អភិបាលខេត្តកំពង់ចាមហាលលៀសជិត៣តោនឱ្យភ្ញៀវទេសចរទទួលទានដោយសេរីពេលចូលឆ្នាំ

អភិបាលខេត្តកំពង់ចាមលោក អ៊ុន ចាន់ដា នឹងរៀបចំដាក់ហាលលៀសជិត៣តោននៅថ្ងៃទី១៥ ខែមេសា ចំថ្ងៃទី២នៃពិធីបុណ្យចូលឆ្នាំខ្មែរខាងមុខឱ្យភ្ញៀវទេសចរដើរលេងខេត្តកំពង់ចាម​ទទួលទានដោយសេរី។

លោក អ៊ុន ចាន់ដា ប្រាប់មកកម្ពុជាថ្មីនៅថ្ងៃទី​៦ ខែមេសា ឆ្នាំ២០២៥នេះថា តុហាលលៀសនឹងតម្រៀបនៅមុខសាលាខេត្តកំពង់ចាម ដែលមានប្រវែងប្រហែល១ពាន់ម៉ែត្រដែលនឹងអនុញ្ញាតឱ្យអ្នកចូលរួមចូលទទួលទានចាប់ពីម៉ោង២រសៀលតទៅ។

លោកថា៖ «ជាផែនការកំពុងឱ្យបងប្អូនយើងសិក្សា ហើយខ្ញុំបានត្រៀមនូវមធ្យោបាយអីរួចហើយ»។

លៀសហាលខេត្តកំពង់ចាមមានភាពល្បីល្បាញមួយនាពេលបច្ចុប្បន្នអំពីទំហំរបស់លៀស និងគ្រឿងទេសដែលបានលាយ។ លៀសកំពង់ចាមស្ទើរតែក្លាយជាម៉ាកយីហោមួយដែលអ្នកលក់យកមកបង្ហាញភ្ញៀវរបស់ខ្លួន ជារឿយៗយើងតែងតែឃើញអ្នកលក់លៀសនៅភ្នំពេញ ព្រីនអក្សរធំៗប្រាប់អតិថិជនថាលៀសដែលគេលក់គឺលៀសហាលខេត្តកំពង់ចាម៕

អត្ថបទដោយ ហ៊ុន សិរីវឌ្ឍន៍