ទូកទេសចរណ៍ផ្ទុកមនុស្ស ៣៦នាក់ ផ្ទុះឆេះនៅ ថៃ

តាមរបាយការណ៍របស់ The Metro នៅថ្ងៃអង្គារទី១ខែមេសាឆ្នាំ២០២៥ ទូកដឹកភ្ញៀវទេសចរបរទេសមួយគ្រឿង បានផ្ទុះឆេះនៅសមុទ្រភូកេត នៃប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទូកទេសចរណ៍នេះ មានដឹកភ្ញៀវនិងនាវិកសរុប៣៦នាក់ បានឆាបឆេះក្បែរកោះ Maiton នាវេលាម៉ោង៩ព្រឹក ប៉ុន្តែជាសំណាងល្អ មិនមានមនុស្សបាត់បង់ជីវិតទេ គ្រាន់តែរបួស៦នាក់ ខណៈអ្នកខ្លះលោតចុះពីទូកហែលទៅគោក។

ទន្ទឹមនោះ Bangkok Post ផ្សាយថា ទូក Thana Marine 555 បានចេញពីផែ Tha Chalong ក្នុងដំណើរឆ្ពោះទៅកោះ Mai Thon ហើយក៏ជួបបញ្ហាម៉ាស៊ីន បណ្តាលឲ្យឆាបឆេះតែម្តង។

ពាក់ព័ន្ធឧបទ្ទវហេតុនេះ អាជ្ញាធរដែនសមុទ្រថៃ បានបើកការស៊ើបអង្កេតរួចហើយ។

នេះគឺជាហេតុការណ៍អាក្រក់ថ្មីទៀតដែលវាយប្រហារប្រទេសថៃ ខណៈប្រជាជាតិអាស៊ីអាគ្នេយ៍មួយនេះ មិនទាន់ធូរស្បើយផងពីឥទ្ធិពលនៃគ្រោះរញ្ជួយដីកម្រិត៧.៧រ៉ិចទ័រ បណ្តាលឲ្យមានមនុស្សស្លាប់ និងបង្កការបំផ្លិចបំផ្លាញ ជាពិសេសក្នុងរាជធានីបាងកក។

តួលេខគិតត្រឹមថ្ងៃអង្គារទី១ខែមេសា មនុស្សស្លាប់ក្នុងគ្រោះរញ្ជួយដីដែលជះឥទ្ធិពលមកពីប្រទេសមីយ៉ាន់ម៉ា បានកើនឡើងដល់១៩នាក់ហើយ ខណៈ៧០នាក់បាត់ខ្លួន។

មនុស្សស្លាប់ភាគច្រើនគឺ ដោយសារបាក់អគារសវនកម្មរដ្ឋដែលកំពុងសាងសង់នៅក្នុងខណ្ឌ ចតុចក្រ៕

អត្ថបទ៖ សុខ សុវណ្ណ

ចុចអាន៖ ថៃ រកឃើញសពមនុស្ស ៦នាក់ទៀត នៅក្នុងគំនរអគារបាក់រលំ