ទីបំផុត UEFA ប្រកាសពីការដាក់ពិន័យលើ Rudiger, Mbappe, Ceballos ហើយ

សមាគមបាល់ទាត់អឺរ៉ុប ហៅកាត់ UEFA បានប្រកាសពីការដាក់ពិន័យជាផ្លូវការលើកីឡាកររបស់​ Real Madrid ចំនួន ៣ រូបរួមមាន Antonio Rudiger, Kylian Mbappe និង Dani Ceballos ជុំវិញការប្រើកាយវិការអបអរមិនសមរម្យទល់នឹងក្រុម Atletico Madrid នៅក្នុងពានរង្វាន់ Champions League។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រឿងរ៉ាវដ៏ចម្រូងចម្រាស់នេះបានកើតឡើង​ បន្ទាប់ពីកីឡាករ Real Madrid ទាំង ៣ នាក់ខាងលើ បង្ហាញកាយវិការអបអរជ័យជម្នះលក្ខណៈឌឺដងទៅកាន់ក្រុម At Madrid ក្រោយពួកគេទម្លាក់ក្រុមរួមលីគមួយនេះចេញពីពាន UCL ត្រឹមវគ្គ ១៦ ក្រុមចុងក្រោយ បន្ទាប់ពីយកឈ្នះនៅវគ្គបាល់កាត់សេចក្តី ១១ ម៉ែត្រក្នុងលទ្ធផល ៤-២។

យ៉ាងណាមិញ ក្រោយការពិនិត្យយ៉ាងល្អិតល្អន់ UEFA បានចេញសេចក្តីសម្រេចជាផ្លូវការ ដោយបានពិន័យលើ Rudiger ជាទឹកប្រាក់ចំនួន ៤៤,០០០ ដុល្លារអាមេរិក, Mbappe ចំនួន ៣៣,០០០ ដុល្លារអាមេរិក និង Ceballos ចំនួន ២២,០០០ ដុល្លារអាមេរិក។ ទោះបីជាយ៉ាងណាក៏ដោយ អាចថាជាដំណឹងល្អផងដែរ ដែលអ្នកទាំង ៣ មិនត្រូវពិន័យព្យួរការប្រកួតនៅក្នុងពាន UCL ឡើយ។

ដោយឡែក Vinicius Jr. វិញ ក៏បានចូលរួមក្នុងការអបអរនេះផងដែរ ប៉ុន្តែគិតត្រឹមពេលនេះ UEFA មិនទាន់ចេញសេចក្តីសម្រេចដាក់ពិន័យលើរូបគេនៅឡើយទេ ដោយពេលនេះកីឡាករសញ្ជាតិ ប្រេស៊ីល វ័យ ២៤ ឆ្នាំ កំពុងស្ថិតនៅក្នុងការស៊ើបអង្កេតបន្តទៀតសិន៕

អត្ថបទ៖ សេម កុសល
ប្រភព៖ AP