សុវត្ថិ មុនីនាគ ធ្វើឱ្យអ្នកគាំទ្រវិស័យចម្រៀងនៅកម្ពុជា ពោលសរសើរសឹងគ្រប់គ្នា ក្រោយបង្ហាញ MVចម្រៀងថ្មី

តាមរយៈ MV ចម្រៀងជាភាសាបរទេសក្នុងគោលដៅឆ្ពោះទៅកាន់ឆាកអន្តរជាតិ កូនប្រុសទី២ របស់ឧកញ៉ា ព្រាប សុវត្ថិ បានធ្វើឱ្យអ្នកគាំទ្រវិស័យចម្រៀងនៅកម្ពុជា កោតស្ញប់ស្ញែងនូវសមត្ថភាពរាំនិងច្រៀង ពិសេសសកម្មភាពទាំងមូលក្នុង MV ដែលជាការផលិតខុសប្លែកពីការផលិតចម្រៀងក្នុងស្រុក ដោយធ្វើតាមកម្រិតស្តង់ដាអន្តរជាតិ។

កាលពីចុងខែកុម្ភៈកន្លងទៅ កំពូលតារាចម្រៀង ព្រាប សុវត្ថិ បានប្រកាសនូវអាល់ប៊ុមចម្រៀងកូនប្រុសរបស់ខ្លួន ដែលសាធារណជនបានជ្រាបហើយថា នោះជាការបោះជំហានថ្មីលើវិថីសិល្បៈរបស់ សុវត្ថិ មុនីនាគ ក្រោយសំងំហ្វឹកហាត់ដុះខាត់សមត្ថភាពលើដុង្គសិល្បៈដែលខ្លួនមាន ជាមួយសាលាកម្រិត Hollywood ។

តួយ៉ាង កាលពីពេលថ្មីៗនេះ មុនីនាគ ក៏បានបញ្ចេញវីដេអូចម្រៀងមួយ ក្នុងចំណោមការផលិតបទរបស់ខ្លួន ធ្វើឱ្យមហាជនពោលសរសើរច្រើន ខណៈខ្លះបានលើកជាយោបល់ថា បើសិនជាតារាចម្រៀងរូបនេះ អាចចាប់ដៃគ្នាជាមួយតារាចម្រៀងក្រៅស្រុកទៀតនោះ នឹងមានឈ្មោះបោះសំឡេងលើឆាកអន្តរជាតិ ជាក់ជាមិនខាន។

ដ្បិតវីដេអូចម្រៀង Full MV របស់សិស្សដែលទើបបញ្ចប់ការសិក្សាផ្នែករាំនិងច្រៀងមួយនេះ ទើបបញ្ចេញឱ្យអ្នកគាំទ្រក្នុងស្រុក ទស្សនាបានមួយបទក៏ពិតមែន ប៉ុន្តែមួយបទនេះ បានធ្វើឱ្យសាធារណជន ទទួលស្គាល់ថា លោកជាតារាចម្រៀងឈាមជ័រជាខ្មែរម្នាក់ពេញដោយទេពកោសល្យសិល្បៈ។ ពិសេស ការច្រៀងជាមួយនឹងការប្រើប្រាស់តុងនៃភាសាអង់គ្លេសយ៉ាងស្ទាត់ជំនាញ ព្រមនឹងក្បាច់រាំដ៏បុិនប្រសប់ មុនីនាគ បានធ្វើឱ្យមហាជនពោលសរសើរថា “ច្រៀងបានល្អ ស្មានតែតារាស្រុកគេ”។

គួរជម្រាបដែរ ក្នុងចំណោមបងប្អូនប្រុសដែលសុទ្ធតែមានដុង្គសិល្បៈដូចគ្នា មិនខុសពីលោកពុក
កូនប្រុសទី២ របស់ឧកញ៉ា ព្រាប សុវត្ថិ រូបនេះ បានឈានមួយជំហានទៀតក្នុងវិថីចម្រៀងសម័យ ក្រៅពីច្រៀង មុនីនាគ ជាអ្នករាំដ៏ពូកែ ចេះនិពន្ធចម្រៀង និងលេងឧបករណ៍តន្រ្តីយ៉ាងស្ទាត់ជំនាញថែមទៀតផង៕