“វាយក្អម” មិនត្រឹមជាល្បែងប្រជាប្រិយខ្មែរសម្រាប់កម្សាន្ត តែផ្សារភ្ជាប់នឹងអត្ថន័យនៃជំនឿមួយទៀត

ក្នុងចំណោមល្បែងប្រជាប្រិយខ្មែរជាច្រើន ល្បែងវាយក្អម ក៏ជាល្បែងមួយដែលកំពុងពេញនិយមខ្លាំង ដែលត្រូវបានគេយកមកលេងកម្សាន្តក្នុងពិធីបុណ្យចូលឆ្នាំ ឬសង្រ្កាន្តនៅតាមទីតាំងនានា។

ត្បិតល្បែងវាយក្អម ជាល្បែងប្រជាប្រិយមួយប្រភេទដែលគេតែងនិយមលេងក្នុងពិធីបុណ្យចូលឆ្នាំ ដើម្បីបង្កលក្ខណៈសប្បាយ ប៉ុន្តែវាបានបង្គប់នូវអត្ថន័យទៅលើជំនឿ ដែលគេជឿថា ល្បែងនេះ មានគោលបំណងដើម្បីដេញរឿងមិនល្អ រឿងហ្មងសៅ ទៅតាមអំបែងក្អមដែលវាយបែក។​

ចំពោះការលេងល្បែងនេះ ត្រូវមានការរៀបចំទុកមុនឱ្យបានល្អ និងត្រូវរកបង្គោល២សងខាង (អាចជាដើមឈើ ឬសសរណាមួយ) ដើម្បីចងខ្សែដែលមានប្រវែង និងទំហំសមរម្យក្នុងការទ្រទ្រង់នឹងទម្ងន់ក្អម។ នៅក្នុងក្អមគេមានដាក់ម្សៅក្រអូបតំណាងសេរីសួស្តី។ ដោយឡែកគេត្រូវត្រៀមដំបងទុកមួយមានប្រវែងសមាមារ្រទៅនេងកម្ពស់ក្អម។ តាមធម្មតា គេត្រូវការក្រមារុំភ្នែកអ្នកវាយ ឱ្យជិតរួចធ្វើការបង្វិល ៣​ ជុំ។ បន្ទាប់មកទៀតគេលែងឱ្យអ្នកវាយក្អមតាមការទទួលអារម្មណ៍ដឹងរបស់ខ្លួន។ ល្គិកណាអ្នកនោះវាយខុសគ្រប់កំណត់បី ដងចាត់ទុកថាចាញ់ ដោយឡែកប្រសិនបើវាយបែកក្អមនោះចាត់ថាឈ្នះ​៕