មីយ៉ាន់ម៉ា៖ ​ក្រុមសង្គ្រោះ​តួកគី ជួយ​ជីវិត​បុរសម្នាក់ ក្រោយ​ជាប់ក្រោមគំនរបាក់បែក៥ថ្ងៃ

បុរសម្នាក់ត្រូវបានក្រុមជួយសង្គ្រោះជួយសង្គ្រោះបានទាំងនៅមានជីវិត បន្ទាប់ពីជាប់គាំងអស់រយៈពេលប្រាំថ្ងៃនៅក្រោមសណ្ឋាគារ Aye Chan Thar ដែលដួលរលំដោយសារគ្រោះរញ្ជួយដីដ៏សាហាវក្នុងសង្កាត់ Ottarathiri ទីក្រុង Naypyitaw ប្រទេសមីយ៉ាន់ម៉ា។ នេះបើយោងតាមការចេញផ្សាយរបស់សារព័ត៌មាន The Irrawaddy នៅថ្ងៃទី០២ខែមេសានេះ។

បើយោងតាមនាយកដ្ឋានពន្លត់អគ្គីភ័យមីយ៉ាន់ម៉ា អគារសណ្ឋាគារ Aye Chan Thar ​កម្ពស់៦ជាន់​បាន​បាក់​រលំ​មួយ​ផ្នែក ដោយ​មាន​ពីរ​ជាន់​នៅ​ខាងក្រោមជាប់​មនុស្ស​ពីរ​នាក់។

នៅថ្ងៃពុធនេះក្រុមអ្នកជួយសង្គ្រោះដែលធ្វើការជាមួយនឹងក្រុមស្វែងរក និង​ជួយសង្គ្រោះ GEA របស់ប្រទេសតួកគី បានទាញអ្នកនៅរស់រានមានជីវិតម្នាក់ជាបុរសចេញពីគំនរបាក់បែកដោយជោគជ័យ ខណៈព័ត៌មានលម្អិតនិងស្ថានភាពរបស់បុរសនោះមិនត្រូវបានដឹងនៅឡើយនោះទេ។

កិច្ចខិតខំប្រឹងប្រែងស្វែងរក​អ្នក​ដែល​បាត់​ខ្លួន​ផ្សេងទៀត​​កំពុងបន្ត ខណៈវា​ជា​រឿងដែលមិននឹកស្មានដែលបុរសម្នាក់នេះអាចមានជីវិតបាន៥ថ្ងៃ ក្រោមគំនរបាក់បែកក្រោយរងគ្រោះរញ្ជួយដីដ៏សាហាវតាំងពីថ្ងៃសុក្រសប្ដាហ៍មុនមកម្លេះ។

កាលពីព្រឹកថ្ងៃទី០១ខែមេសាជួយសង្រ្គោះស្ត្រីអាយុ៦៣ឆ្នាំម្នាក់ ដែលបានជាប់នៅក្នុងផ្ទះល្វែងដែលដួលរលំអស់រយៈពេលប្រហែល ៩១ ម៉ោងនៅទីក្រុង Naypyitaw។

ស្រដៀគ្នានេះកាលពីថ្ងៃទី៣១ខែមេសាក៏មានក្មេងស្រីម្នាក់ត្រូវបានជួយសង្គ្រោះបានទាំងនៅរស់រានមានជីវិតផងដែរ ក្មេងស្រីនេះត្រូវបានក្រុមអ្នកជួយសង្គ្រោះជួយសង្គ្រោះបានទាំងនៅរស់រានមានជីវិត​ដ៏​មិនគួរឲ្យជឿ បន្ទាប់ពីជាប់អស់រយៈពេល​ជាង​៥០ម៉ោង នៅក្រោមគំនរសណ្ឋាគារបាក់បែកក្នុងទីក្រុង Mandalay។ បើតាមសម្ដីក្មេងស្រីប្រាប់ក្រុមអ្នកជួយសង្គ្រោះថា នាងអាចនៅរស់បានគឺដោយសារតែមានដបទឹកចំនួនបួនដបនៅក្នុងបន្ទប់របស់នាង ដែលអាចទ្រទ្រង់ជីវិតរបស់នាងបានរហូតដល់ក្រុមជួយសង្គ្រោះរកឃើញ។

សូមបញ្ជាក់ថាប្រទេសមីយ៉ាន់ម៉ាបានរងផលរងគ្រោះរញ្ជួយដីដ៏សាហាវកម្រិត៧.៧រ៉ិចទ័រ កាលពីថ្ងៃសុក្រសប្ដាហ៍មុន ហើយមកដល់ថ្ងៃទី០២ខែមេសានេះមានមនុស្សជិត៤ពាន់បានស្លាប់។ ចំនួន​អ្នក​ស្លាប់​ត្រូវ​បាន​គេ​រំពឹង​ថា​នឹង​កើន​ឡើង ខណៈ​ក្រុម​អ្នក​ជួយ​សង្គ្រោះ​បន្ត​ទាញ​យក​សាកសព​ចេញ​ពី​គំនរ​បាក់បែក៕

អត្ថបទ៖ ប៊ុន សុភាព