ប្រគល់ថវិកានិងគ្រឿងឧបភោគបរិភោគជូនគ្រួសារសព នៅបឹងសាឡាងជាលើកទី២

លោក ឯក ឃុនដឿន អភិបាលខណ្ឌទួលគោក នាថ្ងៃទី២០ខែមីនា ឆ្នាំ២០២១នេះ បាននាំយកអំណោយ ជាថវិកាចំនួន១០​លានរៀលនិងគ្រឿងឧបភោគបរិភោគរបស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ជូន គ្រួសារសពលោក អនុសេនីយ៍ត្រី គឹម ឃីស៊ុន ដែលបានទទួលមរណភាពដោយជំងឺកូវីដ-១៩។

លោកឯក ឃុនដឿន ក្នុងឱកាសនោះបានថ្លែងការអរគុណចំពោះថ្នាក់ដឹកនាំគ្រប់លំដាប់ថ្នាក់ ជាពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលតែងតែគិតគូពីសុខទុក្ខរបស់បងប្អូនប្រជាពលរដ្ឋ និងបានចាត់តំណាងមកចូលរួមរំលែកទុក្ខ និងនាំយកនូវគ្រឿងឧបភោគបរិភោគ និងថវិកា ១០លានរៀល ជូនដល់គ្រួសារសពលោក គឹម ឃីស៊ុន ដែលបានទទួលមរណភាពដោយសារជម្ងឺកូវីដ-១៩។

លោកឯក ឃុនដឿន បានណែនាំអោយក្រុមគ្រួសារសព កុំអស់សង្ឃឹម ត្រូវបន្តការថែទាំសុខភាព ហូបស្អាត ផឹកស្អាត រស់នៅស្អាត និងត្រូវអនុវត្តនវិធានការបង្ការ និងទប់ស្កាត់ការឆ្លងរីករាលដាលក្នុងសហគមន៍នៃជំងឺកូវីដ-១៩ និងឈានទៅដល់ការបិទបញ្ចប់ព្រឹត្តិការណ៍២០កុម្ភៈ ដោយផ្តោតលើសារគន្លឹះរបស់ក្រសួងសុខាភិបាល “រស់នៅធម្មតា តាមបែបគន្លងថ្មី” និង” ៣កុំ ៣ការពារ ២ចូលរួម”។

៣ការពារ គឺ លាងដៃ ពាក់ម៉ាស់ រក្សាគម្លាត ។ ៣កុំ គឺ កុំទៅកន្លែងមនុស្សច្រើន កុំនៅកន្លែងបិទជិត កុំប៉ះពាល់គ្នា”។ ២ចូលរួម គឺ ចូលរួមស្កេនកូដទីតាំងទប់ស្កាត់កូវី១៩ ចូលរួមវាក់សាំងការពារកូវីដ១៩។
លោក អនុសេនីយ៍ត្រី គឹម ឃីស៊ុន រស់នៅផ្ទះលេខ១៥ ផ្លូវ២៥៥ សង្កាត់បឹងសាឡាង ខណ្ឌទួលគោក រាជធានីភ្នំពេញ បានទទួលមរណភាពដោយជំងឺកូវីដ-១៩ កាលពីល្ងាចម្សិលមិញនៅមន្ទីរពេទ្យរុស្ស៊ី៕

អត្ថបទ៖ ស្រីរ័ត្ន