បុរសម្នាក់ ប្រើអំហិង្សាលើប្រពន្ធ ត្រូវបានឃាត់ខ្លួនទៅកាន់នគរបាលបរកែវ ដើម្បីផ្តន្ទាទោសតាមច្បាប់

អាជ្ញាធរស្រុកបរកែវ ខេត្តរតនគិរី បានឃាត់ខ្លួនបុរសម្នាក់ដែលប្រើអំពើហិង្សាដោយចេតនាលើប្រពន្ធ យកទៅអនុវត្តតាមផ្លូវច្បាប់ បន្ទាប់ពីករណីនេះត្រូវបានចែកចាយពេញបណ្តាញសង្គម។

បើតាមសមត្ថកិច្ចបានឱ្យដឹងថា បុរសជាប្តី ដែលប្រើអំពើហិង្សាលើប្រពន្ធ មានឈ្មោះ ទីង ជឿន អាយុ ៥៦ឆ្នាំ ជនជាតិទំពួន មានទីលំនៅបច្ចុប្បន្ន ភូមិប៉ាអរ ឃុំកិចុង ស្រុកបរកែវ ខេត្តរតនគិរី ។ បុរសនេះ បានប្រើអំពើហិង្សារទៅលើប្រពន្ធរបស់ខ្លួន ឈ្មោះ រចំ ហែន ភេទស្រី អាយុ៣០ ឆ្នាំ មុខរបរមុខរបរកសិករ ជនជាតិទំពួន មានទីលំនៅបច្ចុប្បន្ន ភូមិប៉ាអរ ឃុំកិចុង ស្រុកបរកែវ ខេត្តរតនគិរី ។ ស្ត្រីរងគ្រោះបានរងរងរបួស កំពុងសម្រាកព្យាបាលនៅមណ្ឌលសុខភាព ឃុំកិះចុង ។

តាមចម្លើយសារភាពរបស់ជនសង្ស័យ ឈ្មោះ ទីង ជឿន បានសារភាពថា ខ្លួនពិតជាបានស្រវឹងស្រា ហើយបានប្រព្រឹត្តអំពីហឹង្សាវាយទៅលើប្រពន្ធ ឈ្មោះ រចំ ហែន ពិតប្រាកដមែន។

បច្ចុប្បន្នជនល្មើសត្រូវបានឃាត់ខ្លួន នៅអធិការដ្ឋាននគរបាលបរកែវ ដើម្បីកសាងសំណំុរឿងបញ្ជូនទៅកាន់អយ្យការអមសាលាដំបូងខេត្តរតនគិរី តាមនីតិវិធីច្បាប់៕

ដោយ៖ ខៀវ ចាប