ប្រធានសភាថា រដ្ឋសភាមិនមែនចាំតែចាប់កំហុសរដ្ឋាភិបាលទេតែត្រូវសហការដើម្បីភាពជោគជ័យ

ប្រធានរដ្ឋសភាកម្ពុជា សម្ដេចសភាធិការធិបតី ឃួន សុដារី បានយល់ស្របជាមួយប្រធានសភាម៉ាឡេស៊ីលោក តាន់ស្រ៊ី ដាតូ ហ្សូហារី ប៊ីន អាប់ឌុល (Tan Sri Dato (Dr.) Johari Abdul) ដែលបានលើកឡើងពីតួនាទីរបស់រដ្ឋសភាក្នុងការជួយដល់ដំណើរការរបស់សង្គមជាតិដោយបានលើកឡើងថាតួនាទីរបស់អង្គនីតិបញ្ញាត្តិមិនមែនមែនចាំតែចាប់កំហុសរបស់រដ្ឋាភិបាលនោះទេ។

ថ្លែងក្នុងជំនួបជាមួយប្រធានសភាម៉ាឡេស៊ីកាលពីថ្ងៃទី២៥ ខែមីនា នឹងត្រូវបានអ្នកនាំពាក្យសភាលោក កែវ ពិសិដ្ឋ ដកស្រង់មកប្រាប់អ្នកកាសែតថា ភាគីទាំងពីរបានលើកឡើងពីភាពចាំបាច់ដែលរដ្ឋសភាត្រូវបង្កើតទំនាក់ទំនងល្អជាមួយរដ្ឋាភិបាលដើម្បីសម្រេចគោលដៅនៃការអភិវឌ្ឍន៍ប្រទេសជាតិ។

លោក កែវ ពិសិដ្ឋ បានលើកឡើងថា៖ «កាលណារដ្ឋសភាចាំតែចាប់កំហុសរដ្ឋាភិបាលនោះរដ្ឋាភិបាលមិនអាចដើរទៅមុខបានឆ្ងាយទេ! ហើយអ្នកដែលទទួលរងគ្រោះនោះគឺប្រជាពលរដ្ឋផ្ទាល់តែម្ដង»។

លោកបន្ថែមថាយុទ្ធសាស្ត្រដែលសម្ដេចប្រធានសភាលើកឡើងនោះ គឺការធ្វើកិច្ចសហការរួមគ្នារវាងរដ្ឋសភា និងរាជរដ្ឋាភិបាល​ដើម្បីឱ្យសម្រេចបាននូវគោលដៅដែលបានដាក់ចេញ។  

មួយរយៈចុងក្រោយនេះក្រៅពីការចុះមូលដ្ឋានរបស់សមាជិកសភា និងការជួបជាមួយក្រសួងសំខាន់ៗរបស់កម្ពុជា រដ្ឋសភាកម្ពុជាបានរៀបចំវេទិកាជាបន្តបន្ទាប់ជាមួយក្រសួងសា្ថប័នទាំងនោះដើម្បីឱ្យក្រសួងធ្វើបទបង្ហាញពីវឌ្ឍនភាពការងារ និងទិសដៅរបស់ខ្លួនជម្រាបសមាជិកសភា និងសាធារណៈជនឱ្យបានដឹងផងដែរ។

ក្នុងពិធីបើកវេទិកាផ្សព្វផ្សាយស្ដីពីវឌ្ឍនភាពនៃវិស័យឧស្សាហកម្ម វិទ្យាសាស្ត្រ បច្ចេកវិទ្យា និងនិនានុវត្តន៍ ដែលធ្វើឡើងនៅសាលសន្និសីទសភាកាលពីថ្ងៃទី២៥ ខែមីនា ឆ្នាំ២០២៥ សម្ដេចសភាធិការធិបតី បានលើកឡើងថាការរៀបចំវេទិកានេះគឺដើម្បីជួយដល់សមាជិកសភាបានយល់ដឹងពីកិច្ចដំណើរការនយោបាយរបស់រដ្ឋាភិបាល ព្រមទាំងបានយល់ដឹងបន្ថែមថ្មីផងដែរ។

អ្នកនាំពាក្យរដ្ឋសភាលោក កែវ ពិសិដ្ឋ បានបញ្ជាក់ថាការរៀបចំព្រឹត្តិការណ៍ដែលមានជាប្រចាំនេះគឺជាណែនាំរបស់ប្រធានសភាក្នុងការធ្វើកំណែទម្រង់ការងាររបស់មន្ត្រីរដ្ឋបាល និងសមាជិកសភា ព្រមទាំងការធ្វើទំនើបភាវរូបនីយកម្មនៅសភាផងដែរ។

សកម្មភាពទាំងនេះត្រូវបានដាក់ជាផែនការប្រចាំឆ្នាំដែលរួមមានព្រឹត្តិការណ៍ថ្នាក់ជាតិ ព្រឹត្តិការណ៍សភានិងព្រឹទ្ធសភា ព្រមទាំងសភានិងរាជរដ្ឋាភិបាល ដើម្បីចង់ជំរុញនូវកិច្ចសហប្រតិបត្តិការជាមួយរដ្ឋាភិបាលស្វែងរកពីចំណុចចន្លោះប្រហោងនិងរួមគ្នាដោះស្រាយ។

គួរឱ្យដឹងដែរថាក្នុងខែមីនានេះសភាបានរៀបចំវេទិកាចំនួន៣រួចហើយជាមួយស្ថាប័នរាជរដ្ឋាភិបាលរួមមាន ក្រសួងកិច្ចការនារី ធនាគារជាតិ និងក្រសួងឧស្សាហកម្ម ខណៈនៅចុងខែមីនានេះក៏នឹងមានរៀបចំវេទិកាមួយទៀតស្ដីពីសិក្ខាសាលាសភាថ្នាក់តំបន់ស្តីពី «បម្រែបម្រួលប្រជាសាស្ត្រ និងជំងឺមិនឆ្លង៖ គោលនយោបាយឆ្លើយតបបញ្ហាប្រឈមសម្រាប់ប្រជាជនសកម្ម និងយុវជន» ដែលគ្រោងរៀបចំឡើងនៅថ្ងៃទី៣១ ខែមីនា ឆ្នាំ២០២៥ ខាងមុខ៕

អត្ថបទដោយ ហ៊ុន សិរីវឌ្ឍន៍