៥ ឆ្នាំ ចុងក្រោយ​ ​វិស័យ​ទូរគមនាគមន៍​កម្ពុជា​សម្រេច​បាន​​វឌ្ឍនភាព​អ្វីខ្លះ?

វិស័យ​ទូរគមនាគមន៍​បាន​រួមចំណែក​យ៉ាង​សំខាន់​លើ​ការ​តភ្ជាប់​ឌីជីថល ខណៈ​ដែល​រដ្ឋាភិបាល​​ជំរុញ​ការ​ប្រើប្រាស់​បច្ចេកវិទ្យា​​ឌីជីថល​ ក្នុង​ដំណើរការ​កសាង​ពលរដ្ឋ​ឌីជីថល រដ្ឋាភិបាល​ឌីជីថល និង​ការ​ធ្វើ​ធុរកិច្ច​ឌីជីថល​​យ៉ាង​ស្វាហាប់។

ដោយឡែក កាលពី​ពេល​ថ្មីៗ​នេះ​ ក្រសួងប្រៃសណីយ​និង​ទូរគមនាគមន៍ បាន​​​រៀបចំ​ធ្វើ​សន្និបាត​ប្រចាំឆ្នាំ​បង្ហាញពី​សមិទ្ធផលការងារ​​រយៈពេល ៥ ឆ្នាំ ក្នុង​ដំណើរ​ឆ្ពោះ​ទៅ​បរិវត្តកម្ម​ឌីជីថល។ ក្នុង​នោះ​ក្រសួង​បាន​បង្ហាញ​ពីកិច្ចការធំៗ​​​ដែល​​ក្រសួង​អនុវត្ត​លើ​​វិស័យ​ទូរគមនាគមន៍ ដែល​ត្រូវ​បាន​ចាត់​ទុក​ជា​មូលដ្ឋាន​នៃ​ការ​ធ្វើ​បរិវត្តកម្ម​ឌីជីថល​ ដែល​ក្នុង​រយៈពេល ៥ ឆ្នាំ សម្រេច​បាន​លទ្ធផល​ធំៗមាន​ជាអាទិ៍​ដូច​ជា៖

-រៀបចំ និងដាក់ឱ្យអនុវត្ត​លិខិត​បទដ្ឋាន​គតិយុត្ត ដើម្បីពង្រឹង​អភិបាលកិច្ច សម្រួល​ដល់ធុរកិច្ច និងការពារ​ផលប្រយោជន៍ស្របច្បាប់របស់អ្នកប្រើប្រាស់

-ផ្តល់​អាជ្ញាបណ្ណប្រតិបត្តិការ​ទូរគមនាគមន៍​សរុប ៥៩ ក្នុងនោះ អាជ្ញាបណ្ណទូរសព្ទ ៤ អាជ្ញាបណ្ណខ្សែ​កាប​អុបទិកក្រោម​បាត​សមុទ្រ ២ ខ្សែកាបអុបទិកលើគោក ៥ និង​អីនធឺណិត ៣៩។ អ្នកប្រើប្រាស់ សេវា​ទូរសព្ទមានចំនួនប្រមាណ ២០,៦ លាន និង​សេវាអ៊ីនធឺណិត​មានចំនួនប្រមាណ ១៩ លាន។

-ជំរុញ​ការអភិវឌ្ឍហេដ្ឋារចនា​សម្ព័ន្ធតភ្ជាប់ឌីជីថលរួមមាន បង្គោល​អង់តែនទូរសព្ទ បណ្តាញខ្សែកាប​អុបទិក​ក្រោមបាតសមុទ្រ និង​លើគោកក្នុង​នោះ​ បង្គោលអង់តែន​ទូរសព្ទ​មាន​សរុប ១១ ៥១១ បង្គោល​។ នៅរាជធានីភ្នំពេញ សាងសង់​បង្គោល​អង់តែន​បន្ថែម​បាន​ចំនួន ៤១៦ ក្នុងចំណោម ១ ០០០ បង្គោល​។ ក្រសួងក៏ចាត់ក្រុមការងារ ៩ ក្រុម ចុះត្រួតពិនិត្យ​អគារកម្ពស់​ចាប់ពី ៦ ជាន់ ឡើង ដើម្បី​ជំរុញ​សេវា​ទូរសព្ទ​និង​អ៊ីនធឺណិត​នៅ​ក្នុងអគារ។

នៅតាមបណ្តាខេត្ត សាងសង់​បង្គោលអង់តែននៅខេត្តតាកែវ ខេត្តកណ្តាល និងខេត្តសៀមរាប​បាន​ចំនួន ១៩២ ក្នុង​ចំណោម​ផែនការ ៣៩៤ បង្គោល និង​បន្តសាងសង់​បន្ថែមទៀត នៅ​តាម​ទីរួមខេត្ត ទីរួម​ស្រុក និង​តំបន់​ប្រជុំជន​នៅតាមឃុំ-សង្កាត់ នៃ​បណ្តាខេត្តនានា​ព្រមទាំង​នៅតាម​តំបន់​ទេសចរ​ដាច់ស្រយាល​ ដោយប្រើមូល​និធិកាតព្វកិច្ចសេវាសកល។

ក្រសួង​មាន​ផែនការជំរុញ​ការ​សាង​សង់​បង្គោល​អង់តែនទូរសព្ទ​បន្ថែមចំនួន ៣ ៦៧៤ ដែល​មាន​ចំនួន​ស្ថានីយ​អង់តែន​សរុប ៦ ៣៥៥ ត្រឹម​ឆ្នាំ​ ២០២៧​។

បណ្តាញ​ខ្សែកាប​អុបទិក​លើ​គោក​មាន​ប្រវែង ៣៤ ៤៩១ គ.ម. ក្នុងនោះបំពង់​កប់ក្រោមដី ២ ៩២៣ គ.ម. និង​ក្រោមបាតសមុទ្រ​ប្រវែង ២៦ ៣០០ គ.ម. និង​គ្រោងមានបណ្តាញថ្មីប្រវែង ២ ៩៩៧ គ.ម. នៅឆ្នាំ២០២៦

-វិសាលភាពនៃការគ្របដណ្តប់សេវាទូរសព្ទ 4G មាន ៩៣,២% នៃ​ចំនួនប្រជាជន និង ៨២% នៃផ្ទៃដី

-យកចិត្តទុកដាក់លើការលើកកម្ពស់គុណភាពនិងការពារអ្នកប្រើប្រាស់សេវាទូរគមនាគមន៍តាមវិធានការ​ដូចជា​៖

1/បំពាក់ឧបករណ៍វាស់ស្ទង់​សេវាលើរថយន្តចំនួន ៥ គ្រឿង សម្រាប់​វាស់ស្ទង់សេវា និងបញ្ចៀសការ​ឆ្លងរំខាន
2/ដាក់ឱ្យដំណើរការកម្មវិធី​ទូរសព្ទ MPTC Speed Test ដើម្បីឱ្យអ្នកប្រើប្រាស់​អាចវាស់ល្បឿន សេវា​អ៊ីនធឺណិត​ដោយខ្លួនឯង
3/សហការ​ជាមួយអាជ្ញាធរដែនដី ចុះរុះរើ​ឧបករណ៍ Boosters/Repeaters នៅតាម​ទីតាំង​ដែល​បាន​កែ​លំអ​គុណភាព​សេវារួច
4/លុបបំបាត់រាល់ការផ្សាយពាណិជ្ជកម្ម ឬគម្រោងសេវាកម្ម ដែលពុំមានភាពសុចរិត ឬផ្ទុយនឹងច្បាប់​និង​លិខិត​បទដ្ឋាន​គតិយុត្ត
5/ ស្រាវជ្រាវបទល្មើស និងបង្ក្រាបករណីផ្គត់ផ្គង់​សេវាអ៊ីនធឺណិត​ដោយគ្មាន​អាជ្ញាបណ្ណ ការ​អូស​បណ្តាញខ្សែកាបអុបទិក​ខុស​ច្បាប់ ការនាំចូល​គ្រឿងសម្ភារៈ​បរិក្ខារ​ទូរគមនាគមន៍​គ្មាន​លិខិត​អនុញ្ញាត ការលក់ស៊ីម​ដោយពុំភ្ជាប់អត្តសញ្ញាណ​បណ្ណ មជ្ឈមណ្ឌល​ទិន្នន័យគ្មានអាជ្ញាបណ្ណ និង​ការ​ប្រើប្រាស់​ឧបករណ៍បញ្ជូនទទួល​ក្លែងក្លាយ (Fake BTS) សម្រាប់ផ្សព្វផ្សាយ​ល្បែង​អនឡាញ ប្រាក់​កម្ចី និង​រូបអាសអាភាសជាដើម៕