ព័ត៌មានអន្ដរជាតិ

ការលក់ EV របស់ Tesla បន្តធ្លាក់ចុះធ្ងន់ធ្ងរ នៅបណ្ដាប្រទេសអឺរ៉ុប

បានផុស

១ year មុន

នៅ

ថ្ងៃអង្គារ ១ មេសា ២០២៥

ដោយ

ការលក់រថយន្តអគ្គិសនី (EV) របស់ក្រុមហ៊ុនផលិតរថយន្តអគ្គិសនី Tesla បានបន្តធ្លាក់ចុះធ្ងន់ធ្ងរកាលពីខែមីនា នៅតាមបណ្ដាប្រទេសអឺរ៉ុប រួមមានបារាំង និងស៊ុយអែត ដែលធ្វើឱ្យការលក់ប្រចាំត្រីមាសរបស់ក្រុមហ៊ុនលោក អេឡុន ម៉ាសក៍ មួយនេះ ធ្លាក់ចុះដល់កម្រិតទាបបំផុតរាប់តាំងពីដើមឆ្នាំ ២០២១។ នេះបើតាមការចុះផ្សាយរបស់សារព័ត៌មាន Bloomberg។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងខែមីនា ក្រុមហ៊ុន Tesla បានលក់រថយន្តចំនួន ៣ ១៥៧ គ្រឿង ក្នុងប្រទេសបារាំង ធ្លាក់ចុះ ៣៦,៨៣ ភាគរយ ធៀបនឹងរយៈពេលដូចគ្នាកាលពីឆ្នាំមុន ខណៈបាន ៩១១ គ្រឿង នៅស៊ុយអែត ដោយធ្លាក់ចុះ ៦៣,៩ ភាគរយ។ នេះបើយោងតាមទិន្នន័យផ្លូវការ ចេញផ្សាយនៅថ្ងៃអង្គារនេះ។ ការលក់ប្រចាំត្រីមាសរបស់ក្រុមហ៊ុនដដែល មានចំនួនសរុប ៦ ៦៩៣ នៅបារាំង និង ១ ៩២៩ គ្រឿង នៅស៊ុយអែត។

អ្នកវិភាគលើកឡើងថា ទិន្នន័យពីប្រទេសបារាំង ស៊ុយអែត និងទីផ្សារអឺរ៉ុបសំខាន់ៗផ្សេងទៀត នឹងផ្តល់ការយល់ដឹងអំពីការលក់នៅត្រីមាសទី ១ ជាសកលរបស់ក្រុមហ៊ុន Tesla ក៏ដូចជាបម្រែបម្រួលនៃទំនុកចិត្តរបស់អ្នកប្រើប្រាស់សម្រាប់ម៉ាកយីហោររបស់លោក ម៉ាសក៍។

គួរគូសបញ្ជាក់ថា ក្រុមហ៊ុន Tesla មើលឃើញពីបញ្ហាប្រឈមកាន់តែច្រើនឡើងៗ ដែលជំរុញដោយកត្តាផ្សេងៗគ្នា រួមទាំងកំណើននៃការប្រកួតប្រជែងនៃក្រុមហ៊ុនចិន ការពាក់ព័ន្ធរបស់លោក ម៉ាសក៍ ក្នុងនយោបាយអាមេរិក និងការគាំទ្ររបស់លោកលើក្រុមនយោបាយស្ដាំនិយមអាល្លឺម៉ង់ និងការបង្ហាញជាសាធារណៈលើទំនោរគាំទ្របក្សណាហ្ស៊ីអាល្លឺម៉ង់ជាដើម។

អ្នកជំនាញលើកឡើងថា ការណ៍ទាំងនេះ ធ្វើឱ្យប៉ះពាល់ដល់ទំនុកចិត្តអ្នកប្រើប្រាស់ ឈានទៅដល់ការលួចបំផ្លិចបំផ្លាញរថយន្ត Tesla នៅសាធារណៈ និងការធ្វើពហិការមិនប្រើប្រាស់ជាដើម៕