ឯកឧត្ដម ហ៊ុ​ន ម៉ានី ត្រូវបានរដ្ឋសភាផ្ដល់សេចក្ដីទុកចិត្តជាឧបនាយករដ្ឋមន្ត្រី បន្ថែមលើតំណែងបច្ចុប្បន្ន

ឯកឧត្ដម ហ៊ុ​ន ម៉ានី ត្រូវបានសមាជិក-សមាជិការដ្ឋសភា បោះឆ្នោតផ្ដល់សេចក្ដីទុកចិត្តតែងតាំងជាឧបនាយករដ្ឋមន្ត្រី បន្ថែមលើតំណែងបច្ចុប្បន្នជារដ្ឋមន្ត្រីក្រសួងមុខងារសាធារណៈ។ ការបោះឆ្នោតបែបនេះ ខណៈដែលរដ្ឋសភាបើកសម័យប្រជុំជាវិសាមញ្ញ នីតិកាលទី ៧ ក្រោមអធិបតីភាពសម្ដេច ឃួន សុដារី ប្រធានរដ្ឋសភា នាព្រឹកថ្ងៃទី ២១ ខែកុម្ភៈ ឆ្នាំ ២០២៤នេះ។

នៅក្នុងសម័យប្រជុំនេះ គឺមានរបៀបវារៈតែមួយប៉ុណ្ណោះ នោះគឺការបោះឆ្នោតផ្ដល់សេចក្ដីទុកចិត្តលើ ការតែងតាំងបំពេញបន្ថែម សមាសភាពរាជរដ្ឋាភិបាលចំនួន ៣រូប ដែលទី១. ឯកឧត្ដម ហ៊ុន ម៉ានី ជាឧបនាយករដ្ឋមន្ត្រី និងជារដ្ឋមន្ត្រីក្រសួងមុខសាធារណៈ។ ទី២. ឯកឧត្ដម ស្រ៊ី ថាមរុង្គ ជាទេសរដ្ឋមន្ត្រី ទទួលបន្ទុកបេសកកម្មពិសេស។ ទី៣. ឯកឧត្ដម ប៉ែន វិបុល ជាទេសរដ្ឋមន្ត្រី ទទួលបន្ទុកបេសកកម្មពិសេស។

សមាសភាពសមាជិករាជរដ្ឋាភិបាលបំពេញបន្ថែមទាំង ៣រូប ត្រូវបានសមាជិក-សមាជិករដ្ឋសភាចំនួន ១២០សំឡេង បោះឆ្នោតផ្ដល់សេចក្ដីទុកចិត្ត នៅព្រឹកថ្ងៃពុធដដែលនេះ។

សូមជម្រាបថា មុនត្រូវបានតែងតាំងជារដ្ឋមន្ត្រីក្រសួងមុខសាធារណៈ និងជាឧបនាយករដ្ឋមន្ត្រី ឯកឧត្ដម ហ៊ុន ម៉ានី គឺជាអ្នកតំណាងរាស្រ្ដមណ្ឌលខេត្តកំពង់ស្ពឺ។ ចំណែកឯកឧត្ដម ស្រ៊ី ថាមរុង្គ មុនត្រូវបានតែងតាំងជាទេសរដ្ឋមន្ត្រី ទទួលបន្ទុកបេសកកម្មពិសេស គឺមានតំណែងជារដ្ឋមន្ត្រីប្រតិភូអមនាយករដ្ឋមន្ត្រី។

រីឯឯកឧត្ដម ប៉ែន វិបុល មុនត្រូវបានតែងតាំងជាទេសរដ្ឋមន្ត្រី ទទួលបន្ទុកបេសកកម្មពិសេស គឺមានតំណែងជារដ្ឋមន្ត្រីប្រតិភូអមនាយករដ្ឋមន្ត្រី ហើយមុនត្រូវបានតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី គឺមានតំណែងជាអគ្គស្នងការរងនគរបាលជាតិ៕