និង​ក្លិប​អ៉ីតាលី Inter Milan។ ទោះបីជាយ៉ាងណា ខ្សែ​ប្រយុទ្ធ​រូប​នេះ​ហាក់មានបំណងចង់​វិលត្រឡប់​ទៅ​ក្លិប​ចាស់ Real Madrid ដែលជាទ្រនំ​ដ៏​ជោគជ័យ​បំផុត​ក្នុង​អាជីព​​របស់ខ្លួន។

គួររម្លឹកថា Ronaldo គឺជាកីឡាករ ដ៏ជោគជ័យបំផុតម្នាក់ជាមួយ Real Madrid ក្នុងការលេងនៅទីនោះចន្លោះពីឆ្នាំ ២០០៩ ដល់ ២០១៨។ ក្នុងនោះគាត់ធ្លាប់បានសាងស្នាដៃជាច្រើន ដោយបានរួមចំណែកជួយឱ្យក្រុមអធិរាជសឈ្នះពាន Champions League ៤ លើក, La Liga ២ លើក, Copa del Rey ២ លើក, UEFA Super Cup ៣ លើក, FIFA Club World Cup ៣ លើក និងពានមួយចំនួនទៀត៕

អត្ថបទ៖ សេម កុសល
ប្រភព៖ Sportskeeda